[1017] Akkhāhi no tāyaṁ mudhā nu laddho
akkhehi no tāyaṁ ajesi jūte
dhammena laddho itimāyamāha
kathaṁ [2]- tuvaṁ hatthamimassamāgato.

[1018] Yo missaro tattha ahosi rājā
tamāyamakkhehi ajesi jūte
so maṁ jito rājā imassadāsi
dhammena laddhosmi asāhasena.

[1019] Mahorago attamano udaggo
sutvāna dhīrassa subhāsitāni
hatthe gahetvāna anomapaññaṁ
pāvekkhi bhariyāya tadā sakāse.
Yena tvaṁ vimale paṇḍu yena bhattaṁ na ruccati
na ca me tādiso vaṇṇo ayameso tamonudo.
Yassa te hadayenattho āgatoyaṁ pabhaṅkaro
tassa vākyaṁ nisāmehi dullabhaṁ dassanaṁ puna.
1 Ma. iti tāyamāha. 2 Ma. nu.

[1020] Disvāna taṁ vimalā bhūripaññaṁ
dasaṅguliṁ añjaliṁ paggahetvā
haṭṭhena bhāvena patītarūpā
iccabravi kurūnaṁ kattuseṭṭhaṁ.
Adiṭṭhapubbaṁ disvāna macco maccubhayaṭṭito
byamhito nābhivādesi na idaṁ paññavatāmiva.

[1021] Na camhi byamhito nāgi na ca maccubhayaṭṭito
na vajjho abhivādeyya vajjhaṁ vā nābhivādaye.
Kathaṁ nu 1 abhivādeyya abhivādāpayetha ve
yaṁ naro hantumiccheyya taṁ kammaṁ nupapajjati.

[1022] Evametaṁ yathā brūsi saccaṁ bhāsasi paṇḍita
na vajjho abhivādeyya vajjhaṁ vā nābhivādaye.
Kathaṁ nu 2 abhivādeyya abhivādāpayetha ve
yaṁ naro hantumiccheyya taṁ kammaṁ nupapajjati.

[1023] Asassataṁ sassataṁ nu tavayidaṁ vimānaṁ
iddhī jutī balaviriyūpapatti
pucchāmi taṁ nāgakaññetamatthaṁ
kathaṁ nu te laddhamidaṁ vimānaṁ.
Adhiccaladdhaṁ pariṇāmajante
sayaṁ kataṁ udāhu devehi dinnaṁ
1-2 Ma. no.
Akkhāhi me nāgakaññetamatthaṁ
yatheva te laddhamidaṁ vimānaṁ.

[1024] Nādhiccaladdhaṁ na pariṇāmajamme
na sayaṁ kataṁ nāpi devehi dinnaṁ
sakehi kammehi apāpakehi
puññehi me laddhamidaṁ vimānaṁ.

[1025] Kinte vataṁ kimpana brahmacariyaṁ
kissa suciṇṇassa ayaṁ vipāko
iddhī jutī balaviriyūpapatti
idañca te nāgi mahāvimānaṁ.

[1026] Ahañca kho sāmiko cāpi mayhaṁ
saddhā ubho dānapatī ahumhā
opānabhūtaṁ me gharaṁ tadāsi
santappitā samaṇabrāhmaṇā ca.
Mālañca gandhañca vilepanañca
padīpiyaṁ seyyamupassayañca
acchādanaṁ sāyanamannapānaṁ
sakkacca dānāni adamha tattha.
Taṁ me vataṁ tampana brahmacariyaṁ
tassa suciṇṇassa ayaṁ vipāko
Iddhī jutī balaviriyūpapatti
idañca me dhīra mahāvimānaṁ.