[814] Catunnaṁ bhikkhave satipaṭṭhānānaṁ bhāvanaṁ desissāmi taṁ
suṇātha. Katamā bhikkhave catunnaṁ satipaṭṭhānānaṁ bhāvanā. Idha
bhikkhave bhikkhu kāye kāyānupassī viharati ātāpī sampajāno satimā
vineyya loke abhijjhādomanassaṁ. Vedanāsu citte dhammesu dhammānupassī
viharati ātāpī sampajāno satimā vineyya loke abhijjhādomanassaṁ.
Ayaṁ kho bhikkhave catunnaṁ satipaṭṭhānānaṁ bhāvanāti.

[815] Satipaṭṭhānañca vo bhikkhave desissāmi satipaṭṭhānabhāvanañca
satipaṭṭhānabhāvanāgāminiñca paṭipadaṁ taṁ suṇātha.
Katamañca bhikkhave satipaṭṭhānaṁ. Idha bhikkhave bhikkhu kāye
kāyānupassī viharati ātāpī sampajāno satimā vineyya loke
abhijjhādomanassaṁ. Vedanāsu citte dhammesu dhammānupassī viharati
Ātāpī sampajāno satimā vineyya loke abhijjhādomanassaṁ. Idaṁ
vuccati bhikkhave satipaṭṭhānaṁ.

[816] Katamā ca bhikkhave satipaṭṭhānabhāvanā. Idha bhikkhave
bhikkhu samudayadhammānupassī kāyasmiṁ viharati vayadhammānupassī kāyasmiṁ
viharati samudayavayadhammānupassī kāyasmiṁ viharati ātāpī sampajāno
satimā vineyya loke abhijjhādomanassaṁ. Samudayadhammānupassī vedanāsu
viharati vayadhammānupassī vedanāsu viharati samudayavayadhammānupassī
vedanāsu viharati. Tathā citte. Dhammesu viharati ātāpī
sampajāno satimā vineyya loke abhijjhādomanassaṁ. Ayaṁ vuccati
bhikkhave satipaṭṭhānabhāvanā.

[817] Katamā ca bhikkhave satipaṭṭhānabhāvanāgāminī paṭipadā.
Ayameva ariyo aṭṭhaṅgiko maggo. Seyyathīdaṁ. Sammādiṭṭhi
sammāsaṅkappo sammāvācā sammākammanto sammāājīvo
sammāvāyāmo sammāsati sammāsamādhi. Ayaṁ vuccati bhikkhave
satipaṭṭhānabhāvanāgāminī paṭipadāti.
Ananussutavaggo catuttho.
Tassuddānaṁ
ananussutaṁ virāgo ca viraddho bhāvanā sato
aññaṁ chandaṁ pariññāya bhāvanā vibhaṅgena te dasāti 1 .
-----------
1 Ma. ananussutaṁ virāgo viraddho bhāvanāsati
aññā chandaṁ pariññāya bhāvanā vibhaṅgena cāti.
Amatavaggo pañcamo

[818] Sāvatthīnidānaṁ. Catūsu bhikkhave satipaṭṭhānesu supatiṭṭhitacittā
viharatha mā vo amataṁ panassa. Katamesu catūsu. Idha
bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Imesu bhikkhave catūsu satipaṭṭhānesu
supatiṭṭhitacittā viharatha mā vo amataṁ panassāti.

[819] Sāvatthīnidānaṁ. Catunnaṁ bhikkhave satipaṭṭhānānaṁ samudayañca
atthaṅgamañca desissāmi taṁ suṇātha. Ko ca bhikkhave kāyassa
samudayo. Āhārasamudayā kāyassa samudayo āhāranirodhā kāyassa
atthaṅgamo phassasamudayā vedanānaṁ samudayo phassanirodhā vedanānaṁ
atthaṅgamo nāmarūpasamudayā cittassa samudayo nāmarūpanirodhā
cittassa atthaṅgamo manasikārasamudayā dhammānaṁ samudayo manasikāranirodhā
dhammānaṁ atthaṅgamoti.

[820] Sāvatthīnidānaṁ. Ekamidāhaṁ bhikkhave samayaṁ uruvelāyaṁ
viharāmi najjā nerañjarāya tīre ajapālanigrodhe paṭhamābhisambuddho.
Tassa mayhaṁ bhikkhave rahogatassa paṭisallīnassa evaṁ cetaso
parivitakko udapādi

[821] Ekāyanvāyaṁ maggo sattānaṁ visuddhiyā sokaparidevānaṁ
samatikkamāya dukkhadomanassānaṁ atthaṅgamāya ñāyassa adhigamāya
nibbānassa sacchikiriyāya yadidaṁ cattāro satipaṭṭhānā. Katame
cattāro. Kāye vā bhikkhu kāyānupassī vihareyya. Vedanāsu
vā bhikkhu vedanānupassī vihareyya. Citte vā bhikkhu cittānupassī
vihareyya. Dhammesu vā bhikkhu dhammānupassī vihareyya ātāpī
sampajāno satimā vineyya loke abhijjhādomanassaṁ. Ekāyanvāyaṁ
maggo sattānaṁ visuddhiyā sokaparidevānaṁ samatikkamāya
dukkhadomanassānaṁ atthaṅgamāya ñāyassa adhigamāya nibbānassa
sacchikiriyāya yadidaṁ cattāro satipaṭṭhānā 1 .

[822] Atha kho bhikkhave brahmā sahampati mama cetasā
cetoparivitakkamaññāya seyyathāpi nāma balavā puriso sammiñjitaṁ
vā bāhaṁ pasāreyya pasāritaṁ vā bāhaṁ sammiñjeyya evameva
brahmaloke antarahito mama purato pāturahosi. Atha kho bhikkhave
brahmā sahampati ekaṁsaṁ uttarāsaṅgaṁ karitvā yenāhaṁ tenañjaliṁ
paṇāmetvā maṁ etadavoca

[823] Evametaṁ bhagavā evametaṁ sugata ekāyanvāyaṁ bhante
maggo sattānaṁ visuddhiyā sokaparidevānaṁ samatikkamāya
dukkhadomanassānaṁ atthaṅgamāya ñāyassa adhigamāya nibbānassa
sacchikiriyāya yadidaṁ cattāro satipaṭṭhānā. Katame cattāro.
1 Ma. Yu. itisaddo atthi.
Kāye vā bhante bhikkhu kāyānupassī vihareyya. Vedanāsu vā.
Citte vā. Dhammesu vā bhante bhikkhu dhammānupassī vihareyya
ātāpī sampajāno satimā vineyya loke abhijjhādomanassaṁ.
Ekāyanvāyaṁ bhante maggo sattānaṁ visuddhiyā sokaparidevānaṁ
samatikkamāya dukkhadomanassānaṁ atthaṅgamāya ñāyassa adhigamāya
nibbānassa sacchikiriyāya yadidaṁ cattāro satipaṭṭhānāti.