[227] Āharantūdakaṁ pajjaṁ āsanañca mahārahaṁ
pañjarato pamokkhāmi dhataraṭṭhaṁ yasassinaṁ.
Tañca senāpatiṁ dhīraṁ nipuṇaṁ atthacintakaṁ
yo sukhe sukhito rañño 3 dukkhite hoti dukkhito.
Ediso kho arahati piṇḍamasnātu bhattuno
yathāyaṁ sumukho rañño pāṇasādhāraṇo sakhā.

[228] Pīṭhañca sabbasovaṇṇaṁ aṭṭhapādaṁ manoramaṁ
maṭṭhaṁ kāsikavatthinaṁ 4 dhataraṭṭho upāvisi.
Kocchañca sabbasovaṇṇaṁ veyyagghaparisibbitaṁ
sumukho ajjhapāvekkhi 5 dhataraṭṭhassanantarā.
Tesaṁ kāñcanapattehi puthū ādāya kāsiyo
haṁsānaṁ abhihāresuṁ aggaṁ rañño pavāsitaṁ.
1 Sī. Yu. byathe. 2 Sī. Yu. evete. 3 Ma. raññe. 4 Sī. kāsikapatthiṇṇaṁ.
Ma. kāsikamatthannaṁ. 5 Ma. ajjhupāvekkhi.

[229] Disvā abhihataṁ aggaṁ kāsirājena pesitaṁ
kusalo khattadhammānaṁ tato pucchi anantarā.
Kacci nu bhoto kusalaṁ kacci bhoto anāmayaṁ
kacci raṭṭhamidaṁ phītaṁ dhammena anusāsasi 1 .

[230] Kusalañceva me haṁsa atho haṁsa anāmayaṁ
atho raṭṭhamidaṁ phītaṁ dhammena anusāsahaṁ.

[231] Kacci bhoto amaccesu doso koci na vijjati
kacci ca te tavatthesu nāvakaṅkhanti jīvitaṁ.

[232] Athopi me amaccesu doso koci na vijjati
athopi te mamatthesu nāvakaṅkhanti jīvitaṁ.

[233] Kacci te sādisī bhariyā assavā piyabhāṇinī
puttarūpayasūpetā tava chandavasānugā.

[234] Atho me sādisī bhariyā assavā piyabhāṇinī
puttarūpayasūpetā mama chandavasānugā.

[235] Kacci raṭṭhaṁ anuppīḷaṁ akutociupaddavaṁ
asāhasena dhammena samena anusāsasi.

[236] Atho raṭṭhaṁ anuppīḷaṁ akutociupaddavaṁ
asāhasena dhammena samena anusāsahaṁ.