[75] Pañcime bhikkhave yodhājīvā santo saṁvijjamānā lokasmiṁ
katame pañca idha bhikkhave ekacco yodhājīvo rajaggaññeva disvā
saṁsīdati visīdati na santhambhati na sakkoti saṅgāmaṁ otarituṁ evarūpopi
bhikkhave idhekacco yodhājīvo hoti ayaṁ bhikkhave paṭhamo
yodhājīvo santo saṁvijjamāno lokasmiṁ. Puna caparaṁ bhikkhave
idhekacco yodhājīvo sahati rajaggaṁ apica kho dhajaggaññeva disvā
1 Ma. Yu. etthantare bhikkhūti atthi.
Saṁsīdati visīdati na santhambhati na sakkoti saṅgāmaṁ otarituṁ evarūpopi
bhikkhave idhekacco yodhājīvo hoti ayaṁ bhikkhave dutiyo
yodhājīvo santo saṁvijjamāno lokasmiṁ. Puna caparaṁ bhikkhave
idhekacco yodhājīvo sahati rajaggaṁ sahati dhajaggaṁ apica kho
ussāraṇaññeva 1 sutvā saṁsīdati visīdati na santhambhati na sakkoti saṅgāmaṁ
otarituṁ evarūpopi bhikkhave idhekacco yodhājīvo hoti ayaṁ
bhikkhave tatiyo yodhājīvo santo saṁvijjamāno sokasmiṁ. Puna caparaṁ
bhikkhave idhekacco yodhājīvo sahati rajaggaṁ sahati dhajaggaṁ sahati
ussāraṇaṁ apica kho sampahāre haññati byāpajjati evarūpopi
bhikkhave idhekacco yodhājīvo hoti ayaṁ bhikkhave catuttho
yodhājīvo santo saṁvijjamāno lokasmiṁ. Puna caparaṁ bhikkhave idhekacco
yodhājīvo sahati rajaggaṁ sahati dhajaggaṁ sahati ussāraṇaṁ sahati
sampahāraṁ so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ
ajjhāvasati evarūpopi bhikkhave idhekacco yodhājīvo hoti
ayaṁ bhikkhave pañcamo yodhājīvo santo saṁvijjamāno lokasmiṁ. Ime
kho bhikkhave pañca yodhājīvā santo saṁvijjamānā lokasmiṁ evameva
kho bhikkhave pañcime yodhājīvūpamā puggalā santo saṁvijjamānā bhikkhūsu
katame pañca idha bhikkhave bhikkhu rajaggaññeva disvā saṁsīdati visīdati
na santhambhati na sakkoti brahmacariyaṁ santānetuṁ 2 sikkhādubbalyaṁ
āvikatvā sikkhaṁ paccakkhāya hīnāyāvattati kimassa rajaggasmiṁ idha
1 Po. ussādanaññeva. Yu. usādanaṁ yeva. 2 Ma. sandhāretuṁ. aparaṁpi īdisameva.
Bhikkhave bhikkhu suṇāti amukasmiṁ nāma gāme vā nigame vā itthī
vā kumārī vā abhirūpā dassanīyā pāsādikā paramāya vaṇṇapokkharatāya
samannāgatāti so taṁ sutvā saṁsīdati visīdati na santhambhati
na sakkoti brahmacariyaṁ santānetuṁ sikkhādubbalyaṁ āvikatvā sikkhaṁ
paccakkhāya hīnāyāvattati idamassa rajaggasmiṁ seyyathāpi so
bhikkhave yodhājīvo rajaggaññeva disvā saṁsīdati visīdati na santhambhati
na sakkoti saṅgāmaṁ otarituṁ tathūpamāhaṁ bhikkhave imaṁ puggalaṁ vadāmi
evarūpopi bhikkhave idhekacco puggalo hoti ayaṁ bhikkhave paṭhamo
yodhājīvūpamo puggalo santo saṁvijjamāno bhikkhūsu. Puna caparaṁ
bhikkhave bhikkhu sahati rajaggaṁ apica kho dhajaggaññeva disvā saṁsīdati
visīdati na santhambhati na sakkoti brahmacariyaṁ santānetuṁ sikkhādubbalyaṁ
āvikatvā sikkhaṁ paccakkhāya hīnāyāvattati kimassa dhajaggasmiṁ
idha bhikkhave bhikkhu naheva kho suṇāti amukasmiṁ nāma gāme vā
nigame vā itthī vā kumārī vā abhirūpā dassanīyā pāsādikā
paramāya vaṇṇapokkharatāya samannāgatāti apica kho sāmaṁ passati
itthiṁ vā kumāriṁ vā abhirūpaṁ dassanīyaṁ pādādikaṁ paramāya vaṇṇapokkharatāya
samannāgataṁ so taṁ disvā saṁsīdati visīdati na santhambhati
na sakkoti brahmacariyaṁ santānetuṁ sikkhādubbalyaṁ āvikatvā sikkhaṁ
paccakkhāya hīnāyāvattati idamassa dhajaggasmiṁ seyyathāpi so
bhikkhave yodhājīvo sahati rajaggaṁ apica kho dhajaggaññeva disvā
Saṁsīdati visīdati na santhambhati na sakkoti saṅgāmaṁ otarituṁ tathūpamāhaṁ
bhikkhave imaṁ puggalaṁ vadāmi evarūpopi bhikkhave idhekacco
puggalo hoti ayaṁ bhikkhave dutiyo yodhājīvūpamo puggalo santo
saṁvijjamāno bhikkhūsu. Puna caparaṁ bhikkhave bhikkhu sahati rajaggaṁ sahati
dhajaggaṁ apica kho ussāraṇaññeva sutvā saṁsīdati visīdati na
santhambhati na sakkoti brahmacariyaṁ santānetuṁ sikkhādubbalyaṁ
āvikatvā sikkhaṁ paccakkhāya hīnāyāvattati kimassa ussāraṇāya idha
bhikkhave bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo
upasaṅkamitvā ohasati 1 ullapati ujjagghati 2 upphaṇḍeti 3 so
mātugāmena ohasiyamāno 1 ullapiyamāno ujjagghiyamāno upphaṇḍiyamāno
saṁsīdati visīdati na santhambhati na sakkoti brahmacariyaṁ santānetuṁ
sikkhādubbalyaṁ āvikatvā sikkhaṁ paccakkhāya hīnāyāvattati idamassa
ussāraṇāya seyyathāpi so bhikkhave yodhājīvo sahati rajaggaṁ sahati
dhajaggaṁ apica kho ussāraṇaññeva sutvā saṁsīdati visīdati na santhambhati
na sakkoti saṅgāmaṁ otarituṁ tathūpamāhaṁ bhikkhave imaṁ puggalaṁ
vadāmi evarūpopi bhikkhave idhekacco puggalo hoti ayaṁ bhikkhave
tatiyo yodhājīvūpamo puggalo santo saṁvijjamāno bhikkhūsu. Puna
caparaṁ bhikkhave bhikkhu sahati rajaggaṁ sahati dhajaggaṁ sahati ussāraṇaṁ
1 Ma. Yu. ... uha.... 2 Yu. ujjhaggeti. 3 Ma. Yu. uppaṇḍeti.
Apica kho sampahāre haññati byāpajjati kimassa sampahārasmiṁ
idha bhikkhave bhikkhuṁ araññagataṁ vā rukkhamūlagataṁ vā suññāgāragataṁ
vā mātugāmo upasaṅkamitvā abhinisīdati abhinipajjati ajjhottharati
so mātugāmena abhinisīdiyamāno abhinipajjiyamāno ajjhotthariyamāno
sikkhaṁ appaccakkhāya dubbalyaṁ anāvikatvā methunaṁ dhammaṁ paṭisevati
idamassa sampahārasmiṁ seyyathāpi so bhikkhave yodhājīvo sahati rajaggaṁ
sahati dhajaggaṁ sahati ussāraṇaṁ apica kho sampahāre haññati
byāpajjati tathūpamāhaṁ bhikkhave imaṁ puggalaṁ vadāmi evarūpopi
bhikkhave idhekacco puggalo hoti ayaṁ bhikkhave catuttho yodhājīvūpamo
puggalo santo saṁvijjamāno bhikkhūsu. Puna caparaṁ bhikkhave
bhikkhu sahati rajaggaṁ sahati dhajaggaṁ sahati ussāraṇaṁ sahati
sampahāraṁ so taṁ saṅgāmaṁ abhivijinitvā vijitasaṅgāmo tameva
saṅgāmasīsaṁ ajjhāvasati kimassa saṅgāmavijayasmiṁ idha bhikkhave bhikkhuṁ
araññagataṁ vā rukkhamūlagataṁ vā suññāgāragataṁ vā mātugāmo
upasaṅkamitvā abhinisīdati abhinipajjati ajjhottharati so mātugāmena
abhinisīdiyamāno abhinipajjiyamāno ajjhotthariyamāno viniveṭhetvā
vinimocetvā yenakāmaṁ pakkamati so vivittaṁ senāsanaṁ bhajati araññaṁ
rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ
so araññagato vā rukkhamūlagato vā suññāgāragato vā
nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ
Upaṭṭhapetvā so abhijjhaṁ loke pahāya vigatābhijjhena cetasā viharati
abhijjhāya cittaṁ parisodheti byāpādapadosaṁ pahāya abyāpannacitto
viharati sabbapāṇabhūtahitānukampī byāpādapadosā cittaṁ parisodheti thīnamiddhaṁ
pahāya vigatathīnamiddho viharati ālokasaññī sato sampajāno
thīnamiddhā cittaṁ parisodheti uddhaccakukkuccaṁ pahāya anuddhato viharati
ajjhattaṁ vūpasantacitto uddhaccakukkuccā cittaṁ parisodheti vicikicchaṁ
pahāya tiṇṇavicikiccho viharati akathaṁkathī kusalesu dhammesu vicikicchāya
cittaṁ parisodheti so ime pañca nīvaraṇe pahāya cetaso upakkilese
paññāya dubbalīkaraṇe vivicceva kāmehi .pe. Catutthaṁ jhānaṁ
upasampajja viharati so evaṁ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
āsavānaṁ khayañāṇāya cittaṁ abhininnāmeti so idaṁ dukkhanti
yathābhūtaṁ pajānāti ayaṁ dukkhasamudayoti yathābhūtaṁ pajānāti ayaṁ
dukkhanirodhoti yathābhūtaṁ pajānāti ayaṁ dukkhanirodhagāminī paṭipadāti
yathābhūtaṁ pajānāti ime āsavāti yathābhūtaṁ pajānāti ayaṁ āsavasamudayoti
yathābhūtaṁ pajānāti ayaṁ āsavanirodhoti yathābhūtaṁ pajānāti
ayaṁ āsavanirodhagāminī paṭipadāti yathābhūtaṁ pajānāti tassa evaṁ
jānato evaṁ passato kāmāsavāpi cittaṁ vimuccati bhavāsavāpi cittaṁ
vimuccati avijjāsavāpi cittaṁ vimuccati vimuttasmiṁ vimuttamiti
ñāṇaṁ hoti khīṇā jāti vusitaṁ brahmacariyaṁ kataṁ karaṇīyaṁ nāparaṁ
Itthattāyāti pajānāti idamassa saṅgāmavijayasmiṁ seyyathāpi so
bhikkhave yodhājīvo sahati rajaggaṁ sahati dhajaggaṁ sahati ussāraṇaṁ
sahati sampahāraṁ so taṁ saṅgāmaṁ abhivijinitvā vijitasaṅgāmo tameva
saṅgāmasīsaṁ ajjhāvasati tathūpamāhaṁ bhikkhave imaṁ puggalaṁ vadāmi
evarūpopi bhikkhave idhekacco puggalo hoti ayaṁ bhikkhave pañcamo
yodhājīvūpamo puggalo santo saṁvijjamāno bhikkhūsu. Ime kho bhikkhave
pañca yodhājīvūpamā puggalā santo saṁvijjamānā bhikkhūsūti.

[76] Pañcime bhikkhave yodhājīvā santo saṁvijjamānā lokasmiṁ
katame pañca idha bhikkhave ekacco yodhājīvo asicammaṁ gahetvā
dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare hananti
pariyāpādenti evarūpopi bhikkhave idhekacco yodhājīvo hoti ayaṁ
bhikkhave paṭhamo yodhājīvo santo saṁvijjamāno lokasmiṁ. Puna caparaṁ
bhikkhave idhekacco yodhājīvo asicammaṁ gahetvā dhanukalāpaṁ sannayhitvā
viyūḷhaṁ saṅgāmaṁ otarati so tasmiṁ saṅgāme ussahati vāyamati
tamenaṁ ussahantaṁ vāyamantaṁ pare upalikkhanti tamenaṁ apanenti
apanetvā ñātakānaṁ nenti so ñātakehi nīyamāno appatvā
ñātake antarāmagge kālaṁ karoti evarūpopi bhikkhave idhekacco
yodhājīvo hoti ayaṁ bhikkhave dutiyo yodhājīvo santo saṁvijjamāno
lokasmiṁ. Puna caparaṁ bhikkhave idhekacco yodhājīvo asicammaṁ gahetvā
Dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare upalikkhanti
tamenaṁ apanenti apanetvā ñātakānaṁ nenti tamenaṁ ñātakā
upaṭṭhahanti paricaranti so ñātakehi upaṭṭhahiyamāno paricariyamāno
teneva ābādhena kālaṁ karoti evarūpopi bhikkhave idhekacco
yodhājīvo hoti ayaṁ bhikkhave tatiyo yodhājīvo santo saṁvijjamāno
lokasmiṁ. Puna caparaṁ bhikkhave idhekacco yodhājīvo asicammaṁ gahetvā
dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare upalikkhanti
tamenaṁ apanenti apanetvā ñātakānaṁ nenti tamenaṁ ñātakā
upaṭṭhahanti paricaranti so ñātakehi upaṭṭhahiyamāno paricariyamāno
vuṭṭhāti tamhā ābādhā evarūpopi bhikkhave idhekacco yodhājīvo
hoti ayaṁ bhikkhave catuttho yodhājīvo santo saṁvijjamāno lokasmiṁ.
Puna caparaṁ bhikkhave idhekacco yodhājīvo asicammaṁ gahetvā dhanukalāpaṁ
sannayhitvā viyūḷhaṁ saṅgāmaṁ otarati so taṁ saṅgāmaṁ abhivijinitvā
vijitasaṅgāmo tameva saṅgāmasīsaṁ ajjhāvasati evarūpopi bhikkhave
idhekacco yodhājīvo hoti ayaṁ bhikkhave pañcamo yodhājīvo santo
saṁvijjamāno lokasmiṁ. Ime kho bhikkhave pañca yodhājīvā santo
saṁvijjamānā lokasmiṁ. Evameva kho bhikkhave pañcime yodhājīvūpamā
puggalā santo saṁvijjamānā bhikkhūsu katame pañca idha bhikkhave
Bhikkhu aññataraṁ gāmaṁ vā nigamaṁ vā unissāya viharati so
pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā
piṇḍāya pavisati arakkhiteneva kāyena arakkhitāya vācāya arakkhitena
cittena anupaṭṭhitāya satiyā asaṁvutehi indriyehi so tattha passati
mātugāmaṁ dunnivatthaṁ vā duppārutaṁ vā tassa [1]- mātugāmaṁ disvā
dunnivatthaṁ vā duppārutaṁ vā rāgo cittaṁ anuddhaṁseti so rāgānuddhaṁsena
cittena sikkhaṁ appaccakkhāya dubbalyaṁ anāvikatvā methunaṁ
dhammaṁ paṭisevati seyyathāpi so bhakkhave yodhājīvo asicammaṁ gahetvā
dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare hananti
pariyāpādenti tathūpamāhaṁ bhikkhave imaṁ puggalaṁ vadāmi evarūpopi
bhikkhave idhekacco puggalo hoti ayaṁ bhikkhave paṭhamo yodhājīvūpamo
puggalo santo saṁvijjamāno bhikkhūsu. Puna caparaṁ bhikkhave bhikkhu
aññataraṁ gāmaṁ vā nigamaṁ vā upanissāya viharati so pubbaṇhasamayaṁ
nivāsetvā pattacīvaramādāya tameva gāmaṁ vā nigamaṁ vā
piṇḍāya pavisati arakkhiteneva kāyena arakkhitāya vācāya arakkhitena cittena
mātugāmaṁ dunnivatthaṁ vā duppārutaṁ vā tassa mātugāmaṁ disvā
dunnivatthaṁ vā duppārutaṁ vā rāgo cittaṁ anuddhaṁseti so rāgānuddhaṁsena
cittena pariḍayhateva kāyena pariḍayhati cetasā tassa
1 Ma. tanti disasti. ito paraṁ īdisameva.
Evaṁ hoti yannūnāhaṁ ārāmaṁ gantvā bhikkhūnaṁ āroceyyaṁ
rāgāyitomhi 1 āvuso rāgapareto na sakkomi brahmacariyaṁ santānetuṁ
sikkhādubbalyaṁ āvikatvā sikkhaṁ paccakkhāya hīnāyāvattissāmīti so
ārāmaṁ gacchanto appatvāva ārāmaṁ antarāmagge sikkhādubbalyaṁ
āvikatvā sikkhaṁ paccakkhāya hīnāyāvattati seyyathāpi so bhikkhave
yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ
otarati so tasmiṁ saṅgāme ussahati vāyamati tamenaṁ ussahantaṁ
vāyamantaṁ pare upalikkhanti tamenaṁ apanenti apanetvā ñātakānaṁ
nenti so ñātakehi nīyamāno appatvāva ñātake antarāmagge
kālaṁ karoti tathūpamāhaṁ bhikkhave imaṁ puggalaṁ vadāmi evarūpopi
bhikkhave idhekacco puggalo hoti ayaṁ bhikkhave dutiyo yodhājīvūpamo
puggalo santo saṁvijjamāno bhikkhūsu. Puna caparaṁ bhikkhave
bhikkhu aññataraṁ gāmaṁ vā nigamaṁ vā upanissāya viharati so
pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ
vā piṇḍāya pavisati arakkhiteneva kāyena arakkhitāya vācāya
arakkhitena cittena anupaṭṭhitāya satiyā asaṁvutehi indriyehi so tattha
passati mātugāmaṁ dunnivatthaṁ vā duppārutaṁ vā tassa mātugāmaṁ
disvā dunnivatthaṁ vā duppārutaṁ vā rāgo cittaṁ anuddhaṁseti so
rāgānuddhaṁsena 2 cittena pariḍayhateva kāyena pariḍayhati cetasā tassa
1 Ma. Yu. rāgapariyuṭṭhitomhi. 2 Ma. rāgānuddhaṁsitena. ito paraṁ īdisameva.
Evaṁ hoti yannūnāhaṁ ārāmaṁ gantvā bhikkhūnaṁ āroceyyaṁ
rāgāyitomhi 1 āvuso rāgapareto na sakkomi brahmacariyaṁ santānetuṁ
sikkhādubbalyaṁ āvikatvā sikkhaṁ paccakkhāya hīnāyāvattissāmīti so
ārāmaṁ gantvā bhikkhūnaṁ āroceti rāgāyitomhi 1 āvuso rāgapareto
na sakkomi brahmacariyaṁ santānetuṁ sikkhādubbalyaṁ āvikatvā sikkhaṁ
paccakkhāya hīnāyāvattissāmīti tamenaṁ sabrahmacārī ovadanti anusāsanti
appassādā āvuso kāmā vuttā bhagavatā bahudukkhā bahūpāyāsā
ādīnavo ettha bhiyyo aṭṭhikaṅkalūpamā 2 kāmā vuttā bhagavatā
bahudukkhā bahūpāyāsā ādīnavo ettha bhiyyo maṁsapesūpamā kāmā
vuttā bhagavatā bahudukkhā bahūpāyāsā ādīnavo ettha bhiyyo
tiṇukkūpamā kāmā vuttā bhagavatā bahudukkhā bahūpāyāsā
ādīnavo ettha bhiyyo aṅgārakāsūpamā kāmā vuttā bhagavatā bahudukkhā
bahūpāyāsā ādīnavo ettha bhiyyo supinakūpamā kāmā
vuttā bhagavatā bahudukkhā bahūpāyāsā ādīnavo ettha bhiyayo
yācitakūpamā kāmā vuttā bhagavatā bahudukkhā bahūpāyāsā ādīnavo
ettha bhiyyo rukkhaphalūpamā kāmā vuttā bhagavatā bahudukkhā
bahūpāyāsā ādīnavo ettha bhiyyo asisūnūpamā kāmā vuttā
bhagavatā bahudukkhā bahūpāyāsā ādīnavo ettha bhiyyo sattisūlūpamā
kāmā vuttā bhagavatā bahudukkhā bahūpāyāsā ādīnavo
1 Ma. Yu. rāgapariyuṭṭhitomhi. 2 Yu. aṭṭhisaṅkhalūpamā.
Ettha bhiyyo sappasirūpamā kāmā vuttā bhagavatā bahudukkhā
bahūpāyāsā ādīnavo ettha bhiyyo abhiramatu āyasmā brahmacariye
mā āyasmā sikkhādubbalyaṁ āvikatvā sikkhaṁ paccakkhāya hīnāyāvattīti
so sabrahmacārīhi evaṁ ovadiyamāno evaṁ anusāsiyamāno
evamāha kiñcapi āvuso appassādā kāmā vuttā bhagavatā
bahudukkhā bahūpāyāsā ādīnavo ettha bhiyyo athakho nevāhaṁ sakkomi
brahmacariyaṁ santānetuṁ sikkhādubbalyaṁ āvikatvā sikkhaṁ paccakkhāya
hīnāyāvattissāmīti so sikkhādubbalyaṁ āvikatvā sikkhaṁ paccakkhāya
hīnāyāvattati seyyathāpi so bhikkhave yodhājīvo asicammaṁ gahetvā
dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare upalikkhanti tamenaṁ
apanenti apanetvā ñātakānaṁ nenti tamenaṁ ñātakā upaṭṭhahanti
paricaranti so ñātakehi upaṭṭhahiyamāno paricariyamāno teneva ābādhena
kālaṁ karoti tathūpamāhaṁ bhikkhave imaṁ puggalaṁ vadāmi evarūpopi
bhikkhave idhekacco puggalo hoti ayaṁ bhikkhave tatiyo yodhājīvūpamo
puggalo santo saṁvijjamāno bhikkhūsu. Puna caparaṁ bhikkhave bhikkhu aññataraṁ
gāmaṁ vā nigamaṁ vā upanissāya viharati so pubbaṇhasamayaṁ nivāsetvā
pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva
kāyena arakkhitāya vācāya arakkhitena cittena anupaṭṭhitāya satiyā
asaṁvutehi indriyehi so tattha passati mātugāmaṁ dunnivatthaṁ vā duppārutaṁ vā
Tassa mātugāmaṁ disvā dunnivatthaṁ vā duppārutaṁ vā rāgo cittaṁ
anuddhaṁseti so rāgānuddhaṁsena cittena pariḍayhateva kāyena pariḍayhati
cetasā tassa evaṁ hoti yannūnāhaṁ ārāmaṁ gantvā bhikkhūnaṁ
āroceyyaṁ rāgāyitomhi 1 āvuso rāgapareto na sakkomi
brahmacariyaṁ santānetuṁ sikkhādubbalyaṁ āvikatvā sikkhaṁ paccakkhāya
hīnāyāvattissāmīti so ārāmaṁ gantvā bhikkhūnaṁ āroceti
rāgāyitomhi 1 āvuso rāgapareto na sakkomi brahmacariyaṁ santānetuṁ
sikkhādubbalyaṁ āvikatvā sikkhaṁ paccakkhāya hīnāyāvattissāmīti tamenaṁ
sabrahmacārī ovadanti anusāsanti appassādā āvuso kāmā
vuttā bhagavatā bahudukkhā bahūpāyāsā ādīnavo ettha bhiyyo
aṭṭhikaṅkalūpamā kāmā vuttā bhagavatā bahudukkhā bahūpāyāsā
ādīnavo ettha bhiyyo maṁsapesūpamā kāmā vuttā bhagavatā ...
Tiṇukkūpamā kāmā vuttā bhagavatā ... Aṅgārakāsūpamā kāmā vuttā
bhagavatā ... Supinakūpamā kāmā vuttā bhagavatā ... Yācitakūpamā
kāmā vuttā bhagavatā ... Rukkhaphalūpamā kāmā vuttā bhagavatā ...
Asisūnūpamā kāmā vuttā bhagavatā ... Sattisūlūpamā kāmā vuttā
bhagavatā ... Sappasirūpamā kāmā vuttā bhagavatā bahudukkhā
bahūpāyāsā ādīnavo ettha bhiyyo abhiramatu āyasmā brahmacariye
mā āyasmā sikkhādubbalyaṁ āvikatvā sikkhaṁ paccakkhāya hīnāyāvattīti
1 Ma. Yu. rāgapariyuṭṭhitomhi.
So sabrahmacārīhi evaṁ ovadiyamāno evaṁ anusāsiyamāno evamāha
ussahissāmi āvuso dhārayissāmi 1 āvuso abhiramissāmi āvuso
na dānāhaṁ āvuso sikkhādubbalyaṁ āvikatvā sikkhaṁ paccakkhāya
hīnāyāvattissāmīti seyyathāpi so bhikkhave yodhājīvo asicammaṁ gahetvā
dhanukalāpaṁ sannayhitvā viyūḷhaṁ saṅgāmaṁ otarati so tasmiṁ saṅgāme
ussahati vāyamati tamenaṁ ussahantaṁ vāyamantaṁ pare upalikkhanti
tamenaṁ apanenti apanetvā ñātakānaṁ nenti tamenaṁ ñātakā
upaṭṭhahanti paricaranti so ñātakehi upaṭṭhahiyamāno paricariyamāno
vuṭṭhāti tamhā ābādhā tathūpamāhaṁ bhikkhave imaṁ puggalaṁ vadāmi
evarūpopi bhikkhave idhekacco puggalo hoti ayaṁ bhikkhave catuttho
yodhājīvūpamo puggalo santo saṁvijjamāno bhikkhūsu. Puna caparaṁ
bhikkhave bhikkhu aññataraṁ gāmaṁ vā nigamaṁ vā upanissāya viharati
so pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ
vā piṇḍāya pavisati rakkhiteneva kāyena rakkhitāya vācāya rakkhitena
cittena upaṭṭhitāya satiyā saṁvutehi indriyehi so cakkhunā rūpaṁ
disvā na nimittaggāhī hoti nānubyañjanaggāhī yatvādhikaraṇamenaṁ
cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā
anvāssaveyyuṁ tassa saṁvarāya paṭipajjati rakkhati cakkhundriyaṁ
cakkhundriye saṁvaraṁ āpajjati sotena saddaṁ sutvā ... Ghānena gandhaṁ
1 Ma. Yu. vāyamissāmi.
Ghāyitvā ... Jivhāya rasaṁ sāyitvā ... Kāyena phoṭṭhabbaṁ phusitvā ...
Manasā dhammaṁ viññāya na nimittaggāhī hoti nānubyañjanaggāhī
yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā
akusalā dhammā anvāssaveyyuṁ tassa saṁvarāya paṭipajjati rakkhati
manindriyaṁ manindriye saṁvaraṁ āpajjati so pacchābhattaṁ piṇḍapātapaṭikkanto
vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ
giriguhaṁ susānaṁ vanapatthaṁ abbhokāsaṁ palālapuñjaṁ so araññagato
vā rukkhamūlagato vā suññāgāragato vā nisīdati pallaṅkaṁ ābhujitvā
ujuṁ kāyaṁ paṇidhāya parimukhaṁ satiṁ upaṭṭhapetvā so abhijjhaṁ loke
pahāya .pe. So ime pañca nīvaraṇe pahāya cetaso upakkilese
paññāya dubbalīkaraṇe vivicceva kāmehi .pe. Catutthaṁ jhānaṁ
upasampajja viharati so evaṁ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
āsavānaṁ khayañāṇāya cittaṁ abhininnāmeti so idaṁ dukkhanti
yathābhūtaṁ pajānāti .pe. Nāparaṁ itthattāyāti pajānāti seyyathāpi
so bhikkhave yodhājīvo asicammaṁ gahetvā dhanukalāpaṁ sannayhitvā
viyūḷhaṁ saṅgāmaṁ otarati so taṁ saṅgāmaṁ abhivijinitvā vijitasaṅgāmo
tameva saṅgāmasīsaṁ ajjhāvasati tathūpamāhaṁ bhikkhave imaṁ puggalaṁ vadāmi
evarūpopi bhikkhave idhekacco puggalo hoti ayaṁ bhikkhave pañcamo
yodhājīvūpamo puggalo santo saṁvijjamāno bhikkhūsu. Ime kho
Bhikkhave pañca yodhājīvūpamā puggalā santo saṁvijjamānā bhikkhūsūti.

[77] Pañcimāni bhikkhave anāgatabhayāni sampassamānena
alameva āraññakena bhikkhunā appamattena ātāpinā pahitattena viharituṁ
appattassa pattiyā anadhigatassa adhigamāya asacchikatassa sacchikiriyāya
katamāni pañca idha bhikkhave āraññako bhikkhu iti paṭisañcikkhati
ahaṁ kho etarahi ekako araññe viharāmi ekakaṁ kho pana
araññe viharantaṁ ahi vā maṁ ḍaṁseyya 1 vicchikā 2 vā maṁ
ḍaṁseyya satapadī vā maṁ ḍaṁseyya 1 tena me assa kālakiriyā
so mamassa antarāyo handāhaṁ viriyaṁ ārabhāmi appattassa pattiyā
anadhigatassa adhigamāya asacchikatassa sacchikiriyāyāti idaṁ bhikkhave
paṭhamaṁ anāgatabhayaṁ sampassamānena alameva āraññakena bhikkhunā
appamattena ātāpinā pahitattena viharituṁ appattassa pattiyā
anadhigatassa adhigamāya asacchikatassa sacchikiriyāya. Puna caparaṁ bhikkhave
āraññako bhikkhu iti paṭisañcikkhati ahaṁ kho etarahi ekako
araññe viharāmi ekako kho panāhaṁ araññe viharanto upakkhaletvā
vā papateyyaṁ bhattaṁ vā me bhuttaṁ byāpajjeyya pittaṁ
vā me kuppeyya semhaṁ vā me kuppeyya satthakā vā me vātā
kuppeyyuṁ te me assa kālakiriyā so mamassa antarāyo
handāhaṁ viriyaṁ ārabhāmi appattassa pattiyā anadhigatassa adhigamāya
1 Yu. ḍaseyya. 2 Ma. Yu. vicchiko.
Asacchikatassa sacchikiriyāyāti idaṁ bhikkhave dutiyaṁ anāgatabhayaṁ
sampassamānena alameva āraññakena bhikkhunā appamattena ātāpinā
pahitattena viharituṁ appattassa pattiyā anadhigatassa adhigamāya
asacchikatassa sacchikiriyāya. Puna caparaṁ bhikkhave āraññako bhikkhu iti
paṭisañcikkhati ahaṁ kho etarahi ekako araññe viharāmi ekako
kho panāhaṁ araññe viharanto vālehi samāgaccheyyaṁ sīhena vā
byagghena vā dīpinā vā acchena vā taracchena vā te maṁ jīvitā
voropeyyuṁ tena me assa kālakiriyā so mamassa antarāyo
handāhaṁ viriyaṁ ārabhāmi appattassa pattiyā anadhigatassa adhigamāya
asacchikatassa sacchikiriyāyāti idaṁ bhikkhave tatiyaṁ anāgatabhayaṁ
sampassamānena alameva āraññakena bhikkhunā appamattena ātāpinā
pahitattena viharituṁ appattassa pattiyā anadhigatassa adhigamāya
asacchikatassa sacchikiriyāya. Puna caparaṁ bhikkhave āraññako bhikkhu iti
paṭisañcikkhati ahaṁ kho etarahi ekako araññe viharāmi ekako
kho panāhaṁ araññe viharanto māṇavehi samāgaccheyyaṁ katakammehi vā
akatakammehi vā te maṁ jīvitā voropeyyuṁ tena me assa
kālakiriyā so mamassa antarāyo handāhaṁ viriyaṁ ārabhāmi
appattassa pattiyā anadhigatassa adhigamāya asacchikatassa sacchikiriyāyāti
idaṁ bhikkhave catutthaṁ anāgatabhayaṁ sampassamānena alameva āraññakena
bhikkhunā appamattena ātāpinā pahitattena viharituṁ appattassa pattiyā
Anadhigatassa adhigamāya asacchikatassa sacchikiriyāya. Puna caparaṁ bhikkhave
āraññako bhikkhu iti paṭisañcikkhati ahaṁ kho etarahi ekako
araññe viharāmi santi kho panāraññe vālā amanussā te
maṁ jīvitā voropeyyuṁ tena me assa kālakiriyā so mamassa
antarāyo handāhaṁ viriyaṁ ārabhāmi appattassa pattiyā anadhigatassa
adhigamāya asacchikatassa sacchikiriyāyāti idaṁ bhikkhave pañcamaṁ
anāgatabhayaṁ sampassamānena alameva āraññakena bhikkhunā appamattena
ātāpinā pahitattena viharituṁ appattassa pattiyā anadhigatassa
adhigamāya asacchikatassa sacchikiriyāya. Imāni kho bhikkhave pañca
anāgatabhayāni sampassamānena alameva āraññakena bhikkhunā appamattena
ātāpinā pahitattena viharituṁ appattassa pattiyā anadhigatassa
adhigamāya asacchikatassa sacchikiriyāyāti.

[78] Pañcimāni bhikkhave anāgatabhayāni sampassamānena alameva
bhikkhunā appamattena ātāpinā pahitattena viharituṁ appattassa pattiyā
anadhigatassa adhigamāya asacchikatassa sacchikiriyāya katamāni pañca
idha bhikkhave bhikkhu iti paṭisañcikkhati ahaṁ kho etarahi daharo yuvā
susū 1 kāḷakeso bhadrena yobbanena samannāgato paṭhamena vayasā hoti
kho pana so samayo yaṁ imaṁ kāyaṁ jarā phusati jiṇṇena kho
pana jarāya abhibhūtena na sukaraṁ buddhānaṁ sāsanaṁ manasikātuṁ na sukarāni
1 Ma. Yu. susu.
Araññavanapatthāni pantāni senāsanāni paṭisevituṁ purā maṁ so dhammo
āgacchati aniṭṭho akanto amanāpo handāhaṁ paṭikacceva viriyaṁ
ārabhāmi appattassa pattiyā anadhigatassa adhigamāya asacchikatassa
sacchikiriyāya yenāhaṁ dhammena samannāgato jiṇṇakopi phāsuṁ 1
viharissāmīti idaṁ bhikkhave paṭhamaṁ anāgatabhayaṁ sampassamānena alameva
bhikkhunā appamattena ātāpinā pahitattena viharituṁ appattassa pattiyā
anadhigatassa adhigamāya asacchikatassa sacchikiriyāya. Puna caparaṁ bhikkhave
bhikkhu iti paṭisañcikkhati ahaṁ kho etarahi appābādho appātaṅko
samavepākiniyā gahaṇiyā samannāgato nātisītāya nāccuṇhāya majjhimāya
padhānakkhamāya hoti kho pana so samayo yaṁ imaṁ kāyaṁ byādhi
phusati byādhitena kho pana byādhinā 2 abhibhūtena na sukaraṁ buddhānaṁ
sāsanaṁ manasikātuṁ na sukarāni araññavanapatthāni pantāni senāsanāni
paṭisevituṁ purā maṁ so dhammo āgacchati aniṭṭho akanto amanāpo
handāhaṁ paṭikacceva viriyaṁ ārabhāmi appattassa pattiyā anadhigatassa
adhigamāya asacchikatassa sacchikiriyāya yenāhaṁ dhammena samannāgato
byādhitopi phāsuṁ viharissāmīti idaṁ bhikkhave dutiyaṁ anāgatabhayaṁ
sampassamānena alameva bhikkhunā appamattena ātāpinā pahitattena viharituṁ
appattassa pattiyā anadhigatassa adhigamāya asacchikatassa sacchikiriyāya.
Puna caparaṁ bhikkhave bhikkhu iti paṭisañcikkhati etarahi kho [3]- susassaṁ
1 Yu. phāsu. sabbattha īdisameva. 2 Yu. vyābādhābhibhūtena. 3 Ma. Yu. subhikkhaṁ.
Sulabhapiṇḍaṁ sukaraṁ uñchena paggahena yāpetuṁ hoti kho pana so
samayo yaṁ dubbhikkhaṁ hoti dussassaṁ dullabhapiṇḍaṁ na sukaraṁ uñchena
paggahena yāpetuṁ dubbhikkhe kho pana manussā yena subhikkhaṁ tena
saṅkamanti tattha saṅgaṇikavihāro hoti ākiṇṇavihāro saṅgaṇikavihāre
kho pana sati ākiṇṇavihāre na sukaraṁ buddhānaṁ sāsanaṁ manasikātuṁ
na sukarāni araññavanapatthāni pantāni senāsanāni paṭisevituṁ purā
maṁ so dhammo āgacchati aniṭṭho akanto amanāpo handāhaṁ
paṭikacceva viriyaṁ ārabhāmi appattassa pattiyā anadhigatassa adhigamāya
asacchikatassa sacchikiriyāya yenāhaṁ dhammena samannāgato dubbhikkhepi
phāsuṁ viharissāmīti idaṁ bhikkhave tatiyaṁ anāgatabhayaṁ sampassamānena
alameva bhikkhunā appamattena ātāpinā pahitattena viharituṁ appattassa
pattiyā anadhigatassa adhigamāya asacchikatassa sacchikiriyāya. Puna
caparaṁ bhikkhave bhikkhu iti paṭisañcikkhati etarahi kho manussā samaggā
sammodamānā avivadamānā khīrodakībhūtā aññamaññaṁ piyacakkhūhi
sampassantā viharanti hoti kho pana so samayo yaṁ bhayaṁ hoti
aṭṭavīsaṅkopo cakkasamārūḷhā jānapadā pariyāyanti bhaye kho pana sati
manussā yena khemaṁ tena saṅkamanti tattha saṅgaṇikavihāro hoti
ākiṇṇavihāro saṅgaṇikavihāre kho pana sati ākiṇṇavihāre na
sukaraṁ buddhānaṁ sāsanaṁ manasikātuṁ na sukarāni araññavanapatthāni pantāni
Senāsanāni paṭisevituṁ purā maṁ so dhammo āgacchati aniṭṭho
akanto amanāpo handāhaṁ paṭikacceva viriyaṁ ārabhāmi appattassa
pattiyā anadhigatassa adhigamāya asacchikatassa sacchikiriyāya yenāhaṁ
dhammena samannāgato bhayepi phāsuṁ viharissāmīti idaṁ bhikkhave catutthaṁ
anāgatabhayaṁ sampassamānena alameva bhikkhunā appamattena ātāpinā
pahitattena viharituṁ appattassa pattiyā anadhigatassa adhigamāya asacchikatassa
sacchikiriyāya. Puna caparaṁ bhikkhave bhikkhu iti paṭisañcikkhati
etarahi kho saṅgho samaggo sammodamāno avivadamāno ekuddeso phāsuṁ
viharati hoti kho pana so samayo yaṁ saṅgho bhijjati saṅghe
kho pana bhinne na sukaraṁ buddhānaṁ sāsanaṁ manasikātuṁ na sukarāni
araññavanapatthāni pantāni senāsanāni paṭisevituṁ purā maṁ so dhammo
āgacchati aniṭṭho akanto amanāpo handāhaṁ paṭikacceva viriyaṁ
ārabhāmi appattassa pattiyā anadhigatassa adhigamāya asacchikatassa
sacchikiriyāya yenāhaṁ dhammena samannāgato bhinnepi saṅghe phāsuṁ
viharissāmīti idaṁ bhikkhave pañcamaṁ anāgatabhayaṁ sampassamānena alameva
bhikkhunā appamattena ātāpinā pahitattena viharituṁ appattassa pattiyā
anadhigatassa adhigamāya asacchikatassa sacchikiriyāya. Imāni kho bhikkhave
pañca anāgatabhayāni sampassamānena alameva bhikkhunā appamattena
Ātāpinā pahitattena viharituṁ appattassa pattiyā anadhigatassa adhigamāya
asacchikatassa sacchikiriyāyāti.

[79] Pañcimāni bhikkhave anāgatabhayāni etarahi asamuppannāni
āyatiṁ samuppajjissanti tāni vo paṭibujjhitabbāni paṭibujjhitvā
ca tesaṁ pahānāya vāyamitabbaṁ katamāni pañca bhavissanti bhikkhave
bhikkhū anāgatamaddhānaṁ abhāvitakāyā abhāvitasīlā abhāvitacittā
abhāvitapaññā te abhāvitakāyā samānā abhāvitasīlā abhāvitacittā
abhāvitapaññā aññe upasampādessanti tepi na sakkhissanti vinetuṁ
adhisīle adhicitte adhipaññāya tepi bhavissanti abhāvitakāyā
abhāvitasīlā abhāvitacittā abhāvitapaññā te abhāvitakāyā samānā
abhāvitasīlā abhāvitacittā abhāvitapaññā aññe upasampādessanti
tepi na sakkhissanti vinetuṁ adhisīle adhicitte adhipaññāya tepi
bhavissanti abhāvitakāyā abhāvitasīlā abhāvitacittā abhāvitapaññā iti
kho bhikkhave dhammasandosā vinayasandoso vinayasandosā dhammasandoso
idaṁ bhikkhave paṭhamaṁ anāgatabhayaṁ etarahi asamuppannaṁ āyatiṁ
samuppajjissati taṁ vo paṭibujjhitabbaṁ paṭibujjhitvā ca tassa pahānāya
vāyamitabbaṁ. Puna caparaṁ bhikkhave bhavissanti bhikkhū anāgatamaddhānaṁ
abhāvitakāyā abhāvitasīlā abhāvitacittā abhāvitapaññā te
abhāvitakāyā samānā abhāvitasīlā abhāvitacittā abhāvitapaññā aññesaṁ
nissayaṁ dassanti tepi na sakkhissanti vinetuṁ adhisīle adhicitte
Adhipaññāya tepi bhavissanti abhāvitakāyā abhāvitasīlā abhāvitacittā
abhāvitapaññā te abhāvitakāyā samānā abhāvitasīlā abhāvitacittā
abhāvitapaññā aññesaṁ nissayaṁ dassanti tepi na sakkhissanti vinetuṁ
adhisīle adhicitte adhipaññāya tepi bhavissanti abhāvitakāyā
abhāvitasīlā abhāvitacittā abhāvitapaññā iti kho bhikkhave dhammasandosā
vinayasandoso vinayasandosā dhammasandoso idaṁ bhikkhave dutiyaṁ
anāgatabhayaṁ etarahi asamuppannaṁ āyatiṁ samuppajjissati taṁ vo
paṭibujjhitabbaṁ paṭibujjhitvā ca tassa pahānāya vāyamitabbaṁ. Puna
caparaṁ bhikkhave bhavissanti bhikkhū anāgatamaddhānaṁ abhāvitakāyā abhāvitasīlā
abhāvitacittā abhāvitapaññā te abhāvitakāyā samānā abhāvitasīlā
abhāvitacittā abhāvitapaññā abhidhammakathaṁ vedallakathaṁ kathentā kaṇhaṁ
dhammaṁ okkamamānā na bujjhissanti iti kho bhikkhave dhammasandosā
vinayasandoso vinayasandosā dhammasandoso idaṁ bhikkhave tatiyaṁ
anāgatabhayaṁ etarahi asamuppannaṁ āyatiṁ samuppajjissati taṁ vo
paṭibujjhitabbaṁ paṭibujjhitvā ca tassa pahānāya vāyamitabbaṁ. Puna
caparaṁ bhikkhave bhavissanti bhikkhū anāgatamaddhānaṁ abhāvitakāyā
abhāvitasīlā abhāvitacittā abhāvitapaññā te abhāvitakāyā samānā
abhāvitasīlā abhāvitacittā abhāvitapaññā ye te suttantā
tathāgatabhāsitā gambhīrā gambhīratthā lokuttarā suññatāpaṭisaṁyuttā tesu
Bhaññamānesu na sussūsanti 1 na sotaṁ odahissanti na aññācittaṁ
upaṭṭhāpessanti 2 na ca te dhamme uggahetabbaṁ pariyāpuṇitabbaṁ
maññissanti ye pana te suttantā kavikatā 3 kāveyyā cittakkharā
cittabyañjanā bāhirakā sāvakabhāsitā tesu bhaññamānesu sussūsanti 1
sotaṁ odahissanti aññācittaṁ upaṭṭhāpessanti 2 te ca dhamme
uggahetabbaṁ pariyāpuṇitabbaṁ maññissanti iti kho bhikkhave dhammasandosā
vinayasandoso vinayasandosā dhammasandoso idaṁ bhikkhave catutthaṁ
anāgatabhayaṁ etarahi asamuppannaṁ āyatiṁ samuppajjissati taṁ vo
paṭibujjhitabbaṁ paṭibujjhitvā ca tassa pahānāya vāyamitabbaṁ. Puna
caparaṁ bhikkhave bhavissanti bhikkhū anāgatamaddhānaṁ abhāvitakāyā abhāvitasīlā
abhāvitacittā abhāvitapaññā te abhāvitakāyā samānā abhāvitasīlā
abhāvitacittā abhāvitapaññā therā bhikkhū bāhullikā 4 bhavissanti
sāthalikā okkamane pubbaṅgamā paviveke nikkhittadhurā na viriyaṁ
ārabhissanti appattassa pattiyā anadhigatassa adhigamāya asacchikatassa
sacchikiriyāya tesaṁ pacchimā janatā diṭṭhānugatiṁ āpajjissati sāpi
bhavissati bāhullikā 4 sāthalikā okkamane pubbaṅgamā paviveke
nikkhittadhurā na viriyaṁ ārabhissati appattassa pattiyā anadhigatassa
adhigamāya asacchikatassa sacchikiriyāya iti kho bhikkhave dhammasandosā
vinayasandoso vinayasandosā dhammasandoso idaṁ bhikkhave pañcamaṁ
1 Ma. na sussūsissanti. Yu. na sussusissanti. 2 Ma. Yu. upaṭṭhapessanti.
3 Ma. kavitā. 4 Po. Ma. Yu. bāhulikā.
Anāgatabhayaṁ etarahi asamuppannaṁ āyatiṁ samuppajjissati taṁ vo
paṭibujjhitabbaṁ paṭibujjhitvā ca tassa pahānāya vāyamitabbaṁ. Imāni
kho bhikkhave pañca anāgatabhayāni etarahi asamuppannāni āyatiṁ
samuppajjissanti tāni vo paṭibujjhitabbāni paṭibujjhitvā ca
tesaṁ pahānāya vāyamitabbanti.

[80] Pañcimāni bhikkhave anāgatabhayāni etarahi asamuppannāni
āyatiṁ samuppajjissanti tāni vo paṭibujjhitabbāni paṭibujjhitvā
ca tesaṁ pahānāya vāyamitabbaṁ katamāni pañca bhavissanti bhikkhave
bhikkhū anāgatamaddhānaṁ cīvare kalyāṇakāmā te cīvare kalyāṇakāmā
samānā riñcissanti paṁsukūlikattaṁ riñcissanti araññavanapatthāni pantāni
senāsanāni gāmanigamarājadhānīsu 1 osaritvā vāsaṁ kappissanti 2 cīvarahetu
ca anekavihitaṁ anesanaṁ appaṭirūpaṁ āpajjissanti idaṁ bhikkhave paṭhamaṁ
anāgatabhayaṁ etarahi asamuppannaṁ āyatiṁ samuppajjissati taṁ vo
paṭibujjhitabbaṁ paṭibujjhitvā ca tassa pahānāya vāyamitabbaṁ. Puna
caparaṁ bhikkhave bhavissanti bhikkhū anāgatamaddhānaṁ piṇḍapāte kalyāṇakāmā
te piṇḍapāte kalyāṇakāmā samānā riñcissanti piṇḍapātikattaṁ
riñcissanti araññavanapatthāni pantāni senāsanāni gāmanigamarājadhānīsu 1
osaritvā vāsaṁ kappissanti 2 jivhaggena rasaggāni pariyesamānā
piṇḍapātahetu ca anekavihitaṁ anesanaṁ appaṭirūpaṁ āpajjissanti idaṁ
bhikkhave dutiyaṁ anāgatabhayaṁ etarahi asamuppannaṁ āyatiṁ samuppajjissati
1 Yu. gāmanigamarājadhāniṁ. ito paraṁ īdisameva. 2 Ma. Yu. kappessanti. ito paraṁ
īdisameva.
Taṁ vo paṭibujjhitabbaṁ paṭibujjhitvā ca tassa pahānāya vāyamitabbaṁ.
Puna caparaṁ bhikkhave bhavissanti bhikkhū anāgatamaddhānaṁ senāsane
kalyāṇakāmā te senāsane kalyāṇakāmā samānā riñcissanti
āraññakattaṁ 1 riñcissanti araññavanapatthāni pantāni senāsanāni
gāmanigamarājadhānīsu osaritvā vāsaṁ kappissanti senāsanahetu ca anekavihitaṁ
anesanaṁ appaṭirūpaṁ āpajjissanti idaṁ bhikkhave tatiyaṁ anāgatabhayaṁ
etarahi asamuppannaṁ āyatiṁ samuppajjissati taṁ vo paṭibujjhitabbaṁ
paṭibujjhitvā ca tassa pahānāya vāyamitabbaṁ. Puna caparaṁ bhikkhave
bhavissanti bhikkhū anāgatamaddhānaṁ bhikkhunīsikkhamānāsamaṇuddesehi saṁsaṭṭhā
viharissanti bhikkhunīsikkhamānāsamaṇuddesehi saṁsagge kho pana bhikkhave
sati etaṁ pāṭikaṅkhaṁ anabhiratā vā brahmacariyaṁ carissanti aññataraṁ
vā saṅkiliṭṭhaṁ āpattiṁ āpajjissanti sikkhaṁ vā paccakkhāya
hīnāyāvattissanti idaṁ bhikkhave catutthaṁ anāgatabhayaṁ etarahi asamuppannaṁ
āyatiṁ samuppajjissati taṁ vo paṭibujjhitabbaṁ paṭibujjhitvā ca
tassa pahānāya vāyamitabbaṁ. Puna caparaṁ bhikkhave bhavissanti bhikkhū
anāgatamaddhānaṁ ārāmikasamaṇuddesehi saṁsaṭṭhā viharissanti
ārāmikasamaṇuddesehi saṁsagge kho pana bhikkhave sati etaṁ pāṭikaṅkhaṁ
anekavihitaṁ sannidhikārakaparibhogaṁ 2 anuyuttā viharissanti oḷārikaṁpi nimittaṁ
karissanti paṭhaviyāpi haritaggepi idaṁ bhikkhave pañcamaṁ anāgatabhayaṁ
1 Ma. Yu. rukkhamūlikattaṁ. 2 Ma. sannidhikāraparibhogaṁ.
Etarahi asamuppannaṁ āyatiṁ samuppajjissati taṁ vo paṭibujjhitabbaṁ
paṭibujjhitvā ca tassa pahānāya vāyamitabbaṁ. Imāni kho bhikkhave
pañca anāgatabhayāni etarahi asamuppannāni āyatiṁ samuppajjissanti
tāni vo paṭibujjhitabbāni paṭibujjhitvā ca tesaṁ pahānāya
vāyamitabbanti.
Yodhājīvavaggo tatiyo.
Tassuddānaṁ
duve cetovimuttī 1 ca dve ca dhammavihārino
yodhājīvā ca dve vuttā cattāro ca anāgatāti.
-----------
Theravaggo catuttho

[81] Pañcahi bhikkhave dhammehi samannāgato thero bhikkhu
sabrahmacārīnaṁ appiyo ca hoti amanāpo ca agaru ca abhāvanīyo ca
katamehi pañcahi rajanīye rajjati dusanīye 2 dussati mohanīye muyhati
kupanīye 3 kuppati madanīye majjati imehi kho bhikkhave pañcahi
dhammehi samannāgato thero bhikkhu sabrahmacārīnaṁ appiyo ca hoti
amanāpo ca agaru ca abhāvanīyo ca. Pañcahi bhikkhave dhammehi
samannāgato thero bhikkhu sabrahmacārīnaṁ piyo ca hoti manāpo ca garu
ca bhāvanīyo ca katamehi pañcahi rajanīye na rajjati dusanīye 2
1 Ma. Yu. dve cetovimuttiphalā. 2 Po. Ma. dussanīye. 3 Po. Ma. kuppaniye.
Yu. kopanīye.
Na dussati mohanīye na muyhati kupanīye na kuppati madanīye
na majjati imehi kho bhikkhave pañcahi dhammehi samannāgato thero
bhikkhu sabrahmacārīnaṁ piyo ca hoti manāpo ca garu ca bhāvanīyo cāti.

[82] Pañcahi bhikkhave dhammehi samannāgato thero bhikkhu
sabrahmacārīnaṁ appiyo ca hoti amanāpo ca agaru ca abhāvanīyo ca
katamehi pañcahi avītarāgo hoti avītadoso hoti avītamoho
hoti makkhī ca paḷāsī 1 ca imehi kho bhikkhave pañcahi dhammehi
samannāgato thero bhikkhu sabrahmacārīnaṁ appiyo ca hoti amanāpo ca
agaru ca abhāvanīyo ca 2 . Pañcahi bhikkhave dhammehi samannāgato thero
bhikkhu sabrahmacārīnaṁ piyo ca hoti manāpo ca garu ca bhāvanīyo ca
katamehi pañcahi vītarāgo hoti vītadoso hoti vītamoho hoti
amakkhī ca apaḷāsī ca imehi kho .pe.

[83] Pañcahi bhikkhave dhammehi samannāgato thero bhikkhu
sabrahmacārīnaṁ appiyo ca hoti amanāpo ca agaru ca abhāvanīyo ca
katamehi pañcahi kuhako ca hoti lapako ca nimittiko 3 ca
nippesiko ca lābhena lābhaṁ nijigiṁsitā ca imehi kho .pe. Pañcahi
bhikkhave dhammehi samannāgato thero bhikkhu sabrahmacārīnaṁ piyo ca hoti
manāpo ca garu ca bhāvanīyo ca katamehi pañcahi na ca kuhako
hoti na ca lapako na ca nimittiko na ca nippesiko na ca
lābhena lābhaṁ nijigiṁsitā imehi kho .pe.
1 Yu. palāsī. 2 Po. cāti. 3 Ma. nemittiko. Yu. nemittako.

[84] Pañcahi bhikkhave dhammehi samannāgato thero bhikkhu
sabrahmacārīnaṁ appiyo ca hoti amanāpo ca agaru ca abhāvanīyo ca
katamehi pañcahi assaddho hoti ahiriko hoti anottappī 1 hoti
kusīto hoti duppañño hoti imehi kho .pe. Pañcahi bhikkhave
dhammehi samannāgato thero bhikkhu sabrahmacārīnaṁ piyo ca hoti manāpo
ca garu ca bhāvanīyo ca katamehi pañcahi saddho hoti hirīmā 2 hoti
ottappī 3 hoti āraddhaviriyo hoti paññavā hoti imehi
kho .pe.