[85] Pañcahi bhikkhave dhammehi samannāgato thero bhikkhu
sabrahmacārīnaṁ appiyo ca hoti amanāpo ca agaru ca abhāvanīyo ca
katamehi pañcahi akkhamo hoti rūpānaṁ akkhamo saddānaṁ akkhamo gandhānaṁ
akkhamo rasānaṁ akkhamo phoṭṭhabbānaṁ imehi kho .pe. Pañcahi
bhikkhave dhammehi samannāgato thero bhikkhu sabrahmacārīnaṁ piyo ca hoti
manāpo ca garu ca bhāvanīyo ca katamehi pañcahi khamo hoti
rūpānaṁ khamo saddānaṁ khamo gandhānaṁ khamo rasānaṁ khamo
phoṭṭhabbānaṁ imehi kho .pe.
[86] Pañcahi bhikkhave dhammehi samannāgato thero bhikkhu
sabrahmacārīnaṁ piyo ca hoti manāpo ca garu ca bhāvanīyo ca katamehi
pañcahi atthapaṭisambhidāppatto hoti dhammapaṭisambhidāppatto
hoti niruttipaṭisambhidāppatto hoti paṭibhāṇapaṭisambhidāppatto
1 Yu. anottāpi. 2 Po. hiriko. 3 Yu. ottāpī.
Hoti yāni tāni sabrahmacārīnaṁ uccāvacāni kiṁkaraṇīyāni tattha dakkho
hoti analaso tatrupāyāya vīmaṁsāya samannāgato alaṁ kātuṁ alaṁ
saṁvidhātuṁ imehi kho .pe.
[87] Pañcahi bhikkhave dhammehi samannāgato thero sabrahmacārīnaṁ
piyo ca hoti manāpo ca garu ca bhāvanīyo ca katamehi pañcahi
sīlavā hoti pātimokkhasaṁvarasaṁvuto viharati ācāragocarasampanno
aṇumattesu vajjesu bhayadassāvī samādāya sikkhati sikkhāpadesu
bahussuto hoti sutadharo sutasannicayo ye te dhammā ādikalyāṇā
majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ abhivadanti tathārūpāssa dhammā bahussutā honti
dhatā vacasā paricitā manasānupekkhitā diṭṭhiyā suppaṭividdhā kalyāṇavāco
hoti kalyāṇavākkaraṇo poriyā vācāya samannāgato vissaṭṭhāya
anelagaḷāya atthassa viññāpaniyā catunnaṁ jhānānaṁ ābhicetasikānaṁ 1
diṭṭhadhammasukhavihārānaṁ nikāmalābhī hoti akicchalābhī akasiralābhī āsavānaṁ
khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā
sacchikatvā upasampajja viharati imehi kho bhikkhave pañcahi dhammehi
samannāgato thero bhikkhu sabrahmacārīnaṁ piyo ca hoti manāpo ca garu
ca bhāvanīyo cāti.
[88] Pañcahi bhikkhave dhammehi samannāgato thero bhikkhu
1 Yu. abhicetasikānaṁ.
Bahujanāhitāya paṭipanno hoti bahujanāsukhāya bahuno janassa anatthāya
ahitāya dukkhāya devamanussānaṁ katamehi pañcahi thero hoti
rattaññū cirapabbajito ñāto hoti yasassī sagahaṭṭhapabbajitānaṁ
bahujanaparivāro lābhī hoti cīvarapiṇḍapātasenāsanagilānapaccayabhesajjaparikkhārānaṁ
bahussuto hoti sutadharo sutasannicayo .pe. Diṭṭhiyā
suppaṭividdhā micchādiṭṭhiko hoti viparītadassano so bahujanaṁ
saddhammā vuṭṭhāpetvā asaddhamme patiṭṭhāpeti thero bhikkhu rattaññū
cirapabbajito itipissa diṭṭhānugatiṁ āpajjanti ñāto thero bhikkhu
yasassī sagahaṭṭhapabbajitānaṁ bahujanaparivāro itipissa diṭṭhānugatiṁ
āpajjanti lābhī thero bhikkhu cīvarapiṇḍapātasenāsanagilānapaccayabhesajja-
parikkhārānaṁ itipissa diṭṭhānugatiṁ āpajjanti bahussuto thero bhikkhu
sutadharo sutasannicayo itipissa diṭṭhānugatiṁ āpajjanti imehi kho
bhikkhave pañcahi dhammehi samannāgato thero bhikkhu bahujanāhitāya
paṭipanno hoti bahujanāsukhāya bahuno janassa anatthāya ahitāya dukkhāya
devamanussānaṁ. Pañcahi bhikkhave dhammehi samannāgato thero bhikkhu
bahujanahitāya paṭipanno hoti bahujanasukhāya bahuno janassa atthāya
hitāya sukhāya devamanussānaṁ katamehi pañcahi thero hoti rattaññū
cirapabbajito ñāto hoti yasassī sagahaṭṭhapabbajitānaṁ bahujanaparivāro
lābhī hoti cīvarapiṇḍapātasenāsanagilānapaccayabhesajjaparikkhārānaṁ
Bahussuto hoti sutadharo sutasannicayo .pe. Diṭṭhiyā suppaṭividdhā sammādiṭṭhiko
hoti aviparītadassano so bahujanaṁ asaddhammā vuṭṭhāpetvā
saddhamme patiṭṭhāpeti thero bhikkhu rattaññū cirapabbajito itipissa
diṭṭhānugatiṁ āpajjanti ñāto thero bhikkhu yasassī sagahaṭṭhapabbajitānaṁ
bahujanaparivāro itipissa diṭṭhānugatiṁ āpajjanti lābhī thero bhikkhu
cīvarapiṇḍapātasenāsanagilānapaccayabhesajjaparikkhārānaṁ itipissa
diṭṭhānugatiṁ āpajjanti bahussuto thero bhikkhu sutadharo sutasannicayo
itipissa diṭṭhānugatiṁ āpajjanti imehi kho bhikkhave pañcahi dhammehi
samannāgato thero bhikkhu bahujanahitāya paṭipanno hoti bahujanasukhāya
bahuno janassa atthāya hitāya sukhāya devamanussānanti.
[89] Pañcime bhikkhave dhammā sekhassa bhikkhuno parihānāya
saṁvattanti katame pañca kammārāmatā bhassārāmatā niddārāmatā
saṅgaṇikārāmatā yathāvimuttaṁ cittaṁ na paccavekkhati ime kho bhikkhave
pañca dhammā sekhassa bhikkhuno parihānāya saṁvattanti. Pañcime
bhikkhave dhammā sekhassa bhikkhuno aparihānāya saṁvattanti katame pañca
na kammārāmatā na bhassārāmatā na niddārāmatā na saṅgaṇikārāmatā
yathāvimuttaṁ cittaṁ paccavekkhati ime kho bhikkhave pañca dhammā sekhassa
bhikkhuno aparihānāya saṁvattantīti.
[90] Pañcime bhikkhave dhammā sekhassa bhikkhuno parihānāya
saṁvattanti katame pañca idha bhikkhave sekho bhikkhu bahukicco hoti
Bahukaraṇīyo abyatto 1 kiṁkaraṇīyesu riñcati paṭisallānaṁ nānuyuñjati
ajjhattaṁ cetosamathaṁ ayaṁ bhikkhave paṭhamo dhammo sekhassa bhikkhuno
parihānāya saṁvattati. Puna caparaṁ bhikkhave sekho bhikkhu appamattakena
kammena divasaṁ atināmeti riñcati paṭisallānaṁ nānuyuñjati ajjhattaṁ
cetosamathaṁ ayaṁ bhikkhave dutiyo dhammo sekhassa bhikkhuno parihānāya
saṁvattati. Puna caparaṁ bhikkhave sekho bhikkhu saṁsaṭṭho viharati
sagahaṭṭhapabbajitehi 2 ananulomikena gihisaṁsaggena riñcati paṭisallānaṁ nānuyuñjati
ajjhattaṁ cetosamathaṁ ayaṁ bhikkhave tatiyo dhammo sekhassa bhikkhuno
parihānāya saṁvattati. Puna caparaṁ bhikkhave sekho bhikkhu atikālena 3
gāmaṁ pavisati atidivā paṭikkamati riñcati paṭisallānaṁ nānuyuñjati
ajjhattaṁ cetosamathaṁ ayaṁ bhikkhave catuttho dhammo sekhassa bhikkhuno
parihānāya saṁvattati. Puna caparaṁ bhikkhave sekho bhikkhu yāyaṁ kathā
abhisallekhikā cetovivaraṇasappāyā seyyathīdaṁ appicchakathā santuṭṭhikathā
pavivekakathā asaṁsaggakathā viriyārambhakathā sīlakathā samādhikathā
paññākathā vimuttikathā vimuttiñāṇadassanakathā evarūpiyā kathāya na
nikāmalābhī hoti kicchalābhī kasiralābhī [4]- riñcati paṭisallānaṁ nānuyuñjati
ajjhattaṁ cetosamathaṁ ayaṁ bhikkhave pañcamo dhammo sekhassa bhikkhuno
parihānāya saṁvattati. Ime kho bhikkhave pañca dhammā sekhassa
bhikkhuno parihānāya saṁvattanti. Pañcime bhikkhave dhammā sekhassa
bhikkhuno aparihānāya saṁvattanti katame pañca idha bhikkhave sekho
1 Ma. viyatto. Yu. byatto. 2 Ma. gahaṭṭhapabbajitehi. 3 Ma. akālena.
4 Ma. na akicchalābhī na akasiralābhī.
Bhikkhu na bahukicco hoti na bahukaraṇīyo byatto kiṁkaraṇīyesu na
riñcati paṭisallānaṁ anuyuñjati ajjhattaṁ cetosamathaṁ ayaṁ bhikkhave
paṭhamo dhammo sekhassa bhikkhuno aparihānāya saṁvattati. Puna caparaṁ
bhikkhave sekho bhikkhu na appamattakena kammena divasaṁ atināmeti na
riñcati paṭisallānaṁ anuyuñjati ajjhattaṁ cetosamathaṁ ayaṁ bhikkhave
dutiyo dhammo sekhassa bhikkhuno aparihānāya saṁvattati. Puna caparaṁ
bhikkhave sekho bhikkhu asaṁsaṭṭho viharati sagahaṭṭhapabbajitehi ananulomikena
gihisaṁsaggena na riñcati paṭisallānaṁ anuyuñjati ajjhattaṁ cetosamathaṁ
ayaṁ bhikkhave tatiyo dhammo sekhassa bhikkhuno aparihānāya saṁvattati.
Puna caparaṁ bhikkhave sekho bhikkhu na atikālena gāmaṁ pavisati nātidivā
paṭikkamati na riñcati paṭisallānaṁ anuyuñjati ajjhattaṁ cetosamathaṁ
ayaṁ bhikkhave catuttho dhammo sekhassa bhikkhuno aparihānāya saṁvattati.
Puna caparaṁ bhikkhave sekho bhikkhu yāyaṁ kathā abhisallekhikā
cetovivaraṇasappāyā seyyathīdaṁ appicchakathā santuṭṭhikathā pavivekakathā
asaṁsaggakathā viriyārambhakathā sīlakathā samādhikathā paññākathā vimuttikathā
vimuttiñāṇadassanakathā evarūpiyā kathāya nikāmalābhī hoti akicchalābhī
akasiralābhī na riñcati paṭisallānaṁ anuyuñjati ajjhattaṁ cetosamathaṁ
ayaṁ bhikkhave pañcamo dhammo sekhassa bhikkhuno aparihānāya saṁvattati. Ime
kho bhikkhave pañca dhammā sekhassa bhikkhuno aparihānāya saṁvattantīti.
Theravaggo catuttho.
Tassuddānaṁ
rajanīyaṁ 1 vītarāgo kuhakosaddhākkhamo 2
paṭisambhidā ca sīlena thero sekhāpare duveti.
-----------
Kakudhavaggo pañcamo
[91] Pañcimā bhikkhave sampadā katamā pañca saddhāsampadā
sīlasampadā sutasampadā cāgasampadā paññāsampadā imā
kho bhikkhave pañca sampadāti.
[92] Pañcimā bhikkhave sampadā katamā pañca sīlasampadā
samādhisampadā paññāsampadā vimuttisampadā vimuttiñāṇadassanasampadā
imā kho bhikkhave pañca sampadāti.
[93] Pañcimāni bhikkhave aññābyākaraṇāni 3 katamāni pañca
mandattā momūhattā aññaṁ byākaroti pāpiccho icchāpakato
aññaṁ byākaroti ummādā cittakkhepā aññaṁ byākaroti
adhimānena aññaṁ byākaroti sammadeva aññaṁ byākaroti imāni
kho bhikkhave pañca aññābyākaraṇānīti.
[94] Pañcime bhikkhave phāsuvihārā katame pañca idha
bhikkhave bhikkhu vivicceva kāmehi .pe. Paṭhamaṁ jhānaṁ upasampajja
viharati vitakkavicārānaṁ vūpasamā .pe. Dutiyaṁ jhānaṁ upasampajja viharati
1 Ma. Yu. rajanīyo. 2 Ma. kuhakāssaddhākkhamā. 3 Po. aññabyākaraṇāni.
Pītiyā ca virāgā .pe. Tatiyaṁ jhānaṁ upasampajja viharati sukhassa
ca pahānā .pe. Catutthaṁ jhānaṁ upasampajja viharati āsavānañca 1
khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā
sacchikatvā upasampajja viharati ime kho bhikkhave pañca phāsuvihārāti.