[1777] Dūte te brahme pāhesiṁ gaṅgātīrasmi jhāyato
tesaṁ puṭṭho na byākāsi dukkhaṁ tuyhaṁ mataṁ 1 nu te.

[1778] Sace te dukkhamuppajje kāsīnaṁ raṭṭhavaḍḍhana
mā kho naṁ tassa akkhāhi yo taṁ dukkhā na mocaye.

[1779] Yo tassa 2 dukkhajātassa ekaṅgamapi bhāgaso 3
vippamoceyya dhammena kāmaṁ tassa pavedaya 4 .

[1780] Suvijānaṁ sigālānaṁ sakuntānañca 5 vassitaṁ.
Manussavassitaṁ rāja dubbijānataraṁ tato.

[1781] Api ce maññatī poso ñāti mitto sakhāti vā
yo pubbe sumano hutvā pacchā sampajjate diso.

[1782] Yo attano dukkhamanānupuṭṭho
pavedaye jantu akālarūpe
anandino 6 tassa bhavanti mittā 7
hitesino tassa dukkhī bhavanti.

[1783] Kālañca ñatvāna tathāvidhassa
medhāvinaṁ ekamanaṁ viditvā
akkheyya tippāni 8 parassa dhīro
saṇhaṁ giraṁ atthavatiṁ pamuñce.
1 Ma. guyhamataṁ. Sī. guyhaṁ mataṁ. 2 Yu. yo ca tathā. 3 Sī. Yu. ekantamapi
bhāsato. 4 Sī. pavedaye. 5 Ma. sakuṇānañca. 6 Ma. ānandino. 7 Sī. Yu.
bhavantamittā. 8 Ma. tibbāni.

[1784] Sace ca jaññā avisayhamattano
na tehi mayhaṁ sukhāgamāya 1
ekova tippāni saheyya dhīro
saccaṁ hirottappamapekkhamāno.

[1785] Ahaṁ raṭṭhāni vicaranto nigame rājadhāniyo
bhikkhamāno mahārāja ācariyassa dhanatthiko.

[1786] Gahapatī rājapurise mahāsāle ca brāhmaṇe
alatthaṁ satta nikkhāni suvaṇṇassa janādhipa
te me naṭṭhā mahārāja tasmā socāmahaṁ bhusaṁ.