[390] Dhammakamme dhammakammasaññā vuṭṭhāpeti āpatti
pācittiyassa. Dhammakamme vematikā vuṭṭhāpeti āpatti
pācittiyassa. Dhammakamme adhammakammasaññā vuṭṭhāpeti āpatti
pācittiyassa. Adhammakamme dhammakammasaññā āpatti
dukkaṭassa. Adhammakamme vematikā āpatti dukkaṭassa.
Adhammakamme adhammakammasaññā āpatti dukkaṭassa.

[391] Anāpatti paripuṇṇadvādasavassaṁ gihigataṁ dve vassāni
Chasu dhammesu sikkhitasikkhaṁ saṅghena sammataṁ vuṭṭhāpeti ummattikāya
ādikammikāyāti.
----------
Gabbhinīvaggassa aṭṭhamasikkhāpadaṁ

[392] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī sahajīviniṁ vuṭṭhāpetvā dve vassāni neva anuggaṇhāti na
anuggaṇhāpeti. Tā bālā honti abyattā na jānanti
kappiyaṁ vā akappiyaṁ vā. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma ayyā thullanandā
sahajīviniṁ vuṭṭhāpetvā dve vassāni neva anuggaṇhissati
na anuggaṇhāpessatīti .pe. Saccaṁ kira bhikkhave thullanandā
bhikkhunī sahajīviniṁ vuṭṭhāpetvā dve vassāni neva anuggaṇhāti na
anuggaṇhāpetīti. Saccaṁ bhagavāti. Vigarahi buddho bhagavā kathaṁ
hi nāma bhikkhave thullanandā bhikkhunī sahajīviniṁ vuṭṭhāpetvā dve
vassāni neva anuggaṇhissati na anuggaṇhāpessati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī sahajīviniṁ vuṭṭhāpetvā
dve vassāni neva anuggaṇheyya na anuggaṇhāpeyya pācittiyanti.

[393] Yā panāti yā yādisā .pe. Bhikkhunīti .pe. Ayaṁ
Imasmiṁ atthe adhippetā bhikkhunīti. Sahajīvinī nāma saddhivihārinī
vuccati. Vuṭṭhāpetvāti upasampādetvā. Dve vassānīti dve
saṁvaccharāni. Neva anuggaṇheyyāti na sayaṁ anuggaṇheyya
uddesena paripucchāya ovādena anusāsaniyā. Na anuggaṇhāpeyyāti
na aññaṁ āṇāpeyya. Dve vassāni neva anuggaṇhissāmi na
anuggaṇhāpessāmīti dhuraṁ nikkhittamatte āpatti pācittiyassa.

[394] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
--------
Gabbhinīvaggassa navamasikkhāpadaṁ

[395] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
vuṭṭhāpitaṁ pavattiniṁ dve vassāni nānubandhanti. Tā bālā
honti abyattā na jānanti kappiyaṁ vā akappiyaṁ vā. Yā
tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo vuṭṭhāpitaṁ pavattiniṁ dve vassāni
nānubandhissantīti .pe. Saccaṁ kira bhikkhave bhikkhuniyo vuṭṭhāpitaṁ pavattiniṁ
dve vassāni nānubandhantīti. Saccaṁ bhagavāti. Vigarahi buddho
bhagavā kathaṁ hi nāma bhikkhave bhikkhuniyo vuṭṭhāpitaṁ pavattiniṁ dve
vassāni nānubandhissanti netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī vuṭṭhāpitaṁ pavattiniṁ dve vassāni nānubandheyya
pācittiyanti.

[396] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Vuṭṭhāpitanti upasampāditaṁ.
Pavattinī nāma upajjhāyā 1 vuccati. Dve vassānīti dve
saṁvaccharāni. Nānubandheyyāti na sayaṁ upaṭṭhaheyya 2 . Dve vassāni
nānubandhissāmīti dhuraṁ nikkhittamatte āpatti pācittiyassa.

[397] Anāpatti upajjhāyā bālā vā hoti alajjinī vā
gilānāya āpadāsu ummattikāya ādikammikāyāti.
-------
Gabbhinīvaggassa dasamasikkhāpadaṁ

[398] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī sahajīviniṁ vuṭṭhāpetvā neva vūpakāseti 3 na vūpakāsāpeti 4 .
Sāmiko aggahesi. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
sahajīviniṁ vuṭṭhāpetvā neva vūpakāsessati na vūpakāsāpessati
sāmiko aggahesi sacāyaṁ bhikkhunī pakkantā assa na ca
1 Ma. Yu. upajjhā. 2 Ma. upaṭṭhāpeyya. 3 Ma. Yu. neva vūpakāsesi.
4 Ma. Yu. na vūpakāsāpesi.
Sāmiko gaṇheyyāti .pe. Saccaṁ kira bhikkhave thullanandā bhikkhunī
sahajīviniṁ vuṭṭhāpetvā neva vūpakāseti 1 na vūpakāsāpeti 2 sāmiko
aggahesīti. Saccaṁ bhagavāti. Vigarahi buddho bhagavā kathaṁ hi
nāma bhikkhave thullanandā bhikkhunī sahajīviniṁ vuṭṭhāpetvā neva
vūpakāsessati na vūpakāsāpessati sāmiko aggahesi netaṁ
bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī sahajīviniṁ
vuṭṭhāpetvā neva vūpakāseyya na vūpakāsāpeyya antamaso
chappañcayojanānipi pācittiyanti.

[399] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Sahajīvinī nāma saddhivihārinī
vuccati. Vuṭṭhāpetvāti upasampādetvā. Neva vūpakāseyyāti
na sayaṁ vūpakāseyya. Na vūpakāsāpeyyāti na aññaṁ āṇāpeyya.
Neva vūpakāsessāmi na vūpakāsāpessāmi antamaso chappañcayojanānipīti
dhuraṁ nikkhittamatte āpatti pācittiyassa.