[1294] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā sattānaṁ nānādhimuttikataṁ yathābhūtaṁ pajānāmīti.

[1295] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā parasattānaṁ parapuggalānaṁ indriyaparopariyattaṁ
yathābhūtaṁ pajānāmīti.

[1296] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā jhānavimokkhasamādhisamāpattīnaṁ saṅkilesaṁ
vodānaṁ vuṭṭhānaṁ yathābhūtaṁ pajānāmīti.

[1297] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā anekavihitaṁ pubbenivāsaṁ anussarāmi.
Seyyathīdaṁ. Ekaṁpi jātiṁ dvepi jātiyo .pe. Iti sākāraṁ sauddesaṁ
anekavihitaṁ pubbenivāsaṁ anussarāmīti.

[1298] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā dibbena cakkhunā visuddhena atikkantamānusakena
satte passāmi cavamāne upapajjamāne .pe. Iti dibbena
cakkhunā visuddhena atikkantamānusakena .pe. Yathākammūpage satte
pajānāmīti.

[1299] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā āsavānaṁ khayā anāsavaṁ cetovimuttiṁ paññāvimuttiṁ
diṭṭheva dhamme sayaṁ abhiññā sacchikatvā upasampajja
viharāmīti.
Dutiyo vaggo.
Tassuddānaṁ
sahassaṁ iddhi atha pana cetopariccaṭṭhānametīṇi
paṭidoliko nānādhimutti indriyaṁ jānanti tisso vijjāti 1 .
Anuruddhasaṁyuttaṁ niṭṭhitaṁ.
-------
1 Ma. mahābhiññaṁ iddhi dibbaṁ ceto pariyaṁ ṭhānaṁ kammaṁ
sabbattha dhātudhimutti jhānaṁ tisso vijjāti.
Jhānasaṁyuttaṁ

[1300] Sāvatthī. Tatra kho cattārome bhikkhave jhānā.
Katame cattāro. Idha bhikkhave bhikkhu vivicceva kāmehi vivicca
akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ
upasampajja viharati vitakkavicārānaṁ vūpasamā ajjhattaṁ sampasādanaṁ
cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ
upasampajja viharati pītiyā ca virāgā upekkhako ca viharati
sato ca sampajāno sukhañca kāyena paṭisaṁvedeti yantaṁ ariyā
ācikkhanti upekkhako satimā sukhavihārīti tatiyaṁ jhānaṁ upasampajja
viharati sukhassa ca pahānā dukkhassa ca pahānā pubbeva somanassadomanassānaṁ
atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ
upasampajja viharati. Ime kho bhikkhave cattāro jhānāti.

[1301] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā. Evameva kho bhikkhave bhikkhu cattāro
jhāne bhāvento cattāro jhāne bahulīkaronto nibbānaninno
hoti nibbānapoṇo nibbānapabbhāro.

[1302] Kathañca bhikkhave bhikkhu cattāro jhāne bhāvento
cattāro jhāne bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu vivicceva kāmehi vivicca
akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ
Upasampajja viharati vitakkavicārānaṁ vūpasamā .pe. Dutiyaṁ jhānaṁ.
Tatiyaṁ jhānaṁ. Catutthaṁ jhānaṁ upasampajja viharati. Evaṁ kho bhikkhave
bhikkhu cattāro jhāne bhāvento cattāro jhāne bahulīkaronto
nibbānaninno hoti nibbānapoṇo nibbānapabbhāroti. (evaṁ
yāva esanā pāli vitthāretabbā).

[1303] Pañcimāni bhikkhave uddhambhāgiyāni saññojanāni.
Katamāni pañca. Rūparāgo arūparāgo māno uddhaccaṁ avijjā.
Imāni kho bhikkhave pañcuddhambhāgiyāni saññojanāni.