[2167] Sāyañca pāto udakaṁ sajāti
aggiṁ sadā paricaratappamatto
taṁ tādisaṁ saṁyataṁ brahmacāriṁ
tasmā tuvaṁ brūsi gahappatīti.

[2168] Tālā ca mūlā ca phalā ca deva
pariggahā vividhā santimassa
te rakkhati gopayatappamatto
tasmā ahaṁ brūmi gahappatīti 2 .

[2169] Saccaṁ kho etaṁ vadasi kumāra
pariggahā vividhā santimassa
te rakkhati gopayatappamatto
1 Sī. Yu. jīvaṁ panetvā. 2 Sī. Yu. brāhmaṇo gahapati tena hoti.
[1]- Brāhmaṇo gahapati tena hoti.

[2170] Suṇantu mayhaṁ parisā samāgatā
sanegamā jānapadā ca sabbe
bālāyaṁ bālassa vaco nisamma
ahetunā ghātayate maṁ janindo.

[2171] Daḷhasmi mūle visate virūḷhe
dunnikkhayo veḷu pasākhajāto
vandāmi pādāni tava janinda
anujāna maṁ pabbajissāmi deva.

[2172] Bhuñjassu bhoge vipule kumāra
sabbañca te issariyaṁ dadāmi
ajjeva tvaṁ kurūnaṁ hohi rājā
mā pabbaji pabbajjā hi dukkhā.

[2173] Kinnūdha deva tavamatthi bhogā
pubbevahaṁ devaloke ramissaṁ
rūpehi saddehi atho rasehi
gandhehi phassehi manoramehi.
Bhuttā ca me bhogā tidivasmiṁ deva
parivārito accharāsaṁ 2 gaṇena
tuvañca bālaṁ paraneyyaṁ viditvā
1 Ma. sa. 2 Ma. parivāritā accharānaṁ.
Na tādise rājakule vaseyyaṁ.

[2174] Sacāhaṁ bālo paraneyyo asmi
ekāparādhaṁ khama putta mayhaṁ
punapi ce edisakaṁ bhaveyya
yathāmatiṁ somanassa karohi.

[2175] Anisamma kataṁ kammaṁ anavatthāya cintitaṁ
bhesajjasseva vebhaṅgo vipāko hoti pāpako.
Nisamma ca kataṁ kammaṁ sammāvatthāya cintitaṁ
bhesajjasseva sampatti vipāko hoti bhadrako.
Alaso gihī kāmabhogī na sādhu
asaññato pabbajito na sādhu
rājā na sādhu anisammakārī
yo paṇḍito kodhano taṁ na sādhu.
Nisamma khattiyo kayirā nānisamma disampati
nisammakārino rāja yaso kitti ca vaḍḍhati.
Nisamma daṇḍaṁ paṇayeyya issaro
vegā kataṁ tappati bhūmipāla
sammāpaṇidhī ca narassa atthā
anānutappā te bhavanti pacchā.
Anānutappāni hi ye karonti
Vibhajja kammāyatanāni loke
viññūpasatthāni sukhudrayāni
bhavanti buddhānumatāni 1 tāni.
Āgacchuṁ dovārikā khaggabandhā
kāsāviyā hantuṁ 2 mamaṁ janinda
mātu ca aṅkasmimahaṁ nisinno
ākaḍḍhito sahasā tehi deva.
Kaṭukaṁ hi sambādhaṁ sukicchaṁ patto
madhuraṁ piyaṁ 3 jīvitaṁ laddhaṁ rāja
kicchenāhaṁ ajja vadhāya mutto
pabbajjamevābhimanohamasmi.

[2176] Putto tavāyaṁ taruṇo sudhamme
anukampako somanasso kumāro
taṁ yācamāno na labhāmi svajja 4
arahasi naṁ yācitave tuvampi.