[657] Yadā ca sarasampanno buddho dhammaṁ adesayi
atha lābho ca sakkāro titthiyānaṁ ahāyathāti.
Bāverujātakaṁ navamaṁ.
--------
10 Visayhajātakaṁ

[658] Adāsi dānāni pure visayha
dadato ca te khayadhammo ahosi
ito parañce na dadeyya dānaṁ
tiṭṭheyyuṁ te saṁyamantassa bhogā.

[659] Anariyamariyena sahassanetta
suduggatenāpi akiccamāhu
mā vo dhanaṁ taṁ ahu vā janinda 1
yaṁ bhogahetu vijahemu saddhaṁ.

[660] Yena eko ratho yāti yāti tena paro 2 ratho
porāṇaṁ nihitaṁ vattaṁ vattataññeva vāsava 3 .
1 Ma. ahu devarāja. 2 Ma. tenāparo. 3 Sī. porāṇaṁ nihitaṁ vaḍḍhaṁ
vaḍḍhataññeva vāsava.

[661] Yadi hessati dassāma asante kiṁ dadāmhase
evaṁ bhūtāpi dassāma mā dānaṁ pamadāmhaseti.
Visayhajātakaṁ dasamaṁ.
Kokilavaggo catuttho.
---------
Tassuddānaṁ
ativelaṁ pabhāsati 1 jinavaro
vanamajjhe rathesabha jimhagamo
atha jambu tiṇāsanapīṭhavaraṁ
atha taṇḍulaṁ mora visayha dasa.
---------
5 Cullakuṇālavaggo
1 kuṇḍalikajātakaṁ 2

[662] Narānamārāmakarāsu nārīsu
anekacittāsu aniggahāsu ca
sabbattanā pītikarāpi ce siyuṁ 3
na vissase titthasamā hi nāriyo.

[663] Yañca 4 disvā kinnarakinnarīnaṁ 5
sabbitthiyo na ramanti agāre
1 Ma. ativelapabhāsati. 2 Sī. kinnarījātakaṁ. Ma. kaṇḍarījātakaṁ.
3 Ma. sabbattha nāpītikarāpi ce siyā. 4 Ma. yaṁ ve. 5 Ma. kaṇḍarīkinnarānaṁ.
Taṁ tādisaṁ sāmikaṁ 1 cajitvā bhariyā
aññaṁ disvā purisaṁ pīṭhasappiṁ.

[664] Bakassa ca bāvarikassa 2 rañño
accantakāmānugatassa bhariyā
accācarī baddhavasānugassa 3
kiṁ vā 4 itthī nāticare tadaññaṁ.

[665] Piyaṅgāni 5 sabbalokissarassa
rañño piyā brahmadattassa bhariyā
accācarī baddhavasānugassa 3
taṁ vāpi sā nājjhagā kāmakāminīti.
Kuṇḍalikajātakaṁ paṭhamaṁ.
-----------
2 Vānarajātakaṁ

[666] Asakkhiṁ vata attānaṁ uṭṭhātuṁ udakā thalaṁ
nadānāhaṁ puna tuyhaṁ vasaṁ gacchāmi vārija.