[2197] Anukampasi nāgakulaṁ janinda
mātā yathā suppiyamekaputtaṁ
ahañca te nāgakulena saddhiṁ
kāhāmi veyyāvaṭikaṁ uḷāraṁ.

[2198] Yojentu ve rājarathe sucitte
kambojake assatare sudante
nāge ca yojentu suvaṇṇakappane
dakkhemu nāgassa nivesanāni.

[2199] Bherī mudiṅgā paṇavā ca saṅkhā
āvajjayiṁsu uggasenarañño
pāyāsi rājā bahu sobhamāno
purakkhato nārigaṇassa majjhe.
1 Ma. gimhesu.

[2200] Suvaṇṇacittakaṁ bhūmiṁ addakkhi kāsivaḍḍhano
sovaṇṇamaye ca pāsāde veḷuriyaphalakatthate.
Sa rājā pāvisi byamhaṁ campeyyassa nivesanaṁ
ādiccavaṇṇasannibhaṁ kaṁsavijjupabhassaraṁ.
Nānārukkhehi sañchannaṁ nānāgandhasamīritaṁ
so pāvekkhi kāsirājā campeyyassa nivesanaṁ.
Paviṭṭhasmiṁ kāsiraññe campeyyassa nivesane
dibbā turiyā pavajjiṁsu nāgakaññā ca naccisuṁ 1 .
Taṁ nāgakaññā caritaṁ gaṇena
anvāruhi kāsirājā pasanno
nisīdi sovaṇṇamayamhi pīṭhe
sāpassaye candanasāralitte.

[2201] So tattha bhutvā ca atho ramitvā
campeyyakaṁ kāsirājā avoca
vimānaseṭṭhāni imāni tuyhaṁ
ādiccavaṇṇāni pabhassarāni
netādisaṁ atthi manussaloke
kimatthiyaṁ 2 nāga tapo karosi.
Tā kambukāyūradharā suvatthā
vaṭṭaṅgulī tambatalūpapannā
1 Sī. Yu. naccayuṁ. 2 Ma. kiṁ patthayaṁ. evamuparipi.
Paggayha pāyenti anomavaṇṇā
netādisaṁ atthi manussaloke
kimatthiyaṁ nāga tapo karosi.
Najjo ca temā puthulomamacchā
ādāsakuntābhirudā sutitthā
netādisaṁ atthi manussaloke
kimatthiyaṁ nāga tapo karosi.
Koñcā mayūrā diviyā ca haṁsā
vaggussarā kokilā sampatanti
netādisaṁ atthi manussaloke
kimatthiyaṁ nāga tapo karosi.
Ambā ca sālā tilakā ca jambuyo
uddālakā pāṭaliyo ca phullā
netādisaṁ atthi manussaloke
kimatthiyaṁ nāga tapo karosi.
Imā ca te pokkharaññā samantato
dibyā ca gandhā satataṁ sampavāyanti
netādisaṁ atthi manussaloke
kimatthiyaṁ nāga tapo karosi.

[2202] Na puttahetu na dhanassa hetu
Na āyuno cāpi janinda hetu
manussayoniṁ abhipatthayāno
tasmā parakkamma tapo karomi.

[2203] Tvaṁ lohitakkho vihatantaraṁso
alaṅkato kappitakesamassu
surosito lohitacandanena
gandhabbarājāva disā pabhāsasi.
Deviddhipattosi mahānubhāvo
sabbehi kāmehi samaṅgibhūto
pucchāmi taṁ nāgarājetamatthaṁ
seyyo ito kena manussaloko.

[2204] Janinda nāññatra manussalokā
suddhī va saṁvijjati saṁyamo vā
ahañca laddhāna manussayoniṁ
kāmāmi jātimaraṇassa antaṁ.

[2205] Addhā have sevitabbā sapaññā
bahussutā ye bahuṭhānacintino
nāriyo ca disvāna tuvañca nāga
kāhāmi puññāni anappakāni.

[2206] Addhā have sevitabbā sapaññā
Bahussutā ye bahuṭhānacintino
nāriyo ca disvāna mamañca rāja
karohi puññāni anappakāni.