[2547] Ayamassa pāsādo
sovaṇṇapupphamālyavītikiṇṇo
yahimanuvicari rājā
parikiṇṇo itthāgārehi.
Ayamassa pāsādo
sovaṇṇapupphamālyavītikiṇṇo
yahimanuvicari rājā
parikiṇṇo ñātisaṅghena.
Idamassa kūṭāgāraṁ
sovaṇṇapupphamālyavītikiṇṇaṁ
yahimanuvicari rājā
parikiṇṇo itthāgārehi.
Idamassa kūṭāgāraṁ
sovaṇṇapupphamālyavītikiṇṇaṁ
yahimanuvicari rājā
parikiṇṇo ñātisaṅghena.
Ayamassa asokavanikā
supupphitā sabbakālikā rammā
yahimanuvicari rājā
Parikiṇṇo itthāgārehi.
Ayamassa asokavanikā
supupphitā sabbakālikā rammā
yahimanuvicari rājā
parikiṇṇo ñātisaṅghena.
Idamassa uyyānaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo itthāgārehi.
Idamassa uyyānaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo ñātisaṅghena.
Idamassa kaṇikāravanaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo itthāgārehi.
Idamassa kaṇikāravanaṁ
supupphitaṁ sabbakālikaṁ rammaṁ
yahimanuvicari rājā
Parikiṇṇo ñātisaṅghena.
Idamassa pāṭalivanaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo itthāgārehi.
Idamassa pāṭalivanaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo ñātisaṅghena.
Idamassa ambavanaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo itthāgārehi.
Idamassa ambavanaṁ
supupphitaṁ sabbakālikaṁ rammaṁ
yahimanuvicari rājā
parikiṇṇo ñātisaṅghena.
Ayamassa pokkharaṇī
sañchannā aṇḍajehi vītikiṇṇā
yahimanuvicari rājā
Parikiṇṇo itthāgārehi.
Ayamassa pokkharaṇī
sañchannā aṇḍajehi vītikiṇṇā
yahimanuvicari rājā
parikiṇṇo ñātisaṅghena.

[2548] Rājā kho 1 pabbajito sutasomo
rajjaṁ imaṁ pahantvāna
kāsāyavatthavasano
nāgova ekako 2 carati.

[2549] Māssu pubbe ratikīḷitāni
hasitāni anussarittha 3
mā vo kāmā haniṁsu
surammañhi 4 sudassanaṁ nagaraṁ
mettacittañca bhāvetha
appamāṇaṁ divā ca ratto ca
atha gacchittha 5 devapuraṁ
āvāsaṁ puññakamminanti 6 .
Cullasutasomajātakaṁ pañcamaṁ.
---------
1 Ma. rājā vo kho. 2 Sī. ekakova. 3 Yu. anussarittho. 4 Ma. rammaṁ hi.
5 Ma. agacchittha. 6 Yu. puññakammānanti.
Tassuddānaṁ
suvapaṇḍitajambuka kuṇḍalino
varakaññamalambusajātakaṁ ca
pavaruttamasaṅkhasirīvhayako
sutasomārindamarājavaro.
Cattālīsanipātaṁ niṭṭhitaṁ.

Suttantapiṭake khuddakanikāyassa jātakaṁ
dutiyo bhāgo
---------
paññāsanipātaṁ
1 naḷinikājātakaṁ

[1] Uddayhate 1 janapado raṭṭhañcāpi vinassati
ehi naḷinike gaccha taṁ me brāhmaṇamānaya.

[2] Nāhaṁ dukkhakkhamā rāja nāhaṁ addhānakovidā
kathaṁ ahaṁ gamissāmi vanaṁ kuñjarasevitaṁ.

[3] Phītaṁ janapadaṁ gantvā hatthinā ca rathena ca
dārusaṅghāṭayānena evaṁ gaccha naḷinike.
Hatthī assā rathā 2 pattī gacchevādāya khattiye
taveva vaṇṇarūpena vasaṁ tamānayissasi.

[4] Kadaliddhajapaññāṇo ābhujiparivārito
eso padissati rammo isisiṅgassa assamo.
Eso aggissa saṅkhāto eso dhūmo padissati
maññe no aggiṁ hāpeti isisiṅgo mahiddhiko.
1 Sī. Yu. uḍḍayhate. 2 Ma. hatthiassarathe.

[5] Tañca disvāna āyantiṁ āmuttamaṇikuṇḍalaṁ
isisiṅgo pāvisi bhīto assamaṁ paṇṇachādanaṁ.
Assamassa ca sā dvāre geṇḍukenassa kīḷati
vidaṁsayantī aṅgāni guyhaṁ pakāsitāni ca.
Tañca disvāna kīḷantiṁ paṇṇasālagato jaṭī
assamā nikkhamitvāna idaṁ vacanamabravi.

[6] Ambho ko nāma so rukkho yassa tevaṁ gataṁ phalaṁ
dūrepi khittaṁ pacceti na taṁ ohāya gacchati.