[300] 54 Dveme bhikkhave thūpārahā katame dve tathāgato
ca arahaṁ sammāsambuddho rājā ca cakkavattī ime kho bhikkhave
dve thūpārahāti.

[301] 55 Dveme bhikkhave buddhā katame dve tathāgato ca
arahaṁ sammāsambuddho paccekabuddho ca ime kho bhikkhave dve
buddhāti.

[302] 56 Dveme bhikkhave asaniyā phalantiyā na santasanti
katame dve bhikkhu ca khīṇāsavo hatthājāniyo ca ime kho bhikkhave
dve asaniyā phalantiyā na santasantīti.

[303] 57 Dveme bhikkhave asaniyā phalantiyā na santasanti
katame dve bhikkhu ca khīṇāsavo assājāniyo ca ime kho bhikkhave
dve asaniyā phalantiyā na santasantīti.

[304] 58 Dveme bhikkhave asaniyā phalantiyā na santasanti katame
dve bhikkhu ca khīṇāsavo sīho ca migarājā ime kho bhikkhave
Dve asaniyā phalantiyā na santasantīti.

[305] 59 Dveme bhikkhave atthavase sampassamānā kiṁpurisā mānusiṁ
vācaṁ na bhāsanti katame dve mā ca musā bhaṇimhā mā ca
paraṁ abhūtena abbhācikkhimhāti ime kho bhikkhave dve atthavase
sampassamānā kiṁpurisā mānusiṁ vācaṁ na bhāsantīti.

[306] 60 Dvinnaṁ bhikkhave dhammānaṁ atitto appaṭivāṇo mātugāmo
kālaṁ karoti katamesaṁ dvinnaṁ methunadhammasamāpattiyā ca vijāyanassa
ca imesaṁ kho bhikkhave dvinnaṁ dhammānaṁ atitto appaṭivāṇo
mātugāmo kālaṁ karotīti.

[307] 61 Asantasannivāsañca vo bhikkhave desessāmi
santasannivāsañca taṁ suṇātha sādhukaṁ manasikarotha bhāsissāmīti. Evaṁ
bhanteti kho te bhikkhū bhagavato paccassosuṁ. Bhagavā etadavoca
kathañca bhikkhave asantasannivāso hoti kathañca asanto sannivasanti
idha bhikkhave therassa bhikkhuno evaṁ hoti theropi maṁ na vadeyya
majjhimopi maṁ na vadeyya navopi maṁ na vadeyya theraṁpāhaṁ na
vadeyyaṁ majjhimaṁpāhaṁ na vadeyyaṁ navaṁpāhaṁ na vadeyyaṁ thero cepi
maṁ vadeyya ahitānukampī maṁ vadeyya no hitānukampī noti naṁ
vadeyyaṁ viheseyyaṁpi 1 naṁ passampissa na paṭikareyyaṁ majjhimo
cepi maṁ vadeyya ... Navo cepi maṁ vadeyya ahitānukampī maṁ vadeyya
no hitānukampī noti naṁ vadeyyaṁ viheseyyaṁpi 2 naṁ passampissa
1-2 Ma. vihaṭheyyaṁ.
Na paṭikareyyaṁ majjhimassapi bhikkhuno evaṁ hoti .pe. Navassapi
bhikkhuno evaṁ hoti theropi maṁ na vadeyya majjhimopi maṁ na
vadeyya navopi maṁ na vadeyya theraṁpāhaṁ na vadeyyaṁ majjhimaṁpāhaṁ
na vadeyyaṁ navaṁpāhaṁ na vadeyyaṁ thero cepi maṁ vadeyyaṁ ahitānukampī
maṁ vadeyya no hitānukampī noti naṁ vadeyyaṁ viheseyyaṁpi naṁ
passampissa na paṭikareyyaṁ majjhimo cepi maṁ vadeyya ... Navo cepi
maṁ vadeyya ahitānukampī maṁ vadeyya no hitānukampī noti naṁ
vadeyyaṁ viheseyyaṁpi naṁ passampissa na paṭikareyyaṁ evaṁ kho bhikkhave
asantasannivāso hoti evañca asanto sannivasanti. Kathañca
bhikkhave santasannivāso hoti kathañca santo sannivasanti idha
bhikkhave therassa bhikkhuno evaṁ hoti theropi maṁ vadeyya majjhimopi
maṁ vadeyya navopi maṁ vadeyya theraṁpāhaṁ vadeyyaṁ majjhimaṁpāhaṁ
vadeyyaṁ navaṁpāhaṁ vadeyyaṁ thero cepi maṁ vadeyya hitānukampī maṁ
vadeyya no ahitānukampī sādhūti naṁ vadeyyaṁ na naṁ viheseyyaṁ
passampissa paṭikareyyaṁ majjhimo cepi maṁ vadeyya ... Navo cepi
maṁ vadeyya hitānukampī maṁ vadeyya no ahitānukampī sādhūti naṁ
vadeyyaṁ na naṁ viheseyyaṁ passampissa paṭikareyyaṁ majjhimassapi
bhikkhuno evaṁ hoti .pe. Navassapi bhikkhuno evaṁ hoti theropi
maṁ vadeyya majjhimopi maṁ vadeyya navopi maṁ vadeyya theraṁpāhaṁ
vadeyyaṁ majjhimaṁpāhaṁ vadeyyaṁ navaṁpāhaṁ vadeyyaṁ thero cepi maṁ
Vadeyya hitānukampī maṁ vadeyya no ahitānukampī sādhūti naṁ vadeyyaṁ
na naṁ viheseyyaṁ passampissa paṭikareyyaṁ majjhimo cepi maṁ
vadeyya ... Navo cepi maṁ vadeyya hitānukampī maṁ vadeyya no
ahitānukampī sādhūti naṁ vadeyyaṁ na naṁ viheseyyaṁ passampissa
paṭikareyyaṁ evaṁ kho bhikkhave santasannivāso hoti evañca
santo sannivasantīti.

[308] 62 Yasmiṁ bhikkhave adhikaraṇe ubhatovacīsaṁsāro diṭṭhipalāso
cetaso āghāto appaccayo anabhiraddhi ajjhattaṁ avūpasantaṁ hoti
tasmetaṁ bhikkhave adhikaraṇe pāṭikaṅkhaṁ dīghattāya kharattāya vāḷattāya
saṁvattissati bhikkhū ca na phāsuṁ viharissanti. Yasmiṁ ca kho bhikkhave
adhikaraṇe ubhatovacīsaṁsāro diṭṭhipalāso cetaso āghāto appaccayo
anabhiraddhi ajjhattaṁ suvūpasantaṁ hoti tasmetaṁ bhikkhave adhikaraṇe
pāṭikaṅkhaṁ na dīghattāya kharattāya vāḷattāya saṁvattissati bhikkhū ca
phāsuṁ viharissantīti.
Puggalavaggo paṭhamo.

[309] 63 Dvemāni bhikkhave sukhāni katamāni dve gihisukhañca
pabbajjāsukhañca 1 imāni kho bhikkhave dve sukhāni etadaggaṁ bhikkhave
imesaṁ dvinnaṁ sukhānaṁ yadidaṁ pabbajjāsukhanti 2 .