[360] Anāpatti sati antarāye pariyesitvā dutiyikaṁ bhikkhuniṁ
na labhati gilānāya āpadāsu ummattikāya ādikammikāyāti.
--------
Ārāmavaggassa dasamasikkhāpadaṁ

[361] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī pasākhe jātaṁ gaṇḍaṁ purisena saddhiṁ ekenekā bhedāpesi.
Athakho so puriso taṁ bhikkhuniṁ dūsetuṁ upakkami. Sā bhikkhunī
vissaramakāsi. Bhikkhuniyo upadhāvitvā taṁ bhikkhuniṁ etadavocuṁ kissa
tvaṁ ayye vissaramakāsīti. Athakho sā bhikkhunī bhikkhunīnaṁ etamatthaṁ
ārocesi. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma bhikkhunī pasākhe jātaṁ gaṇḍaṁ
purisena saddhiṁ ekenekā bhedāpessatīti .pe. Saccaṁ kira bhikkhave
bhikkhuniyo pasākhe jātaṁ gaṇḍaṁ purisena saddhiṁ ekenekā
Bhedāpetīti 1 . Saccaṁ bhagavāti. Vigarahi buddho bhagavā kathaṁ hi nāma
bhikkhave bhikkhunī pasākhe jātaṁ gaṇḍaṁ purisena saddhiṁ ekenekā
bhedāpessati netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
pasākhe jātaṁ gaṇḍaṁ vā ruhitaṁ vā anapaloketvā saṅghaṁ vā gaṇaṁ
vā purisena saddhiṁ ekenekā bhedāpeyya vā phālāpeyya vā
dhovāpeyya vā ālimpāpeyya vā bandhāpeyya vā mocāpeyya vā
pācittiyanti.

[362] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Pasākhaṁ nāma adhonābhi
ubbhajānumaṇḍalaṁ. Jātanti tattha jātaṁ. Gaṇḍo nāma yo
koci gaṇḍo. Ruhitaṁ nāma yaṅkiñci vaṇaṁ 2 . Anapaloketvāti
anāpucchā. Saṅgho nāma bhikkhunīsaṅgho vuccati. Gaṇo nāma
sambahulā bhikkhuniyo vuccanti. Puriso nāma manussapuriso na
yakkho na peto na tiracchānagato viññū paṭibalo dūsetuṁ.
Saddhinti ekato. Ekenekāti puriso ceva hoti bhikkhunī ca.
Bhindāti āṇāpeti āpatti dukkaṭassa bhinne āpatti
pācittiyassa. Phālehīti āṇāpeti āpatti dukkaṭassa phālite
1 Ma. Yu. bhedāpesīti. 2 Ma. Yu. yaṅkiñci vaṇo. yo koci vaṇoti pāṭhena bhavitabbaṁ.
Āpatti pācittiyassa. Dhovāti āṇāpeti āpatti dukkaṭassa dhote 1
āpatti pācittiyassa. Ālimpāti āṇāpeti āpatti dukkaṭassa
ālitte 2 āpatti pācittiyassa. Bandhāti 3 āṇāpeti āpatti
dukkaṭassa baddhe āpatti pācittiyassa. Mocehīti āṇāpeti
āpatti dukkaṭassa mutte āpatti pācittiyassa.

[363] Anāpatti apaloketvā bhedāpeti vā phālāpeti vā
dhovāpeti vā ālimpāpeti vā bandhāpeti vā mocāpeti vā
yā kāci viññū dutiyā [4]- hoti ummattikāya ādikammikāyāti.
Ārāmavaggo chaṭṭho.
----------
Gabbhinīvaggassa paṭhamasikkhāpadaṁ

[364] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
gabbhiniṁ vuṭṭhāpenti. Sā piṇḍāya carati. Manussā evamāhaṁsu
dethayyāya bhikkhaṁ garugabbhā 5 ayyāti. Manussā ujjhāyanti
khīyanti vipācenti kathaṁ hi nāma bhikkhuniyo gabbhiniṁ vuṭṭhāpessantitī.
Assosuṁ kho bhikkhuniyo tesaṁ manussānaṁ ujjhāyantānaṁ khīyantānaṁ
vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma bhikkhuniyo gabbhiniṁ
1 Ma. dhovite. 2 Ma. Yu. litte. 3 Ma. bandhāhi. 4 Ma. Yu. yo koci viññū
dutiyo. 5 Ma. Yu. garubhārā.
Vuṭṭhāpessantīti .pe. Saccaṁ kira bhikkhave bhikkhuniyo gabbhiniṁ
vuṭṭhāpentīti. Saccaṁ bhagavāti. Vigarahi buddho bhagavā kathaṁ
hi nāma bhikkhave bhikkhuniyo gabbhiniṁ vuṭṭhāpessanti netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī gabbhiniṁ vuṭṭhāpeyya
pācittiyanti.

[365] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Gabbhinī nāma āpannasattā
vuccati. Vuṭṭhāpeyyāti upasampādeyya. Vuṭṭhāpessāmīti gaṇaṁ
vā ācariniṁ vā pattaṁ vā cīvaraṁ vā pariyesati sīmaṁ vā
sammannati āpatti dukkaṭassa ñattiyā dukkaṭaṁ dvīhi
kammavācāhi dukkaṭā kammavācāpariyosāne upajjhāyāya āpatti
pācittiyassa gaṇassa ca ācariniyā ca āpatti dukkaṭassa.

[366] Gabbhiniyā gabbhinīsaññā vuṭṭhāpeti āpatti
pācittiyassa. Gabbhiniyā vematikā vuṭṭhāpeti āpatti dukkaṭassa.
Gabbhiniyā agabbhinīsaññā vuṭṭhāpeti anāpatti. Agabbhiniyā
gabbhinīsaññā āpatti dukkaṭassa. Agabbhiniyā vematikā
āpatti dukkaṭassa. Agabbhiniyā agabbhinīsaññā anāpatti.

[367] Anāpatti gabbhiniṁ agabbhinīsaññā vuṭṭhāpeti agabbhiniṁ
agabbhinīsaññā vuṭṭhāpeti ummattikāya ādikammikāyāti.
----------
Gabbhinīvaggassa dutiyasikkhāpadaṁ

[368] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo pāyantiṁ
vuṭṭhāpenti. Sā piṇḍāya carati. Manussā evamāhaṁsu dethayyāya
bhikkhaṁ sadutiyā 1 ayyāti. Manussā ujjhāyanti khīyanti vipācenti
kathaṁ hi nāma bhikkhuniyo pāyantiṁ vuṭṭhāpessantīti. Assosuṁ kho
bhikkhuniyo tesaṁ manussānaṁ ujjhāyantānaṁ khīyantānaṁ vipācentānaṁ.
Yā tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo pāyantiṁ vuṭṭhāpessantīti .pe. Saccaṁ kira
bhikkhave bhikkhuniyo pāyantiṁ vuṭṭhāpentīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhuniyo pāyantiṁ vuṭṭhāpessanti
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī pāyantiṁ
vuṭṭhāpeyya pācittiyanti.

[369] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Pāyantī nāma mātā vā hoti
dhātī vā. Vuṭṭhāpeyyāti upasampādeyya. Vuṭṭhāpessāmīti gaṇaṁ
vā ācariniṁ vā pattaṁ vā cīvaraṁ pariyesati sīmaṁ vā sammannati
āpatti dukkaṭassa ñattiyā dukkaṭaṁ dvīhi kammavācāhi dukkaṭā
1 Ma. Yu. sadutiyikā.
Kammavācāpariyosāne upajjhāyāya āpatti pācittiyassa gaṇassa
ca ācariniyā ca āpatti dukkaṭassa.