[10] Nāhaṁ bhikkhave aññaṁ ekarasaṁpi samanupassāmi yaṁ evaṁ
itthiyā cittaṁ pariyādāya tiṭṭhati yathayidaṁ bhikkhave purisaraso purisaraso
bhikkhave itthiyā cittaṁ pariyādāya tiṭṭhatīti.

[11] Nāhaṁ bhikkhave aññaṁ ekaphoṭṭhabbaṁpi samanupassāmi yaṁ
Evaṁ itthiyā cittaṁ pariyādāya tiṭṭhati yathayidaṁ bhikkhave
purisaphoṭṭhabbo 1 purisaphoṭṭhabbo 2 bhikkhave itthiyā cittaṁ pariyādāya
tiṭṭhatīti.
Vaggo 3 paṭhamo.

[12] Nāhaṁ bhikkhave aññaṁ ekadhammaṁpi samanupassāmi yena
anuppanno vā kāmacchando uppajjati uppanno vā kāmacchando
bhiyyobhāvāya vepullāya saṁvattati yathayidaṁ bhikkhave subhanimittaṁ
subhanimittaṁ bhikkhave ayoniso manasikaroto anuppanno ceva kāmacchando
uppajjati uppanno ca kāmacchando bhiyyobhāvāya vepullāya
saṁvattatīti.

[13] Nāhaṁ bhikkhave aññaṁ ekadhammaṁpi samanupassāmi yena
anuppanno vā byāpādo uppajjati uppanno vā byāpādo
bhiyyobhāvāya vepullāya saṁvattati yathayidaṁ bhikkhave paṭighanimittaṁ
paṭighanimittaṁ bhikkhave ayoniso manasikaroto anuppanno ceva byāpādo
uppajjati uppanno ca byāpādo bhiyyobhāvāya vepullāya
saṁvattatīti.

[14] Nāhaṁ bhikkhave aññaṁ ekadhammaṁpi samanupassāmi yena
anuppannaṁ vā thīnamiddhaṁ uppajjati uppannaṁ vā thīnamiddhaṁ
bhiyyobhāvāya vepullāya saṁvattati yathayidaṁ bhikkhave arati tandi vijambhikā
bhattasammado cetaso ca līnattaṁ līnacittassa bhikkhave anuppannañceva
1-2 Yu. purisaphoṭṭhabbaṁ. 3 Ma. Yu. rūpādivaggo.
Thīnamiddhaṁ uppajjati uppannañca thīnamiddhaṁ bhiyyobhāvāya vepullāya
saṁvattatīti

[15] Nāhaṁ bhikkhave aññaṁ ekadhammaṁpi samanupassāmi yena
anuppannaṁ vā uddhaccakukkuccaṁ uppajjati uppannaṁ vā uddhaccakukkuccaṁ
bhiyyobhāvāya vepullāya saṁvattati yathayidaṁ bhikkhave cetaso
avūpasamo avūpasantacittassa bhikkhave anuppannañceva uddhaccakukkuccaṁ
uppajjati uppannañca uddhaccakukkuccaṁ bhiyyobhāvāya vepullāya
saṁvattatīti.

[16] Nāhaṁ bhikkhave aññaṁ ekadhammaṁpi samanupassāmi yena
anuppannā vā vicikicchā uppajjati uppannā vā vicikicchā
bhiyyobhāvāya vepullāya saṁvattati yathayidaṁ bhikkhave ayoniso manasikāro
ayoniso bhikkhave manasikaroto anuppannā ceva vicikicchā uppajjati
uppannā ca vicikicchā bhiyyobhāvāya vepullāya saṁvattatīti.

[17] Nāhaṁ bhikkhave aññaṁ ekadhammaṁpi samanupassāmi yena
anuppanno vā kāmacchando nuppajjati uppanno vā kāmacchando
pahīyati yathayidaṁ bhikkhave asubhanimittaṁ asubhanimittaṁ bhikkhave yoniso
manasikaroto anuppanno ceva kāmacchando nuppajjati uppanno ca
kāmacchando pahīyatīti.

[18] Nāhaṁ bhikkhave aññaṁ ekadhammaṁpi samanupassāmi yena
anuppanno vā byāpādo nuppajjati uppanno vā byāpādo
Pahīyati yathayidaṁ bhikkhave mettā cetovimutti mettaṁ bhikkhave
cetovimuttiṁ yoniso manasikaroto anuppanno ceva byāpādo nuppajjati
uppanno ca byāpādo pahīyatīti.

[19] Nāhaṁ bhikkhave aññaṁ ekadhammaṁpi samanupassāmi yena
anuppannaṁ vā thīnamiddhaṁ nuppajjati uppannaṁ vā thīnamiddhaṁ pahīyati
yathayidaṁ bhikkhave ārambhadhātu nikkamadhātu parakkamadhātu āraddhaviriyassa
bhikkhave anuppannañceva thīnamiddhaṁ nuppajjati uppannañca thīnamiddhaṁ
pahīyatīti.