[130] Tena kho pana samayena aññataro bhikkhu divā bhaṇḍaṁ
passitvā nimittaṁ akāsi rattiṁ avaharissāmīti. So taṁ maññamāno
taṁ avahari. Tassa kukkuccaṁ ahosi .pe. Āpattiṁ tvaṁ bhikkhu
āpanno pārājikanti .pe. Taṁ maññamāno aññaṁ avahari .pe.
Aññaṁ maññamāno taṁ avahari .pe. Aññaṁ maññamāno aññaṁ
avahari .pe. Tassa kukkuccaṁ ahosi .pe. Āpattiṁ tvaṁ bhikkhu
āpanno pārājikanti. Tena kho pana samayena aññataro bhikkhu
divā bhaṇḍaṁ passitvā nimittaṁ akāsi rattiṁ avaharissāmīti.
So taṁ 1 maññamāno attano bhaṇḍaṁ avahari. Tassa kukkuccaṁ ahosi
.pe. Anāpatti bhikkhu pārājikassa āpatti dukkaṭassāti.

[131] Tena kho pana samayena aññataro bhikkhu aññassa bhaṇḍaṁ
haranto sīse bhāraṁ theyyacitto āmasi .pe. Anāpatti bhikkhu
pārājikassa āpatti dukkaṭassāti .pe. Theyyacitto phandāpesi
.pe. Anāpatti bhikkhu pārājikassa āpatti thullaccayassāti .pe.
Theyyacitto khandhaṁ oropesi .pe. Āpattiṁ tvaṁ bhikkhu āpanno
1 Yu. Ma. aññaṁ.
Pārājikanti .pe. Khandhe bhāraṁ theyyacitto āmasi .pe.
Theyyacitto phandāpesi .pe. Theyyacitto kaṭiṁ oropesi .pe.
Kaṭiyā bhāraṁ theyyacitto āmasi .pe. Theyyacitto phandāpesi
.pe. Theyyacitto hatthena aggahesi .pe. Hatthe bhāraṁ theyyacitto
bhūmiyaṁ nikkhipi .pe. Theyyacitto bhūmito aggahesi. Tassa kukkuccaṁ
ahosi .pe. Āpattiṁ tvaṁ bhikkhu āpanno pārājikanti.

[132] Tena kho pana samayena aññataro bhikkhu ajjhokāse cīvaraṁ
pattharitvā vihāraṁ pāvisi. Aññataro bhikkhu māyidaṁ cīvaraṁ nassīti
paṭisāmesi. So nikkhamitvā taṁ bhikkhuṁ pucchi āvuso mayhaṁ
cīvaraṁ kena avahaṭanti. So evamāha mayā avahaṭanti. So
taṁ ādiyi assamaṇosi tvanti. Tassa kukkuccaṁ ahosi .pe.
Kiṁcitto tvaṁ bhikkhūti. Niruttipatho ahaṁ bhagavāti. Anāpatti bhikkhu
niruttipatheti. Tena kho pana samayena aññataro bhikkhu pīṭhe cīvaraṁ
nikkhipitvā .pe. Pīṭhe nisīdanaṁ nikkhipitvā .pe. Heṭṭhāpīṭhe
pattaṁ nikkhipitvā vihāraṁ pāvisi. Aññataro bhikkhu māyaṁ patto
nassīti paṭisāmesi. So nikkhamitvā taṁ bhikkhuṁ pucchi āvuso
mayhaṁ patto kena avahaṭoti. So evamāha mayā avahaṭoti.
So taṁ ādiyi assamaṇosi tvanti. Tassa kukkuccaṁ ahosi .pe.
Anāpatti bhikkhu niruttipatheti. Tena kho pana samayena aññatarā
bhikkhunī vatiyā cīvaraṁ pattharitvā vihāraṁ pāvisi. Aññatarā bhikkhunī
Māyidaṁ cīvaraṁ nassīti paṭisāmesi. Sā nikkhamitvā taṁ bhikkhuniṁ
pucchi ayye mayhaṁ cīvaraṁ kena avahaṭanti. Sā evamāha mayā
avahaṭanti. Sā taṁ ādiyi assamaṇīsi tvanti. Tassā kukkuccaṁ
ahosi. Athakho sā bhikkhunī bhikkhunīnaṁ etamatthaṁ ārocesi.
Bhikkhuniyo bhikkhūnaṁ etamatthaṁ ārocesuṁ. Bhikkhū bhagavato etamatthaṁ
ārocesuṁ. Anāpatti bhikkhave niruttipatheti.

[133] Tena kho pana samayena aññataro bhikkhu vātamaṇḍalikāya
ukkhittaṁ sāṭakaṁ passitvā sāmikānaṁ dassāmīti aggahesi. Sāmikā
taṁ bhikkhuṁ codesuṁ assamaṇosi tvanti. Tassa kukkuccaṁ ahosi
.pe. Kiṁcitto tvaṁ bhikkhūti. Atheyyacitto ahaṁ bhagavāti.
Anāpatti bhikkhu atheyyacittassāti. Tena kho pana samayena
aññataro bhikkhu vātamaṇḍalikāya ukkhittaṁ veṭhanaṁ pure sāmikā
passantīti theyyacitto aggahesi. Sāmikā taṁ bhikkhuṁ codesuṁ
assamaṇosi tvanti. Tassa kukkuccaṁ ahosi .pe. Kiṁcitto
tvaṁ bhikkhūti. Theyyacitto ahaṁ bhagavāti. Āpattiṁ tvaṁ bhikkhu
āpanno pārājikanti.

[134] Tena kho pana samayena aññataro bhikkhu susānaṁ
gantvā abhinne sarīre paṁsukūlaṁ aggahesi. Tasmiṁ ca sarīre
peto adhivattho hoti. Athakho so peto taṁ bhikkhuṁ etadavoca
mā bhante mayhaṁ sāṭakaṁ aggahesīti. So bhikkhu anādiyanto
Aggahesi 1 . Athakho taṁ sarīraṁ uṭṭhahitvā tassa bhikkhuno piṭṭhito
piṭṭhito anubandhi. Athakho so bhikkhu vihāraṁ pavisitvā dvāraṁ
thakesi. Athakho taṁ sarīraṁ tattheva paripati. Tassa kukkuccaṁ
ahosi .pe. Anāpatti bhikkhu pārājikassa na ca bhikkhave
abhinne sarīre paṁsukūlaṁ gahetabbaṁ yo gaṇheyya āpatti
dukkaṭassāti.

[135] Tena kho pana samayena aññataro bhikkhu saṅghassa cīvare
bhājiyamāne theyyacitto kusaṁ saṅkāmetvā cīvaraṁ aggahesi. Tassa
kukkuccaṁ ahosi .pe. Āpattiṁ tvaṁ bhikkhu āpanno pārājikanti.

[136] Tena kho pana samayena āyasmā ānando jantāghare
aññatarassa bhikkhuno antaravāsakaṁ attano maññamāno nivāsesi.
Athakho so bhikkhu āyasmantaṁ ānandaṁ etadavoca kissa me tvaṁ
āvuso ānanda antaravāsakaṁ nivāsesīti. Sakasaññī ahaṁ āvusoti.
Bhagavato etamatthaṁ ārocesuṁ. Anāpatti bhikkhave sakasaññissāti.

[137] Tena kho pana samayena sambahulā bhikkhū gijjhakūṭā pabbatā
orohantā sīhavighāsaṁ passitvā pacāpetvā paribhuñjiṁsu. Tesaṁ
kukkuccaṁ ahosi. Bhagavato etamatthaṁ ārocesuṁ. Anāpatti
bhikkhave sīhavighāseti. Tena kho pana samayena sambahulā bhikkhū
gijjhakūṭā pabbatā orohantā byagghavighāsaṁ passitvā .pe.
1 Yu. Ma. agamāsi.
Dīpivighāsaṁ passitvā .pe. Taracchavighāsaṁ passitvā .pe.
Kokavighāsaṁ passitvā pacāpetvā paribhuñjiṁsu. Tesaṁ kukkuccaṁ
ahosi .pe. Anāpatti bhikkhave tiracchānagatapariggaheti.

[138] Tena kho pana samayena aññataro bhikkhu saṅghassa odane
bhājiyamāne aparassa bhāgaṁ dehīti amūlakaṁ aggahesi. Tassa
kukkuccaṁ ahosi .pe. Anāpatti bhikkhu pārājikassa āpatti
sampajānamusāvāde pācittiyassāti. Tena kho pana samayena
aññataro bhikkhu saṅghassa khādanīye bhājiyamāne .pe. Saṅghassa
pūve bhājiyamāne .pe. Saṅghassa ucchumhi bhājiyamāne .pe.
Saṅghassa timbarūsake bhājiyamāne aparassa bhāgaṁ dehīti amūlakaṁ
aggahesi. Tassa kukkuccaṁ ahosi .pe. Anāpatti bhikkhu
pārājikassa āpatti sampajānamusāvāde pācittiyassāti.

[139] Tena kho pana samayena aññataro bhikkhu dubbhikkhe odaniyagharaṁ
pavisitvā pattapūraṁ odanaṁ theyyacitto avahari. Tassa kukkuccaṁ
ahosi .pe. Āpattiṁ tvaṁ bhikkhu āpanno pārājikanti. Tena
kho pana samayena aññataro bhikkhu dubbhikkhe sūnagharaṁ pavisitvā
pattapūraṁ maṁsaṁ theyyacitto avahari. Tassa kukkuccaṁ ahosi .pe.
Āpattiṁ tvaṁ bhikkhu āpanno pārājikanti. Tena kho pana
samayena aññataro bhikkhu dubbhikkhe pūvagharaṁ pavisitvā pattapūraṁ pūvaṁ
theyyacitto avahari .pe. Pattapūrā sakkhaliyo theyyacitto avahari
.pe. Pattapūre modake theyyacitto avahari. Tassa kukkuccaṁ
ahosi .pe. Āpattiṁ tvaṁ bhikkhu āpanno pārājikanti.