[207] Tañca appañca ucchiṭṭhaṁ tañca kicchena no adā
sohaṁ brāhmaṇajātiko yaṁ bhuttaṁ tampi uggataṁ.

[208] Evaṁ dhammaṁ niraṅkatvā yo adhammena jīvati
satadhammova lābhena laddhenāpi na nandatīti.
Satadhammajātakaṁ navamaṁ.
---------
10 Duddadajātakaṁ

[209] Duddadaṁ dadamānānaṁ dukkaraṁ kammakubbataṁ
asanto nānukubbanti sataṁ dhammo duranvayo.

[210] Tasmā satañca asatañca nānā hoti ito gati
Asanto nirayaṁ yanti santo saggaparāyanāti.
Duddadajātakaṁ dasamaṁ.
Kalyāṇadhammavaggo tatiyo.
----------
Tassuddānaṁ
susamañña migādhibhū māṇavako
vāribahutarūpādiccupaṭṭhānā
sakaḷāya satinduka paṅka puna
satadhamma sududdadakena dasa.
---------
4 Asadisavaggo
1 asadisajātakaṁ

[211] Dhanuggaho asadiso rājaputto mahabbalo
dūre pātī akkhaṇavedhī mahākāyappadālano.

[212] Sabbāmitte raṇaṁ katvā na ca kiñci viheṭhayi
bhātaraṁ sotthiṁ katvāna saññamaṁ ajjhupāgamīti.
Asadisajātakaṁ paṭhamaṁ.
---------
2 Saṅgāmāvacarajātakaṁ

[213] Saṅgāmāvacaro sūro balavā iti vissuto
Kinnu toraṇamāsajja paṭikkamasi kuñjara.

[214] Omadda khippaṁ palīghaṁ esikāni ca ubbaha 1
toraṇāni ca madditvā khippaṁ pavisa kuñjarāti.
Saṅgāmāvacarajātakaṁ dutiyaṁ.
----------
3 Vālodakajātakaṁ

[215] Vālodakaṁ apparasaṁ nihīnaṁ
pitvā mado jāyati gadrabhānaṁ
imañca pitvāna rasaṁ paṇītaṁ
mado na sañjāyati sindhavānaṁ.

[216] Appampivitvāna nihīnajacco
so majjatī tena janinda phuṭṭho 2
dhorayhasīlī ca kulamhi jāto
na majjatī aggarasaṁ pivitvāti.
Vālodakajātakaṁ tatiyaṁ.
---------
4 Giridattajātakaṁ