[834] Ye bhikkhave anukampeyyātha ye ca sotabbaṁ maññeyyuṁ
mittā vā amaccā vā ñātī vā sālohitā vā te vo
bhikkhave catunnaṁ satipaṭṭhānānaṁ bhāvanāya samādapetabbā nivesetabbā
patiṭṭhāpetabbāti. Katamesaṁ catunnaṁ. Idha bhikkhave bhikkhu kāye
kāyānupassī viharati ātāpī sampajāno satimā vineyya loke
abhijjhādomanassaṁ. Vedanāsu citte dhammesu dhammānupassī viharati
ātāpī sampajāno satimā vineyya loke abhijjhādomanassaṁ.
Ye bhikkhave anukampeyyātha ye ca sotabbaṁ maññeyyuṁ mittā
Vā amaccā vā ñātī vā sālohitā vā te vo bhikkhave
imesaṁ catunnaṁ satipaṭṭhānānaṁ bhāvanāya samādapetabbā nivesetabbā
patiṭṭhāpetabbāti.

[835] Tisso imā bhikkhave vedanā. Katamā tisso.
Sukhā vedanā dukkhā vedanā adukkhamasukhā vedanā. Imā
kho bhikkhave tisso vedanā.

[836] Imāsaṁ kho bhikkhave tissannaṁ vedanānaṁ pariññāya
cattāro satipaṭṭhānā bhāvetabbā. Katame cattāro. Idha
bhikkhave bhikkhu kāye kāyānupassī viharati ātāpī sampajāno satimā
vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Imāsaṁ kho bhikkhave tissannaṁ vedanānaṁ pariññāya
ime cattāro satipaṭṭhānā bhāvetabbāti.

[837] Tayome bhikkhave āsavā. Katame tayo. Kāmāsavo
bhavāsavo avijjāsavo. Ime kho bhikkhave tayo āsavā.

[838] Imesaṁ kho bhikkhave tiṇṇannaṁ āsavānaṁ pahānāya
cattāro satipaṭṭhānā bhāvetabbā. Katame cattāro. Idha
bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte
dhammesu dhammānupassī viharati ātāpī sampajāno satimā vineyya
Loke abhijjhādomanassaṁ. Imesaṁ kho bhikkhave tiṇṇannaṁ āsavānaṁ
pahānāya ime cattāro satipaṭṭhānā bhāvetabbāti.
Amatavaggo pañcamo.
Tassuddānaṁ
amataṁ samudayo maggo sato 1 kusalarāsi ca
pāṭimokkhaṁ duccaritaṁ mittā 2 vedanā āsavena cāti.
----------
1 Ma. sati. 2 Ma. mittavedanā.
Satipaṭṭhānasaṁyuttassa gaṅgādipeyyālo chaṭṭho

[839] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā. Evameva kho bhikkhave bhikkhu cattāro satipaṭṭhāne
bhāvento cattāro satipaṭṭhāne bahulīkaronto nibbānaninno hoti
nibbānapoṇo nibbānapabbhāro.

[840] Kathañca bhikkhave bhikkhu cattāro satipaṭṭhāne bhāvento
cattāro satipaṭṭhāne bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu kāye kāyānupassī
viharati ātāpī sampajāno satimā vineyya loke abhijjhādomanassaṁ.
Vedanāsu citte dhammesu dhammānupassī viharati ātāpī sampajāno
satimā vineyya loke abhijjhādomanassaṁ. Evaṁ kho bhikkhave bhikkhu
cattāro satipaṭṭhāne bhāvento cattāro satipaṭṭhāne bahulīkaronto
nibbānaninno hoti nibbānapoṇo nibbānapabbhāroti .pe.

[841] Pañcimāni bhikkhave uddhambhāgiyāni saññojanāni.
Katamāni pañca. Rūparāgo arūparāgo māno uddhaccaṁ avijjā.
Imāni kho bhikkhave pañcuddhambhāgiyāni saññojanāni.

[842] Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya cattāro
satipaṭṭhānā bhāvetabbā. Katame cattāro. Idha bhikkhave bhikkhu
Kāye kāyānupassī viharati ātāpī sampajāno satimā vineyya
loke abhijjhādomanassaṁ. Vedanāsu citte dhammesu dhammānupassī
viharati ātāpī sampajāno satimā vineyya loke abhijjhādomanassaṁ.
Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya ime
cattāro satipaṭṭhānā bhāvetabbāti. (yathā maggasaṁyuttaṁ vitthāritaṁ
evaṁ satipaṭṭhānasaṁyuttaṁ vitthāretabbaṁ).
Cha pācīnato ninnā cha ninnā ca samuddato
ete dve cha dvādasa honti vaggo tena pavuccati 1 .
Satipaṭṭhānasaṁyuttaṁ niṭṭhitaṁ.
--------
1 Ma. itisaddo atthi.
Indriyasaṁyuttaṁ
------
suddhakavaggo paṭhamo

[843] Sāvatthīnidānaṁ. Tatra kho bhagavā etadavoca pañcimāni
bhikkhave indriyāni. Katamāni pañca. Saddhindriyaṁ viriyindriyaṁ
satindriyaṁ samādhindriyaṁ paññindriyaṁ. Imāni kho bhikkhave
pañcindriyānīti.