[1284] Catūsu kho me āvuso satipaṭṭhānesu sūpaṭṭhitacittassa
viharato uppannā sārīrikā dukkhā vedanā cittaṁ na pariyādāya
tiṭṭhanti. Katamesu catūsu. Idhāhaṁ āvuso kāye kāyānupassī
viharāmi. Vedanāsu citte dhammesu dhammānupassī viharāmi
ātāpī sampajāno satimā vineyya loke abhijjhādomanassaṁ.
1-2 Ma. Yu. vata.
Imesu kho me āvuso catūsu satipaṭṭhānesu sūpaṭṭhitacittassa
viharato uppannā sārīrikā dukkhā vedanā cittaṁ na pariyādāya
tiṭṭhantīti.
Rahogatavaggo paṭhamo.
Tassuddānaṁ
rahogatena dve vuttā sutanukaṇṭakī tayo
taṇhakkhayasalaḷāgāraṁ ambapāligilāyananti 1 .
-----------
1 Ma. ambapāli ca gilānanti. Yu. sabbaṁ bāḷhagilāyananti.
Dutiyavaggo dutiyo

[1285] Ekaṁ samayaṁ āyasmā anuruddho sāvatthiyaṁ viharati
jetavane anāthapiṇḍikassa ārāme. Atha kho sambahulā bhikkhū
yenāyasmā anuruddho tenupasaṅkamiṁsu upasaṅkamitvā āyasmatā
anuruddhena .pe. Ekamantaṁ nisinnā kho te bhikkhū āyasmantaṁ
anuruddhaṁ etadavocuṁ katamesaṁ āyasmā anuruddho dhammānaṁ bhāvitattā
bahulīkatattā mahābhiññattaṁ pattoti.

[1286] Catunnaṁ khvāhaṁ āvuso satipaṭṭhānānaṁ bhāvitattā bahulīkatattā
mahābhiññattaṁ patto. Katamesaṁ catunnaṁ. Idhāhaṁ
āvuso kāye kāyānupassī viharāmi. Vedanāsu citte dhammesu
dhammānupassī viharāmi ātāpī sampajāno satimā vineyya loke
abhijjhādomanassaṁ. Imesaṁ khvāhaṁ āvuso catunnaṁ satipaṭṭhānānaṁ
bhāvitattā bahulīkatattā mahābhiññattaṁ patto. Imesañca panāhaṁ
āvuso catunnaṁ satipaṭṭhānānaṁ bhāvitattā bahulīkatattā kappasahassaṁ
anussarāmīti.

[1287] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā anekavihitaṁ iddhividhaṁ paccanubhomi ekopi
hutvā bahudhā homi .pe. Yāva brahmalokāpi kāyena vasaṁ vattemīti.

[1288] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā dibbāya sotadhātuyā visuddhāya atikkantamānusikāya
ubho sadde suṇāmi dibbe ca mānuse ca ye dūre
santike cāti.

[1289] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā parasattānaṁ parapuggalānaṁ cetasā ceto paricca
jānāmi sarāgaṁ vā cittaṁ sarāgaṁ cittanti pajānāmi .pe.
Vimuttaṁ cittanti pajānāmīti.

[1290] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā ṭhānañca ṭhānato aṭṭhānañca aṭṭhānato
yathābhūtaṁ pajānāmīti.

[1291] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā atītānāgatapaccuppannānaṁ kammasamādānānaṁ
ṭhānaso hetuso vipākaṁ yathābhūtaṁ pajānāmīti.

[1292] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā sabbatthagāminīpaṭipadaṁ yathābhūtaṁ pajānāmīti.

[1293] Imesañca panāhaṁ āvuso catunnaṁ satipaṭṭhānānaṁ
bhāvitattā bahulīkatattā anekadhātunānādhātulokaṁ yathābhūtaṁ pajānāmīti.