[160] Tena kho pana samayena sambahulā bhikkhū saṁvidahitvā agamaṁsu
bhaṇḍaṁ avaharissāmāti. Eko bhaṇḍaṁ avahari. Te evamāhaṁsu
na mayaṁ pārājikā yo avahaṭo so pārājikoti. Bhagavato
etamatthaṁ ārocesuṁ. Āpattiṁ tumhe bhikkhave āpannā pārājikanti.
Tena kho pana samayena sambahulā bhikkhū saṁvidahitvā bhaṇḍaṁ avaharitvā
Bhājesuṁ. Tehi bhājiyamāne ekamekassa paṭiviso na pañcamāsako
pūri. Te evamāhaṁsu na mayaṁ pārājikāti. Bhagavato etamatthaṁ
ārocesuṁ. Āpattiṁ tumhe bhikkhave āpannā pārājikanti.

[161] Tena kho pana samayena aññataro bhikkhu sāvatthiyaṁ dubbhikkhe
āpaṇikassa taṇḍulamuṭṭhiṁ theyyacitto avahari. Tassa kukkuccaṁ ahosi
.pe. Āpattiṁ tvaṁ bhikkhu āpanno pārājikanti. Tena kho pana
samayena aññataro bhikkhu sāvatthiyaṁ dubbhikkhe āpaṇikassa muggamuṭṭhiṁ
.pe. Māsamuṭṭhiṁ .pe. Tilamuṭṭhiṁ theyyacitto avahari. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.

[162] Tena kho pana samayena sāvatthiyaṁ andhavane corakā gāviṁ
hantvā maṁsaṁ khāditvā sesakaṁ paṭisāmetvā agamaṁsu. Bhikkhū
paṁsukūlasaññino paṭiggahāpetvā paribhuñjiṁsu. Corakā te bhikkhū
codesuṁ assamaṇāttha tumheti. Tesaṁ kukkuccaṁ ahosi .pe.
Anāpatti bhikkhave paṁsukūlasaññissāti. Tena kho pana samayena
sāvatthiyaṁ andhavane corakā sūkaraṁ hantvā maṁsaṁ khāditvā sesakaṁ
paṭisāmetvā agamaṁsu. Bhikkhū paṁsukūlasaññino paṭiggahāpetvā
paribhuñjiṁsu. Corakā te bhikkhū codesuṁ assamaṇāttha tumheti.
Tesaṁ kukkuccaṁ ahosi .pe. Anāpatti bhikkhave paṁsukūlasaññissāti.

[163] Tena kho pana samayena aññataro bhikkhu tiṇakkhettaṁ gantvā
lutaṁ tiṇaṁ pañcamāsagghanakaṁ theyyacitto avahari. Tassa kukkuccaṁ
Ahosi .pe. Āpattiṁ tvaṁ bhikkhu āpanno pārājikanti.

[164] Tena kho pana samayena aññataro bhikkhu tiṇakkhettaṁ gantvā
tiṇaṁ lāyitvā pañcamāsagghanakaṁ theyyacitto avahari. Tassa kukkuccaṁ
ahosi .pe. Āpattiṁ tvaṁ bhikkhu āpanno pārājikanti.

[165] Tena kho pana samayena āgantukā bhikkhū saṅghassa ambaṁ
bhājāpetvā paribhuñjiṁsu. Āvāsikā bhikkhū te bhikkhū codesuṁ
assamaṇāttha tumheti. Tesaṁ kukkuccaṁ ahosi. Bhagavato etamatthaṁ
ārocesuṁ. Kiṁcittā tumhe bhikkhaveti. Paribhogatthāya mayaṁ
bhagavāti. Anāpatti bhikkhave paribhogatthāyāti. Tena kho pana
samayena āgantukā bhikkhū saṅghassa jambuṁ .pe. Saṅghassa labujaṁ .pe.
Saṅghassa panasaṁ .pe. Saṅghassa tālapakkaṁ .pe. Saṅghassa
ucchuṁ .pe. Saṅghassa timbarūsakaṁ bhājāpetvā paribhuñjiṁsu.
Āvāsikā bhikkhū te bhikkhū codesuṁ assamaṇāttha tumheti.
Tesaṁ kukkuccaṁ ahosi .pe. Anāpatti bhikkhave paribhogatthāyāti.

[166] Tena kho pana samayena ambapālakā bhikkhūnaṁ ambaphalaṁ
denti. Bhikkhū gopetuṁ ime issarā nayime dātunti kukkuccāyantā
na paṭiggaṇhanti. Bhagavato etamatthaṁ ārocesuṁ. Anāpatti bhikkhave
gopakassa dāneti. Tena kho pana samayena jambupālakā .pe.
Labujapālakā .pe. Panasapālakā .pe. Tālapakkapālakā .pe.
Ucchupālakā .pe. Timbarūsakapālakā bhikkhūnaṁ timbarūsake denti.
Bhikkhū gopetuṁ ime issarā nayime dātunti kukkuccāyantā na
paṭiggaṇhanti. Bhagavato etamatthaṁ ārocesuṁ. Anāpatti bhikkhave
gopakassa dāneti.

[167] Tena kho pana samayena aññataro bhikkhu saṅghassa dāruṁ
tāvakālikaṁ haritvā attano vihārassa kuḍḍaṁ upatthambhesi. Bhikkhū
taṁ bhikkhuṁ codesuṁ assamaṇosi tvanti. Tassa kukkuccaṁ ahosi.
Bhagavato etamatthaṁ ārocesi. Kiṁcitto tvaṁ bhikkhūti. Tāvakāliko
ahaṁ bhagavāti. Anāpatti bhikkhu tāvakāliketi.

[168] Tena kho pana samayena aññataro bhikkhu saṅghassa udakaṁ
theyyacitto avahari .pe. Saṅghassa mattikaṁ theyyacitto avahari .pe.
Saṅghassa muñjakatiṇaṁ 1 theyyacitto avahari. Tassa kukkuccaṁ ahosi
.pe. Āpattiṁ tvaṁ bhikkhu āpanno pārājikanti. Tena kho pana
samayena aññataro bhikkhu saṅghassa muñjakatiṇaṁ theyyacitto jhāpesi.
Tassa kukkuccaṁ ahosi .pe. Anāpatti bhikkhu pārājikassa āpatti
dukkaṭassāti.

[169] Tena kho pana samayena aññataro bhikkhu saṅghassa mañcaṁ
theyyacitto avahari. Tassa kukkuccaṁ ahosi .pe. Āpattiṁ tvaṁ
bhikkhu āpanno pārājikanti. Tena kho pana samayena aññataro
bhikkhu saṅghassa pīṭhaṁ .pe. Saṅghassa bhisiṁ .pe. Saṅghassa bimbohanaṁ
1 Yu. Ma. puñjakitaṁ tiṇaṁ.
.pe. Saṅghassa kavāṭaṁ .pe. Saṅghassa ālokasandhiṁ .pe. Saṅghassa
gopānasiṁ theyyacitto avahari. Tassa kukkuccaṁ ahosi .pe.
Āpattiṁ tvaṁ bhikkhu āpanno pārājikanti.