[1264] Atha kho āyasmā mahāmoggallāno āyasmato
anuruddhassa cetasā cetoparivitakkamaññāya seyyathāpi nāma balavā
puriso sammiñjitaṁ vā bāhaṁ pasāreyya pasāritaṁ vā bāhaṁ
Sammiñjeyya evameva āyasmato anuruddhassa sammukhe pāturahosi.

[1265] Atha kho āyasmā mahāmoggallāno āyasmantaṁ
anuruddhaṁ etadavoca kittāvatā nu kho āvuso anuruddha bhikkhuno
cattāro satipaṭṭhānā āraddhā hontīti.

[1266] Idhāvuso bhikkhu ajjhattaṁ kāye kāyānupassī viharati
ātāpī sampajāno satimā vineyya loke abhijjhādomanassaṁ. Bahiddhā
kāye kāyānupassī viharati ātāpī .pe. Ajjhattabahiddhā kāye
kāyānupassī viharati ātāpī sampajāno satimā vineyya loke
abhijjhādomanassaṁ.

[1267] Ajjhattaṁ vedanāsu vedanānupassī viharati ātāpī
sampajāno satimā vineyya loke abhijjhādomanassaṁ. Bahiddhā
vedanāsu vedanānupassī viharati ātāpī sampajāno satimā vineyya
loke abhijjhādomanassaṁ. Ajjhattabahiddhā vedanāsu vedanānupassī
viharati ātāpī sampajāno satimā vineyya loke abhijjhādomanassaṁ.

[1268] Ajjhattaṁ citte. Bahiddhā citte. Ajjhattabahiddhā
citte cittānupassī viharati ātāpī sampajāno satimā vineyya
loke abhijjhādomanassaṁ.

[1269] Ajjhattaṁ dhammesu. Bahiddhā dhammesu. Ajjhattabahiddhā
dhammesu dhammānupassī viharati ātāpī sampajāno satimā
vineyya loke abhijjhādomanassaṁ. Ettāvatā kho āvuso
Bhikkhuno cattāro satipaṭṭhānā āraddhā hontīti.

[1270] Ekaṁ samayaṁ āyasmā anuruddho sāvatthiyaṁ viharati
sutanutīre. Atha kho sambahulā bhikkhū yenāyasmā anuruddho
tenupasaṅkamiṁsu upasaṅkamitvā āyasmatā anuruddhena saddhiṁ sammodiṁsu
sammodanīyaṁ kathaṁ sārāṇīyaṁ 1 vītisāretvā ekamantaṁ nisīdiṁsu. Ekamantaṁ
nisinnā kho te bhikkhū āyasmantaṁ anuruddhaṁ etadavocuṁ katamesaṁ
āyasmā anuruddho dhammānaṁ bhāvitattā bahulīkatattā mahābhiññattaṁ 2
pattoti.

[1271] Catunnaṁ khvāhaṁ āvuso satipaṭṭhānānaṁ bhāvitattā
bahulīkatattā mahābhiññattaṁ patto. Katamesaṁ catunnaṁ. Idhāvuso
kāye kāyānupassī viharāmi ātāpī sampajāno satimā vineyya
loke abhijjhādomanassaṁ. Vedanāsu citte dhammesu dhammānupassī
viharāmi ātāpī sampajāno satimā vineyya loke abhijjhādomanassaṁ.
Imesaṁ khvāhaṁ āvuso catunnaṁ satipaṭṭhānānaṁ bhāvitattā
bahulīkatattā mahābhiññattaṁ patto. Imesañca panāhaṁ āvuso
catunnaṁ satipaṭṭhānānaṁ bhāvitattā bahulīkatattā hīnaṁ dhammaṁ hīnato
abbhaññāsiṁ majjhimaṁ dhammaṁ majjhimato abbhaññāsiṁ paṇītaṁ
dhammaṁ paṇītato abbhaññāsinti.

[1272] Ekaṁ samayaṁ āyasmā ca anuruddho āyasmā ca
sārīputto āyasmā ca mahāmoggallāno sākete viharanti kaṇṭakīvane.
1 Ma. sabbattha sāraṇīyaṁ. 2 Ma. mahābhiññataṁ Yu. mahābhiññātaṁ. evamupari.
Atha kho āyasmā ca sārīputto āyasmā ca
mahāmoggallāno sāyaṇhasamayaṁ paṭisallānā vuṭṭhitā yenāyasmā
anuruddho tenupasaṅkamiṁsu upasaṅkamitvā āyasmatā anuruddhena
saddhiṁ sammodiṁsu sammodanīyaṁ kathaṁ sārāṇīyaṁ vītisāretvā ekamantaṁ
nisīdiṁsu. Ekamantaṁ nisinno kho āyasmā sārīputto āyasmantaṁ
anuruddhaṁ etadavoca sekkhenāvuso 1 anuruddha bhikkhunā katame dhammā
upasampajja vihātabbāti.

[1273] Sekkhenāvuso sārīputta bhikkhunā cattāro satipaṭṭhānā
upasampajja vihātabbā. Katame cattāro. Idhāvuso bhikkhu
kāye kāyānupassī viharati. Vedanāsu citte dhammesu dhammānupassī
viharati ātāpī sampajāno satimā vineyya loke abhijjhādomanassaṁ.
Sekkhenāvuso sārīputta bhikkhunā ime cattāro
satipaṭṭhānā upasampajja vihātabbāti.