[320] 74 Dvemāni bhikkhave sukhāni katamāni dve
sātārammaṇañca sukhaṁ upekkhārammaṇañca sukhaṁ imāni kho bhikkhave
dve sukhāni etadaggaṁ bhikkhave imesaṁ dvinnaṁ sukhānaṁ yadidaṁ
upekkhārammaṇaṁ sukhanti.

[321] 75 Dvemāni bhikkhave sukhāni katamāni dve
rūpārammaṇañca sukhaṁ arūpārammaṇañca sukhaṁ imāni kho bhikkhave dve
sukhāni etadaggaṁ bhikkhave imesaṁ dvinnaṁ sukhānaṁ yadidaṁ
arūpārammaṇaṁ sukhanti.
Sukhavaggo dutiyo.

[322] 76 Sanimittā bhikkhave uppajjanti pāpakā akusalā dhammā
no animittā tasseva nimittassa pahānā evante pāpakā akusalā
Dhammā na hontīti.

[323] 77 Sanidānā bhikkhave uppajjanti pāpakā akusalā dhammā
no anidānā tasseva nidānassa pahānā evante pāpakā akusalā
dhammā na hontīti.

[324] 78 Sahetukā bhikkhave uppajjanti pāpakā akusalā dhammā
no ahetukā tasseva hetussa pahānā evante pāpakā akusalā
dhammā na hontīti.

[325] 79 Sasaṅkhārā bhikkhave uppajjanti pāpakā akusalā dhammā
no asaṅkhārā tesaṁyeva saṅkhārānaṁ pahānā evante pāpakā akusalā
dhammā na hontīti.

[326] 80 Sappaccayā bhikkhave uppajjanti pāpakā akusalā
dhammā no appaccayā tasseva paccayassa pahānā evante pāpakā
akusalā dhammā na hontīti.

[327] 81 Sarūpā bhikkhave uppajjanti pāpakā akusalā dhammā
no arūpā tasseva rūpassa pahānā evante pāpakā akusalā
dhammā na hontīti.

[328] 82 Savedanā bhikkhave uppajjanti pāpakā akusalā dhammā
no avedanā tassāyeva vedanāya pahānā evante pāpakā akusalā
dhammā na hontīti.

[329] 83 Sasaññā bhikkhave uppajjanti pāpakā akusalā dhammā
No asaññā tassāyeva saññāya pahānā evante pāpakā akusalā
dhammā na hontīti.