[140] Tena kho pana samayena aññataro bhikkhu divā parikkhāraṁ
passitvā nimittaṁ akāsi rattiṁ avaharissāmīti. So taṁ maññamāno
taṁ avahari .pe. Taṁ maññamāno aññaṁ avahari .pe. Aññaṁ
maññamāno taṁ avahari .pe. Aññaṁ maññamāno aññaṁ avahari.
Tassa kukkuccaṁ ahosi .pe. Āpattiṁ tvaṁ bhikkhu āpanno
pārājikanti. Tena kho pana samayena aññataro bhikkhu divā
parikkhāraṁ passitvā nimittaṁ akāsi rattiṁ avaharissāmīti. So
taṁ 1 maññamāno attano parikkhāraṁ avahari. Tassa kukkuccaṁ
ahosi .pe. Anāpatti bhikkhu pārājikassa āpatti dukkaṭassāti.

[141] Tena kho pana samayena aññataro bhikkhu pīṭhe 2 thavikaṁ
passitvā ito gaṇhanto pārājiko bhavissāmīti saha pīṭhakena
saṅkāmetvā aggahesi. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti.

[142] Tena kho pana samayena aññataro bhikkhu saṅghassa bhisiṁ
theyyacitto avahari. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti.

[143] Tena kho pana samayena aññataro bhikkhu cīvaravaṁse cīvaraṁ
1 Yu. Ma. aññaṁ. 2 Yu. Ma. pīṭhe ṭhapitaṁ.
Theyyacitto avahari. Tassa kukkuccaṁ ahosi .pe. Āpattiṁ
tvaṁ bhikkhu āpanno pārājikanti.

[144] Tena kho pana samayena aññataro bhikkhu vihāre cīvaraṁ
avaharitvā ito nikkhamanto pārājiko bhavissāmīti vihārā na
nikkhami. Bhagavato etamatthaṁ ārocesuṁ. Nikkhameyya vā so
bhikkhave moghapuriso na vā nikkhameyya āpatti pārājikassāti.

[145] Tena kho pana samayena dve bhikkhū sahāyakā honti
eko 1 gāmaṁ piṇḍāya pāvisi dutiyo 2 saṅghassa khādanīye bhājiyamāne
sahāyakassa bhāgaṁ gahetvā tassa vissāsanto paribhuñji. So
jānitvā taṁ codesi assamaṇosi tvanti. Tassa kukkuccaṁ ahosi
.pe. Kiṁcitto tvaṁ bhikkhūti. Vissāsagāho ahaṁ bhagavāti.
Anāpatti bhikkhu vissāsagāheti.

[146] Tena kho pana samayena sambahulā bhikkhū cīvarakammaṁ
karonti. Saṅghassa khādanīye bhājiyamāne sabbesaṁ paṭivisā āharitvā
upanikkhittā honti. Aññataro bhikkhu aññatarassa bhikkhuno
paṭivisaṁ attano maññamāno paribhuñji. So jānitvā taṁ codesi
assamaṇosi tvanti. Tassa kukkuccaṁ ahosi .pe. Anāpatti
bhikkhu sakasaññissāti 3 . Tena kho pana samayena sambahulā bhikkhū
1 Yu. eko bhikkhu. 2 sabbattha dutiyo bhikkhūti āgataṁ. 3 Yu.
Ma. sasaññissāti.
Cīvarakammaṁ karonti. Saṅghassa khādanīye bhājiyamāne aññatarassa
bhikkhuno pattena aññatarassa bhikkhuno paṭiviso āharitvā upanikkhitto
hoti. Pattasāmiko bhikkhu attano maññamāno paribhuñji. So
jānitvā taṁ codesi assamaṇosi tvanti. Tassa kukkuccaṁ
ahosi .pe. Anāpatti bhikkhu sakasaññissāti.

[147] Tena kho pana samayena ambacorakā ambaṁ pātetvā
bhaṇḍikaṁ ādāya agamaṁsu. Sāmikā te corake anubandhiṁsu. Corakā
sāmike passitvā bhaṇḍikaṁ pātetvā palāyiṁsu. Bhikkhū taṁ
paṁsukūlasaññino paṭiggahāpetvā paribhuñjiṁsu. Sāmikā te bhikkhū
codesuṁ assamaṇāttha tumheti. Tesaṁ kukkuccaṁ ahosi. Bhagavato
etamatthaṁ ārocesuṁ. Kiṁcittā tumhe bhikkhaveti. Paṁsukūlasaññino
mayaṁ bhagavāti. Anāpatti bhikkhave paṁsukūlasaññissāti. Tena kho
pana samayena jambucorakā .pe. Labujacorakā .pe. Panasacorakā
.pe. Tālapakkacorakā .pe. Ucchucorakā .pe. Timbarūsakacorakā
timbarūsake uccinitvā bhaṇḍikaṁ ādāya agamaṁsu. Sāmikā te
corake anubandhiṁsu. Corakā sāmike passitvā bhaṇḍikaṁ pātetvā
palāyiṁsu. Bhikkhū taṁ paṁsukūlasaññino paṭiggahāpetvā paribhuñjiṁsu.
Sāmikā te bhikkhū codesuṁ assamaṇāttha tumheti. Tesaṁ
kukkuccaṁ ahosi .pe. Anāpatti bhikkhave paṁsukūlasaññissāti.

[148] Tena kho pana samayena ambacorakā ambaṁ pātetvā
Bhaṇḍikaṁ ādāya agamaṁsu. Sāmikā te corake anubandhiṁsu.
Corakā sāmike passitvā bhaṇḍikaṁ pātetvā palāyiṁsu. Bhikkhū pure
sāmikā passantīti theyyacittā paribhuñjiṁsu. Sāmikā te bhikkhū
codesuṁ assamaṇāttha tumheti. Tesaṁ kukkuccaṁ ahosi .pe.
Āpattiṁ tumhe bhikkhave āpannā pārājikanti. Tena kho pana
samayena jambucorakā .pe. Labujacorakā .pe. Panasacorakā
.pe. Tālapakkacorakā .pe. Ucchucorakā .pe. Timbarūsakacorakā
timbarūsake uccinitvā bhaṇḍikaṁ ādāya agamaṁsu. Sāmikā te
corake anubandhiṁsu. Corakā sāmike passitvā bhaṇḍikaṁ pātetvā
palāyiṁsu. Bhikkhū pure sāmikā passantīti theyyacittā paribhuñjiṁsu.
Sāmikā te bhikkhū codesuṁ assamaṇāttha tumheti. Tesaṁ kukkuccaṁ
ahosi .pe. Āpattiṁ tumhe bhikkhave āpannā pārājikanti.

[149] Tena kho pana samayena aññataro bhikkhu saṅghassa ambaṁ
theyyacitto avahari .pe. Saṅghassa jambuṁ .pe. Saṅghassa labujaṁ
.pe. Saṅghassa panasaṁ .pe. Saṅghassa tālapakkaṁ .pe. Saṅghassa
ucchuṁ .pe. Saṅghassa timbarūsakaṁ theyyacitto avahari. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.