[197] Idaṁ vatvā dhataraṭṭho haṁsarājā narādhipaṁ
uttamaṁ javamanvāya ñātisaṅghamupāgamuṁ.
Te aroge anuppatte disvāna parame dije
kekātimakaruṁ haṁsā puthusaddo ajāyatha.
Te patītā pamuttena bhattunā bhattugāravā
samantā parikariṁsu 1 aṇḍajā laddhapaccayā.
1 Ma. parikiriṁsu.

[198] Evaṁ mittavataṁ atthā sabbe honti padakkhiṇā
haṁsā yathā dhataraṭṭhā ñātisaṅghamupāgamunti.
Cullahaṁsajātakaṁ paṭhamaṁ.
-----------
2 Mahāhaṁsajātakaṁ

[199] Ete haṁsā pakkamanti vaṅkaṅgā bhayameritā
harittaca hemavaṇṇa kāmaṁ sumukha pakkama.
Ohāya maṁ ñātigaṇā ekaṁ pāsavasaṁ gataṁ
anapekkhamānā gacchanti kiṁ eko avahīyasi.
Pateva patataṁ seṭṭha natthi bandhe 1 sahāyatā
mā anīghāya hāpesi kāmaṁ sumukha pakkama.

[200] Nāhaṁ dukkhaparetopi dhataraṭṭha tuvaṁ jahe
jīvitaṁ maraṇaṁ vā me tayā saddhiṁ bhavissati.
Nāhaṁ dukkhaparetopi dhataraṭṭha tuvaṁ jahe
na maṁ anariyasaṁyutte kamme yojetumarahasi.
Sakumāro sakhā tyasmi sacittesmi 2 te ṭhito
ñāto senāpati tyāhaṁ haṁsānaṁ pavaruttama
kathamahaṁ vikatthissaṁ 3 ñātimajjhe ito gato
taṁ hitvā patataṁ seṭṭha kinte vakkhāmito gato
idha pāṇaṁ cajissāmi nānariyaṁ kattumussahe.
1 Ma. baddhe. 2 Ma. sacitte casmi. 3 Yu. vikattissaṁ.

[201] Eso hi dhammo sumukha yaṁ tvaṁ ariyapathe ṭhito
yo bhattāraṁ sakhāraṁ maṁ na pariccattumussahe.
Tañhi me pekkhamānassa bhayaṁ natveva jāyati
adhigacchasi tvaṁ mayhaṁ evaṁbhūtassa jīvitaṁ.

[202] Iccevaṁ mantayantānaṁ ariyānaṁ ariyavuttinaṁ
daṇḍamādāya nesādo āpatī turito bhusaṁ.
Tamāpatantaṁ disvāna sumukho atibrūhayi 1
aṭṭhāsi purato rañño haṁso vissāsayaṁ byathaṁ.
Mā bhāyi patataṁ seṭṭha na hi bhāyanti tādisā
ahaṁ yogaṁ payuñjissaṁ yuttaṁ dhammūpasañhitaṁ
tena pariyāpadānena khippaṁ pāsā pamokkhasi.

[203] Tassa taṁ vacanaṁ sutvā sumukhassa subhāsitaṁ
pahaṭṭhalomo nesādo añjalissūpanāmayi 2 .
Na me sutaṁ vā diṭṭhaṁ vā bhāsanto mānusiṁ dijo
ariyaṁ brūhanto 3 vaṅkaṅgo cajanto mānusiṁ giraṁ.
Kinnu tāyaṁ dijo hoti mutto bandhaṁ 4 upāsasi
ohāya sakuṇā yanti kiṁ eko avahīyasi.

[204] Rājā me so dijāmitta senāpaccassa kārayiṁ
tamāpade pariccattuṁ nussahe vihagādhipaṁ.
Mahāgaṇāyaṁ 5 bhattā me mā eko byasanaṁ agā
1 Sī. Yu. aparibrūhayi. 2 Ma. añjalissa paṇāmayi. 3 Ma. bruvāno.
4 Ma. baddhaṁ. ito paraṁ īdisameva. 5 Ma. mahāgaṇāya.
Yathā taṁ samma nesāda bhattāyaṁ abhito rame.

[205] Ariyavutti 1 vaṅkaṅga yo piṇḍamapacāyasi
cajāmi te taṁ bhattāraṁ gacchathūbho yathāsukhaṁ.

[206] Sace attappayogena ohito haṁsapakkhinaṁ
paṭiggaṇhāma te samma etaṁ abhayadakkhiṇaṁ.
No ce attappayogena ohito haṁsapakkhinaṁ
anissaro muñcaṁ amhe theyyaṁ kayirāsi luddaka.