[1624] Kacci bhante bhagavā arogo ceva balavā cāti.
Arogo ceva āvuso bhagavā balavā cāti. Kacci pana bhante sārīputta-
moggallānā arogā ceva balavanto cāti. Sārīputtamoggallānāpi
kho āvuso arogā ceva balavanto cāti. Kacci pana bhante
bhikkhusaṅgho arogo ca balavā cāti. Bhikkhusaṅghopi kho āvuso
arogo ca balavā cāti. Atthi pana te bhante kiñci iminā
antaravassena bhagavato sammukhā sutaṁ sammukhā paṭiggahitanti.
Sammukhā metaṁ āvuso bhagavato sutaṁ sammukhā paṭiggahitaṁ appakā te
bhikkhave bhikkhū ye āsavānaṁ khayā anāsavaṁ cetovimuttiṁ paññāvimuttiṁ
diṭṭheva dhamme sayaṁ abhiññā sacchikatvā upasampajja
viharanti atha kho eteva bahutarā bhikkhū ye pañcannaṁ orambhāgiyānaṁ
saññojanānaṁ parikkhayā opapātikā tattha parinibbāyino anāvattidhammā
asmā lokāti. Aparaṁpi kho me āvuso bhagavato sammukhā
sutaṁ sammukhā paṭiggahitaṁ appakā te bhikkhave bhikkhū ye pañcannaṁ
orambhāgiyānaṁ saññojanānaṁ parikkhayā opapātikā tattha parinibbāyino
anāvattidhammā asmā lokā atha kho eteva bahutarā
Bhikkhū ye tiṇṇaṁ saññojanānaṁ parikkhayā rāgadosamohānaṁ tanuttā
sakadāgāmino sakideva imaṁ lokaṁ āgantvā dukkhassantaṁ karissantīti.
Aparaṁpi kho me āvuso bhagavato sammukhā sutaṁ sammukhā paṭiggahitaṁ
appakā te bhikkhave bhikkhū ye tiṇṇaṁ saññojanānaṁ parikkhayā
rāgadosamohānaṁ tanuttā sakadāgāmino sakideva imaṁ lokaṁ āgantvā
dukkhassantaṁ karissanti atha kho eteva bahutarā bhikkhū ye tiṇṇaṁ
saññojanānaṁ parikkhayā sotāpannā avinipātadhammā niyatā sambodhiparāyanāti.

[1625] Ekaṁ samayaṁ bhagavā bārāṇasiyaṁ viharati isipatane migadāye.
Atha kho dhammadinno upāsako pañcahi upāsakasatehi saddhiṁ yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho dhammadinno upāsako bhagavantaṁ etadavoca
ovadatu no bhante bhagavā anusāsatu no bhante bhagavā yaṁ
amhākaṁ assa dīgharattaṁ hitāya sukhāyāti. Tasmā tiha vo dhammadinnā
evaṁ sikkhitabbaṁ ye te suttantā tathāgatabhāsitā gambhīrā
gambhīratthā lokuttarā suññatapaṭisaṁyuttā te kālena kālaṁ upasampajja
viharissāmāti. Evañhi vo dhammadinna sikkhitabbanti.

[1626] Na kho netaṁ bhante sukaraṁ amhehi puttasambādhasayanaṁ
ajjhāvasantehi kāsikacandanaṁ paccanubhontehi mālāgandhavilepanaṁ
dhārayantehi jātarūparajataṁ sādiyantehi ye suttantā tathāgatabhāsitā
Gambhīrā gambhīratthā lokuttarā suññatapaṭisaṁyuttā te kālena
kālaṁ upasampajja viharituṁ tesanno bhante bhagavā amhākaṁ pañcasu
sikkhāpadesu ṭhitānaṁ uttariṁ dhammaṁ desetūti. Tasmā tiha vo
dhammadinna evaṁ sikkhitabbaṁ buddhe aveccappasādena samannāgatā
bhavissāma itipi so bhagavā .pe. Satthā devamanussānaṁ buddho
bhagavāti. Dhamme saṅghe. Ariyakantehi sīlehi samannāgatā
bhavissāma akkhaṇḍehi .pe. Samādhisaṁvattanikehīti. Evañhi vo
dhammadinna sikkhitabbanti. Yānīmāni bhante bhagavatā cattāri
sotāpattiyaṅgāni desitāni saṁvijjanti te dhammā amhesu mayaṁ ca
tesu dhammesu sandissāma. Mayañhi bhante buddhe aveccappasādena
samannāgatā itipi so bhagavā .pe. Satthā devamanussānaṁ
buddho bhagavāti. Dhamme saṅghe. Ariyakantehi sīlehi samannāgatā
bhavissāma akkhaṇḍehi .pe. Samādhisaṁvattanikehīti. Lābhā
vo dhammadinna suladdhaṁ vo dhammadinna sotāpattiphalaṁ dhammadinna
tumhehi byākatanti.

[1627] Ekaṁ samayaṁ bhagavā sakkesu viharati kapilavatthusmiṁ
nigrodhārāme. Tena kho pana samayena sambahulā bhikkhū bhagavato cīvarakammaṁ
karonti niṭṭhitacīvaro bhagavā temāsaccayena cārikaṁ pakkamissatīti.
Assosi kho mahānāmo sakko sambahulā kira bhikkhū bhagavato
cīvarakammaṁ karonti niṭṭhitacīvaro bhagavā temāsaccayena cārikaṁ
Pakkamissatīti. Atha kho mahānāmo sakko yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho mahānāmo sakko bhagavantaṁ etadavoca
sutammetaṁ bhante sambahulā kira bhikkhū bhagavato cīvarakammaṁ karonti
niṭṭhitacīvaro bhagavā temāsaccayena cārikaṁ pakkamissatīti. Na kho
netaṁ 1 bhante bhagavato sammukhā sutaṁ sammukhā paṭiggahitaṁ sappaññena
upāsakena sappañño upāsako ābādhiko dukkhito bāḷhagilāno
ovaditabboti.

[1628] Sappaññena mahānāma upāsakena sappañño upāsako
ābādhiko dukkhito bāḷhagilāno catūhi assāsaniyehi dhammehi
assāsetabbo. Assāsatāyasmā atthāyasmato buddhe aveccappasādo 2
itipi so bhagavā .pe. Satthā devamanussānaṁ buddho
bhagavāti. Assāsatāyasmā atthāyasmato dhamme saṅghe. Ariyakantāni
sīlāni akkhaṇḍāni .pe. Samādhisaṁvattanikānīti.

[1629] Sappaññena mahānāma upāsakena sappañño upāsako
ābādhiko dukkhito bāḷhagilāno imehi catūhi assāsaniyehi
dhammehi assāsetvā evamassa vacanīyo atthāyasmato mātāpitūsu
apekkhāti. So ce evaṁ vadeyya atthi me mātāpitūsu
apekkhāti. So evamassa vacanīyo āyasmā 3 kho māriso maraṇadhammo
sacepāyasmā mātāpitūsu apekkhaṁ karissati marissateva no
1 Ma. panetaṁ. Yu. na kho te etaṁ. 2 Yu. aveccappasādena. 3 Yu. āyasmāpi.
Cepāyasmā mātāpitūsu apekkhaṁ karissati marissateva sādhāyasmā
yā te mātāpitūsu apekkhā taṁ pajahāti. So ce evaṁ vadeyya
yā me mātāpitūsu apekkhā sā pahīnāti.

[1630] So evamassa vacanīyo atthi panāyasmato puttadāresu
apekkhāti. So ce evaṁ vadeyya atthi me puttadāresu
apekkhāti. So evamassa vacanīyo āyasmā kho māriso
maraṇadhammo sacepāyasmā puttadāresu apekkhaṁ karissati marissateva
no cepāyasmā puttadāresu apekkhaṁ karissati marissateva sādhāyasmā
yā te puttadāresu apekkhā taṁ pajahāti. So ce evaṁ
vadeyya yā me puttadāresu apekkhā sā pahīnāti.

[1631] So evamassa vacanīyo atthi panāyasmato mānusakesu
pañcasu kāmaguṇesu apekkhāti. So ce evaṁ vadeyya atthi me
mānusakesu pañcasu kāmaguṇesu apekkhāti. So evamassa vacanīyo
mānusakehi kho āvuso kāmehi dibbā kāmā abhikkantatarā ca
paṇītatarā ca sādhāyasmā mānusakehi kāmehi cittaṁ vuṭṭhāpetvā
cātummahārājikesu devesu cittaṁ adhimocehīti. So ce evaṁ vadeyya
mānusakehi me kāmehi cittaṁ vuṭṭhitaṁ cātummahārājikesu devesu
cittaṁ adhimocitanti.

[1632] So evamassa vacanīyo cātummahārājikehi kho āvuso
devehi tāvatiṁsā devā abhikkantatarā ca paṇītatarā ca sādhāyasmā
Cātummahārājikehi devehi cittaṁ vuṭṭhāpetvā tāvatiṁsesu devesu
cittaṁ adhimocehīti. So ce evaṁ vadeyya cātummahārājikehi
me devehi cittaṁ vuṭṭhitaṁ tāvatiṁsesu devesu cittaṁ adhimocitanti.
So evamassa vacanīyo tāvatiṁsehi kho āvuso devehi yāmā
devā. Tusitā devā. Nimmānaratī devā. Paranimmitavasavattino
devā. Paranimmitavasavattīhi kho āvuso devehi brahmaloko
abhikkantataro ca paṇītataro ca sādhāyasmā paranimmitavasavattīhi
devehi cittaṁ vuṭṭhāpetvā brahmaloke cittaṁ adhimocehīti. So
ce evaṁ vadeyya paranimmitavasavattīhi me devehi cittaṁ vuṭṭhitaṁ
brahmaloke cittaṁ adhimocitanti.

[1633] So evamassa vacanīyo brahmalokopi kho āvuso
anicco addhuvo sakkāyapariyāpanno sādhāyasmā brahmalokā cittaṁ
vuṭṭhāpetvā sakkāyanirodhe cittaṁ upasaṁharāti. So ce evaṁ vadeyya
brahmalokā me cittaṁ vuṭṭhitaṁ sakkāyanirodhe cittaṁ upasaṁhatanti 1 .
Evaṁ vimuttacittassa kho mahānāma upāsakassa vassasataṁ 2 vimuttacittena
bhikkhunā na kiñci nānākaraṇaṁ vadāmi yadidaṁ vimuttiyā
vimuttanti 3 .