Suttantapiṭake aṅguttaranikāyassa
paṭhamo bhāgo
-----
ekanipāto
namo tassa bhagavato arahato sammāsambuddhassa
ekadhammādipāli

[1] Evamme sutaṁ. Ekaṁ samayaṁ bhagavā sāvatthiyaṁ viharati jetavane
anāthapiṇḍikassa ārāme. Tatra kho bhagavā bhikkhū āmantesi bhikkhavoti.
Bhadanteti te bhikkhū bhagavato paccassosuṁ. Bhagavā etadavoca.

[2] Nāhaṁ bhikkhave aññaṁ ekarūpaṁpi samanupassāmi yaṁ evaṁ
purisassa cittaṁ pariyādāya tiṭṭhati yathayidaṁ bhikkhave itthirūpaṁ itthirūpaṁ
bhikkhave purisassa cittaṁ pariyādāya tiṭṭhatīti.

[3] Nāhaṁ bhikkhave aññaṁ ekasaddaṁpi samanupassāmi yaṁ evaṁ
purisassa cittaṁ pariyādāya tiṭṭhati yathayidaṁ bhikkhave itthisaddo
itthisaddo bhikkhave purisassa cittaṁ pariyādāya tiṭṭhatīti.

[4] Nāhaṁ bhikkhave aññaṁ ekagandhaṁpi samanupassāmi yaṁ evaṁ
purisassa cittaṁ pariyādāya tiṭṭhati yathayidaṁ bhikkhave itthigandho
itthigandho bhikkhave purisassa cittaṁ pariyādāya tiṭṭhatīti.

[5] Nāhaṁ bhikkhave aññaṁ ekarasaṁpi samanupassāmi yaṁ evaṁ
purisassa cittaṁ pariyādāya tiṭṭhati yathayidaṁ bhikkhave itthiraso itthiraso
bhikkhave purisassa cittaṁ pariyādāya tiṭṭhatīti.

[6] Nāhaṁ bhikkhave aññaṁ ekaphoṭṭhabbaṁpi samanupassāmi yaṁ
evaṁ purisassa cittaṁ pariyādāya tiṭṭhati yathayidaṁ bhikkhave
itthiphoṭṭhabbo itthiphoṭṭhabbo bhikkhave purisassa cittaṁ pariyādāya
tiṭṭhatīti.

[7] Nāhaṁ bhikkhave aññaṁ ekarūpaṁpi samanupassāmi yaṁ evaṁ
itthiyā cittaṁ pariyādāya tiṭṭhati yathayidaṁ bhikkhave purisarūpaṁ purisarūpaṁ
bhikkhave itthiyā cittaṁ pariyādāya tiṭṭhatīti.

[8] Nāhaṁ bhikkhave aññaṁ ekasaddaṁpi samanupassāmi yaṁ evaṁ
itthiyā cittaṁ pariyādāya tiṭṭhati yathayidaṁ bhikkhave purisasaddo
purisasaddo bhikkhave itthiyā cittaṁ pariyādāya tiṭṭhatīti.

[9] Nāhaṁ bhikkhave aññaṁ ekagandhaṁpi samanupassāmi yaṁ evaṁ
itthiyā cittaṁ pariyādāya tiṭṭhati yathayidaṁ bhikkhave purisagandho
purisagandho bhikkhave itthiyā cittaṁ pariyādāya tiṭṭhatīti.