[1604] Imehi kho bhikkhave catūhi puññābhisandehi kusalābhisandehi
samannāgatassa ariyasāvakassa na sukaraṁ puññassa pamāṇaṁ
gaṇetuṁ ettako puññābhisando kusalābhisando sukhassāhāroti
atha kho asaṅkheyyo appameyyo mahāpuññakkhandhotveva saṅkhaṁ
gacchati.

[1605] Seyyathāpi bhikkhave mahāsamudde na sukaraṁ udakassa
pamāṇaṁ gaṇetuṁ ettakāni udakāḷhakāni iti vā ettakāni
udakāḷhakasatāni iti vā ettakāni udakāḷhakasahassāni iti
vā ettakāni udakāḷhakasatasahassāni iti vāti atha kho
Asaṅkheyyo appameyyo mahāudakakkhandhotveva saṅkhaṁ gacchati.
Evameva kho bhikkhave imehi catūhi puññābhisandehi kusalābhisandehi
samannāgatassa ariyasāvakassa na sukaraṁ puññassa pamāṇaṁ gaṇetuṁ
ettako puññābhisando kusalābhisando sukhassāhāroti atha kho
asaṅkheyyo appameyyo mahāpuññakkhandhotveva saṅkhaṁ gacchatīti.
Idamavoca bhagavā [1]-

[1606] Mahodadhiṁ aparimitaṁ mahāsaraṁ bahubheravaṁ ratanagaṇānamālayaṁ
najjo yathā naragaṇasaṅghasevitā puthū 2 savantī upayanti sāgaraṁ.
Evaṁ naraṁ annapānavatthadadaṁ 3 seyyānisajjattharaṇassa 4 dāyakaṁ
puññassa dhārā upayanti paṇḍitaṁ najjo yathā vārivahāva sāgaranti.

[1607] Cattārome bhikkhave puññābhisandā kusalābhisandā
sukhassāhārā. Katame cattāro. Idha bhikkhave ariyasāvako
buddhe aveccappasādena samannāgato hoti itipi so bhagavā
.pe. Satthā devamanussānaṁ buddho bhagavāti. Ayaṁ paṭhamo
puññābhisando kusalābhisando sukhassāhāro. Puna caparaṁ bhikkhave
ariyasāvako dhamme saṅghe. Vigatamalamaccherena cetasā agāraṁ
ajjhāvasati muttacāgo payatapāṇī vossaggarato yācayogo dānasaṁvibhāgarato.
Ayaṁ catuttho puññābhisando kusalābhisando
1 Ma. idaṁ vatvāna sugato athāparaṁ etadavoca satthā. ito paraṁ īdisameva.
2 Yu. puthu savanti. evamupari. 3 Sī. annadapānadavatthadaṁ.
4 Ma. seyyāni paccattharaṇassa. evamupari.
Sukhassāhāro. Ime kho bhikkhave cattāro puññābhisandā kusalābhisandā
sukhassāhārā.

[1608] Imehi kho bhikkhave catūhi puññābhisandehi kusalābhisandehi
samannāgatassa ariyasāvakassa na sukaraṁ puññassa pamāṇaṁ
gaṇetuṁ ettako puññābhisando kusalābhisando sukhassāhāroti
atha kho asaṅkheyyo appameyyo mahāpuññakkhandhotveva saṅkhaṁ
gacchati.

[1609] Seyyathāpi bhikkhave yatthimā mahānadiyo saṁsandanti
samenti. Seyyathīdaṁ. Gaṅgā yamunā aciravatī sarabhū mahī tattha
na sukaraṁ udakassa pamāṇaṁ gaṇetuṁ ettakāni udakāḷhakāni iti
vā ettakāni udakāḷhakasatāni iti vā ettakāni udakāḷhakasahassāni
iti vā ettakāni udakāḷhakasatasahassāni iti vāti
atha kho asaṅkheyyo appameyyo mahāudakakkhandhotveva saṅkhaṁ
gacchati. Evameva kho bhikkhave imehi catūhi puññābhisandehi
kusalābhisandehi samannāgatassa ariyasāvakassa na sukaraṁ puññassa
pamāṇaṁ gaṇetuṁ ettako puññābhisando kusalābhisando
sukhassāhāroti atha kho asaṅkheyyo appameyyo mahāpuññakkhandhotveva
saṅkhaṁ gacchatīti. Idamavoca bhagavā

[1610] Mahodadhiṁ aparimitaṁ mahāsaraṁ bahubheravaṁ ratanagaṇānamālayaṁ
najjo yathā naragaṇasaṅghasevitā puthū savantī upayanti sāgaraṁ.
Evaṁ naraṁ annapānavatthadadaṁ seyyānisajjattharaṇassa dāyakaṁ
puññassa dhārā upayanti paṇḍitaṁ najjo yathā vārivahāva sāgaranti.

[1611] Cattārome bhikkhave puññābhisandā kusalābhisandā
sukhassāhārā. Katame cattāro. Idha bhikkhave ariyasāvako
buddhe aveccappasādena samannāgato hoti itipi so bhagavā
.pe. Satthā devamanussānaṁ buddho bhagavāti. Ayaṁ paṭhamo
puññābhisando kusalābhisando sukhassāhāro. Puna caparaṁ bhikkhave
ariyasāvako dhamme saṅghe. Paññavā hoti udayatthagāminiyā
paññāya samannāgato ariyāya nibbedhikāya sammādukkhayagāminiyā.
Ayaṁ catuttho puññābhisando kusalābhisando sukhassāhāro. Ime
kho bhikkhave cattāro puññābhisandā kusalābhisandā sukhassāhārā.

[1612] Imehi kho bhikkhave catūhi puññābhisandehi kusalābhisandehi
samannāgatassa ariyasāvakassa na sukaraṁ puññassa pamāṇaṁ
gaṇetuṁ ettako puññābhisando kusalābhisando sukhassāhāroti
atha kho asaṅkheyyo appameyyo mahāpuññakkhandhotveva saṅkhaṁ
gacchatīti. Idamavoca bhagavā

[1613] Yo puññakāmo kusale patiṭṭhito
bhāveti maggaṁ amatassa pattiyā
so dhammasārādhigamo khaye rato
na vedhati maccurājāgamasminti 1 .