[237] Kacci santo apacitā asanto parivajjitā
no ca 2 dhammaṁ niraṅkatvā adhammamanuvattasi.
1 Ma. manusāsasi. 2 Ma. ce.

[238] Santo ca me apacitā asanto parivajjitā
dhammamevānuvattāmi adhammo me niraṅkato.

[239] Kacci nunāgataṁ 1 dīghaṁ samavekkhasi khattiya
kacci matto madanīye paralokaṁ na santasi.

[240] Ahaṁ anāgataṁ dīghaṁ samavekkhāmi pakkhima
ṭhito dasasu dhammesu paralokaṁ na santasiṁ 2 .
Dānaṁ sīlaṁ pariccāgaṁ ājjavaṁ maddavaṁ tapaṁ
akkodhaṁ avihiṁsañca khantiñca avirodhanaṁ.
Iccete kusale dhamme ṭhite passāmi attani
tato me jāyate pīti somanassañcanappakaṁ.
Sumukho ca acintetvā visajji 3 pharusaṁ giraṁ
bhāvadosamanaññāya asmākāyaṁ vihaṅgamo.
So kuddho pharusaṁ vācaṁ nicchāresi ayoniso
yānasmāsu 4 na vijjanti nayidaṁ paññavatāmiva.

[241] Atthi me taṁ atisāraṁ vegena manujādhipa
dhataraṭṭhe ca bandhasmiṁ dukkhaṁ me vipulaṁ ahu.
Tvaṁ no pitāva puttānaṁ bhūtānaṁ dharaṇīriva
asmākaṁ adhipannānaṁ khamassu rājakuñjara.

[242] Evante 5 anumodāma yaṁ bhāvaṁ na nigūhasi
khīlaṁ pabhindasi pakkhi ujukosi vihaṅgama.
1 Ma. nānāgataṁ. 2 Ma. santase. 3 Sī. Yu. vissaji. 4 Ma. yānasmesu.
5 Ma. etaṁ te.

[243] Yaṅkiñci ratanaṁ atthi kāsirājanivesane
rajataṁ jātarūpañca muttā veḷuriyā bahū.
Maṇayo saṅkhamuttañca vatthikaṁ 1 haricandanaṁ
ajinaṁ dantabhaṇḍañca lohaṁ kāḷāyasaṁ bahuṁ
etaṁ dadāmi vo vittaṁ issaraṁ 2 vissajāmi vo.

[244] Addhā apacitā tyamhā sakkatā ca rathesabha
dhammesu vattamānānaṁ tvaṁ no ācariyo bhava.
Ācariya samanuññātā tayā anumatā mayaṁ
taṁ padakkhiṇato katvā ñātī 3 passemurindama.

[245] Sabbarattiṁ cintayitvā mantayitvā yathātathaṁ
kāsirājā anuññāsi haṁsānaṁ pavaruttamaṁ.

[246] Tato ratyā vivasane suriyassuggamanaṁ pati
pekkhato kāsirājassa bhavanato 4 vigāhisuṁ.