[1684] Cattārīmāni bhikkhave ariyasaccāni. Katamāni cattāri.
Dukkhaṁ ariyasaccaṁ dukkhasamudayo ariyasaccaṁ dukkhanirodho ariyasaccaṁ
dukkhanirodhagāminīpaṭipadā ariyasaccaṁ.

[1685] Katamañca bhikkhave dukkhaṁ ariyasaccaṁ. Cha ajjhattikāni
āyatanānītissa vacanīyaṁ. Katamāni cha. Cakkhvāyatanaṁ .pe.
Manāyatanaṁ. Idaṁ vuccati bhikkhave dukkhaṁ ariyasaccaṁ.

[1686] Katamañca bhikkhave dukkhasamudayo ariyasaccaṁ. Yāyaṁ taṇhā
ponobbhavikā nandirāgasahagatā tatratatrābhinandinī. Seyyathīdaṁ.
Kāmataṇhā bhavataṇhā vibhavataṇhā. Idaṁ vuccati bhikkhave
dukkhasamudayo ariyasaccaṁ.

[1687] Katamañca bhikkhave dukkhanirodho ariyasaccaṁ. Yo tassāyeva
taṇhāya asesavirāganirodho cāgo paṭinissaggo mutti anālayo.
Idaṁ vuccati bhikkhave dukkhanirodho ariyasaccaṁ.

[1688] Katamañca bhikkhave dukkhanirodhagāminīpaṭipadā ariyasaccaṁ.
Ayameva ariyo aṭṭhaṅgiko maggo. Seyyathīdaṁ. Sammādiṭṭhi .pe.
Sammāsamādhi. Idaṁ vuccati bhikkhave dukkhanirodhagāminīpaṭipadā
ariyasaccaṁ.

[1689] Imāni kho bhikkhave cattāri ariyasaccāni. Tasmā
tiha bhikkhave idaṁ dukkhanti yogo karaṇīyo .pe. Ayaṁ
dukkhanirodhagāminī paṭipadāti yogo karaṇīyoti.

[1690] Dhāretha no tumhe bhikkhave mayā cattāri ariyasaccāni
desitānīti. Evaṁ vutte aññataro bhikkhu bhagavantaṁ etadavoca
ahaṁ kho bhante dhāremi bhagavatā cattāri ariyasaccāni desitānīti.
Yathākathaṁ pana tvaṁ bhikkhu dhāresi mayā cattāri ariyasaccāni desitānīti.
Dukkhaṁ khvāhaṁ bhante bhagavatā paṭhamaṁ ariyasaccaṁ desitaṁ dhāremi
dukkhasamudayaṁ khvāhaṁ bhante bhagavatā dutiyaṁ ariyasaccaṁ desitaṁ dhāremi
dukkhanirodhaṁ khvāhaṁ bhante bhagavatā tatiyaṁ ariyasaccaṁ desitaṁ dhāremi
dukkhanirodhagāminīpaṭipadaṁ khvāhaṁ bhante bhagavatā catutthaṁ ariyasaccaṁ
desitaṁ dhāremi. Evaṁ khvāhaṁ bhante dhāremi bhagavatā cattāri
ariyasaccāni desitānīti.

[1691] Sādhu sādhu bhikkhu sādhu kho tvaṁ bhikkhu dhāresi mayā
cattāri ariyasaccāni desitāni 1 . Dukkhaṁ kho bhikkhu mayā paṭhamaṁ
ariyasaccaṁ desitaṁ tathā naṁ dhārehi dukkhasamudayo kho bhikkhu mayā
dutiyaṁ ariyasaccaṁ desitaṁ tathā naṁ dhārehi dukkhanirodho kho bhikkhu
mayā tatiyaṁ ariyasaccaṁ desitaṁ tathā naṁ dhārehi dukkhanirodhagāminīpaṭipadā 2
kho bhikkhu mayā catutthaṁ ariyasaccaṁ desitaṁ tathā naṁ dhārehi.
Evaṁ kho bhikkhu dhārehi mayā cattāri ariyasaccāni desitāni.
1 Ma. desitānīti. evamuparipi. 2 Yu. ...paṭipadaṁ.
Tasmā tiha bhikkhu idaṁ dukkhanti yogo karaṇīyo .pe. Ayaṁ
dukkhanirodhagāminī paṭipadāti yogo karaṇīyoti.

[1692] Dhāretha no tumhe bhikkhave mayā cattāri ariyasaccāni
desitānīti. Evaṁ vutte aññataro bhikkhu bhagavantaṁ etadavoca
ahaṁ kho bhante dhāremi bhagavatā cattāri ariyasaccāni desitānīti.
Yathākathaṁ pana tvaṁ bhikkhu dhāresi mayā cattāri ariyasaccāni desitānīti.
Dukkhaṁ khvāhaṁ bhante bhagavatā paṭhamaṁ ariyasaccaṁ desitaṁ dhāremi. Yo hi
koci bhante samaṇo vā brāhmaṇo vā evaṁ vadeyya netaṁ dukkhaṁ
paṭhamaṁ ariyasaccaṁ yaṁ samaṇena gotamena desitaṁ ahametaṁ dukkhaṁ
paṭhamaṁ ariyasaccaṁ paccakkhāya aññaṁ dukkhaṁ paṭhamaṁ ariyasaccaṁ
paññapessāmīti netaṁ ṭhānaṁ vijjati. Dukkhasamudayaṁ khvāhaṁ bhante bhagavatā
.pe. Dukkhanirodhagāminīpaṭipadaṁ khvāhaṁ bhante bhagavatā catutthaṁ
ariyasaccaṁ desitaṁ dhāremi. Yo hi koci bhante samaṇo vā
brāhmaṇo vā evaṁ vadeyya netaṁ dukkhanirodhagāminīpaṭipadā
catutthaṁ ariyasaccaṁ yaṁ samaṇena gotamena desitaṁ ahametaṁ
dukkhanirodhagāminīpaṭipadaṁ catutthaṁ ariyasaccaṁ paccakkhāya aññaṁ
dukkhanirodhagāminīpaṭipadaṁ catutthaṁ ariyasaccaṁ paññapessāmīti netaṁ ṭhānaṁ
vijjati. Evaṁ khvāhaṁ bhante dhāremi bhagavatā cattāri
ariyasaccāni desitānīti.

[1693] Sādhu sādhu bhikkhu sādhu kho tvaṁ bhikkhu dhāresi mayā
Cattāri ariyasaccāni desitāni. Dukkhaṁ kho bhikkhu mayā paṭhamaṁ
ariyasaccaṁ desitaṁ tathā naṁ dhārehi. Yo hi koci bhikkhu samaṇo
vā brāhmaṇo vā evaṁ vadeyya netaṁ dukkhaṁ paṭhamaṁ ariyasaccaṁ
yaṁ 1 samaṇena gotamena desitaṁ ahametaṁ dukkhaṁ paṭhamaṁ ariyasaccaṁ
paccakkhāya aññaṁ dukkhaṁ paṭhamaṁ ariyasaccaṁ paññapessāmīti netaṁ
ṭhānaṁ vijjati. Dukkhasamudayo kho bhikkhu .pe. Dukkhanirodho kho
bhikkhu .pe. Dukkhanirodhagāminīpaṭipadā kho bhikkhu mayā catutthaṁ
ariyasaccaṁ desitaṁ tathā naṁ dhārehi. Yo hi koci bhikkhu samaṇo
vā brāhmaṇo vā evaṁ vadeyya netaṁ dukkhanirodhagāminīpaṭipadā
catutthaṁ ariyasaccaṁ yaṁ samaṇena gotamena desitaṁ ahametaṁ dukkhanirodhagāminīpaṭipadaṁ
catutthaṁ ariyasaccaṁ paccakkhāya aññaṁ dukkhanirodhagāminīpaṭipadaṁ
catutthaṁ ariyasaccaṁ paññapessāmīti netaṁ ṭhānaṁ vijjati.
Evaṁ kho tvaṁ bhikkhu dhārehi mayā cattāri ariyasaccāni desitāni.
Tasmā tiha bhikkhu idaṁ dukkhanti yogo karaṇīyo .pe. Ayaṁ
dukkhanirodhagāminī paṭipadāti yogo karaṇīyoti.