[1594] Kittāvatā pana bhante upāsako paññāsampanno
hotīti. Idha mahānāma upāsako paññavā hoti udayatthagāminiyā
paññāya samannāgato ariyāya nibbedhikāya sammādukkhakkhayagāminiyā.
Ettāvatā kho mahānāma upāsako paññāsampanno hotīti.

[1595] Seyyathāpi bhikkhave uparipabbate thullaphusitake deve
vassante taṁ udakaṁ yathāninnaṁ pavattamānaṁ pabbatakandarapadarasākhā
paripūreti pabbatakandarapadarasākhā paripūrā kussobbhe 1 paripūrenti 2
kussobbhā paripūrā mahāsobbhe paripūrenti mahāsobbhā paripūrā
kunnadiyo paripūrenti kunnadiyo paripūrā mahānadiyo paripūrenti
mahānadiyo paripūrā mahāsamuddasāgaraṁ 3 paripūrenti. Evameva kho
bhikkhave ariyasāvakassa yo ca buddhe aveccappasādo yo ca dhamme
aveccappasādo yo ca saṅghe aveccappapasādo yāni ca ariyakantāni
sīlāni ime dhammā saṁsandamānā pāraṁ gantvā āsavānaṁ khayāya
saṁvattantīti.

[1596] Ekaṁ samayaṁ bhagavā sakkesu viharati kapilavatthusmiṁ
nigrodhārāme. Atha kho bhagavā pubbaṇhasamayaṁ nivāsetvā pattacīvaramādāya
yena kāḷigodhāya sākiyāniyā nivesanaṁ tenupasaṅkami upasaṅkamitvā
paññatte āsane nisīdi. Atha kho kāḷigodhā
1 Ma. kusobbhe. Yu. kussubbhe. 2 Yu. paripūreti. 3 Ma. mahāsamuddaṁ.
Sākiyānī yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinnaṁ kho kāḷigodhaṁ
sākiyāniṁ bhagavā 1 etadavoca

[1597] Catūhi kho godhe dhammehi samannāgatā ariyasāvikā
sotāpannā hoti avinipātadhammā niyatā sambodhiparāyanā. Katamehi
catūhi. Idha godhe ariyasāvikā buddhe aveccappasādena samannāgatā
hoti itipi so bhagavā .pe. Satthā devamanussānaṁ buddho bhagavāti.
Dhamme saṅghe. Vigatamalamaccherena cetasā agāraṁ ajjhāvasati muttacāgā
payatapāṇi 2 vossaggaratā yācayogā dānasaṁvibhāgaratā. Imehi
kho godhe catūhi dhammehi samannāgatā ariyasāvikā sotāpannā hoti
avinipātadhammā niyatā sambodhiparāyanāti.

[1598] Yānīmāni bhante bhagavatā cattāri sotāpattiyaṅgāni
desitāni saṁvijjante te dhammā mayi ahañca tesu dhammesu
sandissāmi. Ahañhi bhante buddhe aveccappasādena samannāgatā
itipi so bhagavā .pe. Satthā devamanussānaṁ buddho bhagavāti.
Dhamme saṅghe. Yaṁ kho pana kiñci kule deyyadhammaṁ sabbantaṁ
appaṭivibhattaṁ sīlavantehi kalyāṇadhammehīti. Lābhā te godhe
suladdhante godhe sotāpattiphalante godhe byākatanti.

[1599] Ekaṁ samayaṁ bhagavā sakkesu viharati kapilavatthusmiṁ
nigrodhārāme. Atha kho nandiyo sakko yena bhagavā tenupasaṅkami
1 Yu. ayaṁ pāṭho natthi. 2 Ma. payatapāṇinī.
Upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho nandiyo sakko bhagavantaṁ etadavoca

[1600] Yasseva nu kho bhante ariyasāvakassa cattāri
sotāpattiyaṅgāni sabbena sabbaṁ sabbathā sabbaṁ natthi sveva nu kho
bhante ariyasāvako pamādavihārīti vuccati. Yassa kho nandiya
cattāri sotāpattiyaṅgāni sabbena sabbaṁ sabbathā sabbaṁ natthi
tamahaṁ bāhiro puthujjanapakkhe ṭhitoti vadāmi. Apica nandiya
yathā ariyasāvako pamādavihārī ceva hoti appamādavihārī ca taṁ
suṇāhi sādhukaṁ manasikarohi bhāsissāmīti. Evaṁ bhanteti kho
nandiyo sakko bhagavato paccassosi. Bhagavā etadavoca

[1601] Kathañca nandiya ariyasāvako pamādavihārī hoti. Idha
nandiya ariyasāvako buddhe aveccappasādena samannāgato hoti
itipi so bhagavā .pe. Satthā devamanussānaṁ buddho bhagavāti.
So tena buddhe aveccappasādena santuṭṭho na uttariṁ vāyamati
divā pavivekāya rattiyā 1 paṭisallānāya. Tassa evaṁ pamattassa
viharato pāmujjaṁ 2 na hoti pāmujje asati pīti na hoti pītiyā asati
passaddhi na hoti passaddhiyā asati dukkhaṁ viharati dukkhino cittaṁ
na samādhiyati asamāhite citte dhammā na pātubhavanti. Dhammānaṁ
apātubhāvā pamādavihārītveva saṅkhaṁ 3 gacchati. Puna caparaṁ nandiya
ariyasāvako. Dhamme saṅghe. Ariyakantehi sīlehi samannāgato
1 Ma. Yu. rattiṁ. evamupari. 2 Ma. sabbattha pāmojjaṁ.
Hoti akkhaṇḍehi .pe. Samādhisaṁvattanikehi. So tehi ariyakantehi
sīlehi santuṭṭho na uttariṁ vāyamati divā pavivekāya
rattiyā paṭisallānāya. Tassa evaṁ pamattassa viharato pāmujjaṁ
na hoti pāmujje asati pīti na hoti pītiyā asati passaddhi
na hoti passaddhiyā asati dukkhaṁ viharati dukkhino cittaṁ na
samādhiyati asamāhite citte dhammā na pātubhavanti. Dhammānaṁ
apātubhāvā pamādavihārītveva saṅkhaṁ gacchati. Evaṁ kho nandiya
ariyasāvako pamādavihārī hoti.

[1602] Kathañca nandiya ariyasāvako appamādavihārī hoti.
Idha nandiya ariyasāvako buddhe aveccappasādena samannāgato
hoti itipi so bhagavā .pe. Satthā devamanussānaṁ buddho
bhagavāti. So tena buddhe aveccappasādena asantuṭṭho uttariṁ
vāyamati divā pavivekāya rattiyā paṭisallānāya. Tassa evaṁ
appamattassa viharato pāmujjaṁ jāyati pamuditassa pīti jāyati
pītimanassa kāyo passambhati passaddhakāyo sukhaṁ vedayati 1 sukhino
cittaṁ samādhiyati samāhite citte dhammā pātubhavanti. Dhammānaṁ
pātubhāvā appamādavihārītveva saṅkhaṁ gacchati. Puna caparaṁ nandiya
ariyasāvako dhamme saṅghe. Ariyakantehi sīlehi samannāgato
hoti akkhaṇḍehi .pe. Samādhisaṁvattanikehi. So tehi ariyakantehi
sīlehi asantuṭṭho uttariṁ vāyamati divā pavivekāya rattiyā
1 Ma. Yu. sabbattha vediyati.
Paṭisallānāya. Tassa evaṁ appamattassa viharato pāmujjaṁ jāyati
pamuditassa pīti jāyati pītimanassa kāyo passambhati passaddhakāyo
sukhaṁ vedayati sukhino cittaṁ samādhiyati samāhite citte
dhammā pātubhavanti. Dhammānaṁ pātubhāvā appamādavihārītveva
saṅkhaṁ gacchati. Evaṁ kho nandiya ariyasāvako appamādavihārī
hotīti.
Puññābhisandavaggo catuttho.
Tassuddānaṁ
abhisandena 1 tayo vuttā dve devapadāni ca
sabhāgataṁ mahānāmo vāsī 2 kāḷi ca nandiyāti.
-------------
1 Ma. Yu. abhisandā. 2 Ma. Yu. vassaṁ.
Sagāthakapuññābhisandavaggo pañcamo

[1603] Cattārome bhikkhave puññābhisandā kusalābhisandā
sukhassāhārā. Katame cattāro. Idha bhikkhave ariyasāvako
buddhe aveccappasādena samannāgato hoti itipi so bhagavā
.pe. Satthā devamanussānaṁ buddho bhagavāti. Ayaṁ paṭhamo
puññābhisando kusalābhisando sukhassāhāro. Puna caparaṁ bhikkhave
ariyasāvako dhamme saṅghe. Ariyakantehi sīlehi samannāgato
hoti akkhaṇḍehi .pe. Samādhisaṁvattanikehi. Ayaṁ catuttho
puññābhisando kusalābhisando sukhassāhāro. Ime kho bhikkhave
cattāro puññābhisandā kusalābhisandā sukhassāhārā.