[350] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Abhikkhuko nāma āvāso na
sakkā hoti ovādāya vā saṁvāsāya vā gantuṁ. Vassaṁ vasissāmīti
senāsanaṁ paññāpeti pānīyaṁ paribhojanīyaṁ upaṭṭhapeti pariveṇaṁ
sammajjati āpatti dukkaṭassa. Saha aruṇuggamanā āpatti
pācittiyassa.

[351] Anāpatti vassupagatā bhikkhū pakkantā vā honti
vibbhantā vā kālakatā vā pakkhasaṅkantā vā āpadāsu
ummattikāya ādikammikāyāti.
--------
Ārāmavaggassa sattamasikkhāpadaṁ

[352] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sambahulā
bhikkhuniyo gāmakāvāse vassaṁ vutthā sāvatthiṁ agamaṁsu. Bhikkhuniyo
tā bhikkhuniyo etadavocuṁ katthayyāyo vassaṁ vutthā kacci bhikkhu
saṅgho pavāritoti. Na mayaṁ ayye bhikkhusaṅghaṁ pavāremāti. Yā
tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma bhikkhuniyo vassaṁ vutthā bhikkhusaṅghaṁ
nappavāressantīti .pe. Saccaṁ kira bhikkhave bhikkhuniyo vassaṁ vutthā
bhikkhusaṅghaṁ nappavārentīti. Saccaṁ bhagavāti. Vigarahi buddho
bhagavā kathaṁ hi nāma bhikkhave bhikkhuniyo vassaṁ vutthā bhikkhusaṅghaṁ
nappavāressanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā pana
bhikkhunī vassaṁ vutthā ubhatosaṅghe tīhi ṭhānehi nappavāreyya diṭṭhena
vā sutena vā parisaṅkāya vā pācittiyanti.

[353] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Vassaṁ vutthā nāma purimaṁ
vā temāsaṁ pacchimaṁ vā temāsaṁ vutthā. Ubhatosaṅghe tīhi ṭhānehi
nappavāressāmi diṭṭhena vā sutena vā parisaṅkāya vāti dhuraṁ
Nikkhittamatte āpatti pācittiyassa.

[354] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
---------
Ārāmavaggassa aṭṭhamasikkhāpadaṁ

[355] Tena samayena buddho bhagavā sakkesu viharati kapilavatthusmiṁ
nigrodhārāme. Tena kho pana samayena chabbaggiyā bhikkhū bhikkhunūpassayaṁ
upasaṅkamitvā chabbaggiyā bhikkhuniyo ovadanti. Bhikkhuniyo
chabbaggiyā bhikkhuniyo etadavocuṁ ethayye ovādaṁ gamissāmāti.
Yaṁpi 1 mayaṁ ayye gaccheyyāma ovādassa kāraṇā ayyā chabbaggiyā
idheva āgantvā amhe ovadantīti. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi
nāma chabbaggiyā bhikkhuniyo ovādaṁ na gacchissantīti .pe. Saccaṁ
kira bhikkhave chabbaggiyā bhikkhuniyo ovādaṁ na gacchantīti. Saccaṁ
bhagavāti. Vigarahi buddho bhagavā kathaṁ hi nāma bhikkhave
chabbaggiyā bhikkhuniyo ovādaṁ na gacchissanti netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo imaṁ
sikkhāpadaṁ uddisantu yā pana bhikkhunī ovādāya vā saṁvāsāya
vā na gaccheyya pācittiyanti.

[356] Yā panāti yā yādisā .pe. Bhikkhunīti .pe. Ayaṁ
1 Yu. Ma. yaṁ hi.
Imasmiṁ atthe adhippetā bhikkhunīti. Ovādo nāma aṭṭha
garudhammā. Saṁvāso nāma ekakammaṁ ekuddeso samasikkhātā.
Ovādāya vā saṁvāsāya vā na gacchissāmīti dhuraṁ nikkhittamatte
āpatti pācittiyassa.

[357] Anāpatti sati antarāye pariyesitvā dutiyikaṁ bhikkhuniṁ
na labhati gilānāya āpadāsu ummattikāya ādikammikāyāti.
-------
Ārāmavaggassa navamasikkhāpadaṁ

[358] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
uposathaṁpi na pucchanti ovādaṁpi na yācanti. Bhikkhū ujjhāyanti
khīyanti vipācenti kathaṁ hi nāma bhikkhuniyo uposathaṁpi na pucchissanti
ovādaṁpi na yācissantīti .pe. Saccaṁ kira bhikkhave bhikkhuniyo
uposathaṁpi na pucchanti ovādaṁpi na yācantīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo uposathaṁpi
na pucchissanti ovādaṁpi na yācissanti netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu anvaḍḍhamāsaṁ pana 1 bhikkhuniyā bhikkhusaṅghato dve dhammā
1 Ma. Yu. ayaṁ pāṭho na hoti.
Paccāsiṁsitabbā uposathapucchakañca ovādupasaṅkamanañca taṁ
atikkāmentiyā pācittiyanti.

[359] Anvaḍḍhamāsanti anuposathikaṁ. Uposatho nāma dve
uposathā cātuddasiko ca paṇṇarasiko ca. Ovādo nāma
aṭṭha garudhammā. Uposathaṁpi na pucchissāmi ovādaṁpi na
yācissāmīti dhuraṁ nikkhittamatte āpatti pācittiyassa.