[460] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo gandhavaṇṇakena nahāyanti. Manussā ujjhāyanti khīyanti
vipācenti kathaṁ hi nāma bhikkhuniyo gandhavaṇṇakena nahāyissanti
seyyathāpi gihiniyo kāmabhoginiyoti. Assosuṁ kho bhikkhuniyo tesaṁ
1 Yu. dhāressantīti.
Manussānaṁ ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ
hi nāma chabbaggiyā bhikkhuniyo gandhavaṇṇakena nahāyissantīti .pe.
Saccaṁ kira bhikkhave chabbaggiyā bhikkhuniyo gandhavaṇṇakena nahāyantīti.
Saccaṁ bhagavāti. Vigarahi buddho bhagavā kathaṁ hi nāma bhikkhave
chabbaggiyā bhikkhuniyo gandhavaṇṇakena nahāyissanti netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī gandhavaṇṇakena
nahāyeyya pācittiyanti.

[461] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Gandho nāma yo koci
gandho. Vaṇṇakaṁ nāma yaṅkiñci vaṇṇakaṁ. Nahāyeyyāti nahāyati
payoge dukkaṭaṁ nahānapariyosāne āpatti pācittiyassa.

[462] Anāpatti ābādhappaccayā ummattikāya
ādikammikāyāti.
--------
Chattupāhanavaggassa chaṭṭhasikkhāpadaṁ

[463] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo vāsitakena piññākena nahāyanti. Manussā ujjhāyanti
Khīyanti vipācenti kathaṁ hi nāma bhikkhuniyo vāsitakena piññākena
nahāyissanti seyyathāpi gihiniyo kāmabhoginiyoti. Assosuṁ kho
bhikkhuniyo tesaṁ manussānaṁ ujjhāyantānaṁ khīyantānaṁ vipācentānaṁ.
Yā tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma chabbaggiyā bhikkhuniyo vāsitakena piññākena
nahāyissantīti. Saccaṁ kira bhikkhave chabbaggiyā bhikkhuniyo
vāsitakena piññākena nahāyantīti. Saccaṁ bhagavāti. Vigarahi buddho
bhagavā kathaṁ hi nāma bhikkhave chabbaggiyā bhikkhuniyo vāsitakena
piññākena nahāyissanti netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī vāsitakena piññākena nahāyeyya pācittiyanti.

[464] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Vāsitakaṁ nāma yaṅkiñci
gandhavāsitakaṁ 1 . Piññākaṁ nāma tilapiṭṭhaṁ vuccati. Nahāyeyyāti nahāyati
payoge dukkaṭaṁ nahānapariyosāne āpatti pācittiyassa.

[465] Anāpatti ābādhappaccayā pakatipiññākena nahāyati
ummattikāya ādikammikāyāti.
Chattupāhanavaggassa sattamasikkhāpadaṁ

[466] Tena samayena buddho bhagavā sāvatthiyaṁ viharati jetavane
1 Yu. vāsitakaṁ.
Anāthapiṇḍikassa ārāme. Tena kho pana samayena bhikkhuniyo bhikkhuniyā
ummaddāpentipi parimaddāpentipi. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ hi nāma
bhikkhuniyo bhikkhuniyā ummaddāpessantipi parimaddāpessantipi seyyathāpi
gihiniyo kāmabhoginiyoti. Assosuṁ kho bhikkhuniyo tesaṁ manussānaṁ
ujjhāyantānaṁ khīyantānaṁ vipācentānaṁ. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma bhikkhuniyo
bhikkhuniyā ummaddāpessantipi parimaddāpessantipīti .pe. Saccaṁ kira
bhikkhave bhikkhuniyo bhikkhuniyā ummaddāpentipi parimaddāpentipīti.
Saccaṁ bhagavāti. Vigarahi buddho bhagavā kathaṁ hi nāma bhikkhave bhikkhuniyo
bhikkhuniyā ummaddāpessantipi parimaddāpessantipi netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī bhikkhuniyā ummaddāpeyya
vā parimaddāpeyya vā pācittiyanti.

[467] Yā panāti yā yādisā .pe. Bhikkhunīti .pe. Ayaṁ imasmiṁ
atthe adhippetā bhikkhunīti. Bhikkhuniyāti aññāya bhikkhuniyā.
Ummaddāpeyya vāti ummaddāpeti āpatti pācittiyassa.
Parimaddāpeyya vāti sambāhāpeti āpatti pācittiyassa.

[468] Anāpatti gilānāya āpadāsu ummattikāya
ādikammikāyāti.
Chattupāhanavaggassa aṭṭhama-navama-dasamasikkhāpadāni

[469] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
sikkhamānāya ummaddāpentipi parimaddāpentipi .pe. Sāmaṇeriyā
ummaddāpentipi parimaddāpentipi .pe. Gihiniyā ummaddāpentipi
parimaddāpentipi. Manussā vihāracārikaṁ āhiṇḍantā passitvā
ujjhāyanti khīyanti vipācenti kathaṁ hi nāma bhikkhuniyo gihiniyā
ummaddāpessantipi parimaddāpessantipi seyyathāpi gihiniyo
kāmabhoginiyoti. Assosuṁ kho bhikkhuniyo tesaṁ manussānaṁ ujjhāyantānaṁ
khīyantānaṁ vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma bhikkhuniyo gihiniyā
ummaddāpessantipi parimaddāpessantipīti .pe. Saccaṁ kira bhikkhave
bhikkhuniyo gihiniyā ummaddāpentipi parimaddāpentipīti. Saccaṁ
bhagavāti. Vigarahi buddho bhagavā kathaṁ hi nāma bhikkhave bhikkhuniyo
gihiniyā ummaddāpessantipi parimaddāpessantipi netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī gihiniyā ummaddāpeyya
vā parimaddāpeyya vā pācittiyanti.