[824] Idamavoca bhikkhave brahmā sahampati idaṁ vatvā
athāparaṁ etadavoca
ekāyanaṁ jātikhayantadassī maggaṁ pajānāti hitānukampī
etena maggena atariṁsu 1 pubbe tarissanti ye ca taranti oghanti.

[825] Sāvatthīnidānaṁ. Sato bhikkhave bhikkhu vihareyya ayaṁ
vo amhākaṁ anusāsanī. Kathañca bhikkhave bhikkhu sato hoti.
Idha bhikkhave bhikkhu kāye kāyānupassī viharati. Vedanāsu citte
dhammesu dhammānupassī viharati ātāpī sampajāno satimā vineyya
loke abhijjhādomanassaṁ. Evaṁ kho bhikkhave bhikkhu sato hoti.
Sato bhikkhave bhikkhu vihareyya ayaṁ vo amhākaṁ anusāsanīti.

[826] Kusalarāsīti bhikkhave vadamāno cattāro satipaṭṭhāne
sammā vadamāno vadeyya. Kevalo hāyaṁ 2 bhikkhave kusalarāsi
yadidaṁ cattāro satipaṭṭhānā. Katame cattāro. Idha bhikkhave
1 Ma. tariṁsu. Yu. ataṁsu. 2 Sī. cāyaṁ.
Bhikkhu kāye kāyānupassī viharati. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Kusalarāsīti bhikkhave vadamāno ime cattāro
satipaṭṭhāne sammā vadamāno vadeyya. Kevalo hāyaṁ bhikkhave
kusalarāsi yadidaṁ cattāro satipaṭṭhānāti.

[827] Atha kho aññataro bhikkhu yena bhagavā tenupasaṅkami
.pe. Ekamantaṁ nisīdi. Ekamantaṁ nisinno kho so bhikkhu
bhagavantaṁ etadavoca sādhu me bhante bhagavā saṅkhittena dhammaṁ
desetu yamahaṁ bhagavato dhammaṁ sutvā eko vūpakaṭṭho appamatto
ātāpī pahitatto vihareyyanti.

[828] Tasmā tiha tvaṁ bhikkhu ādimeva visodhehi kusalesu
dhammesu. Ko cādi kusalānaṁ dhammānaṁ. Idha tvaṁ bhikkhu
pāṭimokkhasaṁvarasaṁvuto viharāhi ācāragocarasampanno aṇumattesu
vajjesu bhayadassāvī samādāya sikkhassu sikkhāpadesu.

[829] Yato kho tvaṁ bhikkhu pāṭimokkhasaṁvarasaṁvuto viharissasi
ācāragocarasampanno aṇumattesu vajjesu bhayadassāvī samādāya
sikkhassu 1 sikkhāpadesu tato tvaṁ bhikkhave sīlaṁ nissāya sīle patiṭṭhāya
cattāro satipaṭṭhāne bhāveyyāsi. Katame cattāro. Idha tvaṁ
bhikkhu kāye kāyānupassī viharāhi. Vedanāsu citte dhammesu
dhammānupassī viharāhi ātāpī sampajāno satimā vineyya loke
1 Yu. sikkhissasi.
Abhijjhādomanassaṁ. Yato kho tvaṁ bhikkhu sīlaṁ nissāya sīle
patiṭṭhāya ime cattāro satipaṭṭhāne evaṁ bhāvessasi tato
tuyhaṁ bhikkhu yā ratti vā divaso vā āgamissati vuḍḍhiyeva
pāṭikaṅkhā kusalesu dhammesu no parihānīti.

[830] Atha kho so bhikkhu bhagavato bhāsitaṁ abhinanditvā
anumoditvā uṭṭhāyāsanā bhagavantaṁ abhivādetvā padakkhiṇaṁ katvā
pakkāmi. Atha kho so bhikkhu eko vūpakaṭṭho appamatto
ātāpī pahitatto viharanto na cirasseva yassatthāya kulaputtā
sammadeva agārasmā anagāriyaṁ pabbajanti tadanuttaraṁ brahmacariyapariyosānaṁ
diṭṭheva dhamme sayaṁ abhiññā sacchikatvā upasampajja
viharati khīṇā jāti vusitaṁ brahmacariyaṁ kataṁ karaṇīyaṁ nāparaṁ
itthattāyāti abbhaññāsi. Aññataro ca pana so bhikkhu
arahataṁ ahosīti.

[831] Atha kho aññataro bhikkhu yena bhagavā .pe. Sādhu
me bhante bhagavā saṅkhittena dhammaṁ desetu yamahaṁ bhagavato
dhammaṁ sutvā eko vūpakaṭṭho appamatto ātāpī pahitatto
vihareyyanti.

[832] Tasmā tiha tvaṁ bhikkhu ādimeva visodhehi kusalesu
dhammesu. Ko cādi kusalānaṁ dhammānaṁ. Idha tvaṁ bhikkhu
kāyaduccaritaṁ pahāya kāyasucaritaṁ bhāvessasi vacīduccaritaṁ pahāya
Vacīsucaritaṁ bhāvessasi manoduccaritaṁ pahāya manosucaritaṁ bhāvessasi.

[833] Yato kho tvaṁ bhikkhu kāyaduccaritaṁ pahāya kāyasucaritaṁ
bhāvessasi vacīduccaritaṁ pahāya vacīsucaritaṁ bhāvessasi manoduccaritaṁ
pahāya manosucaritaṁ bhāvessasi tato tvaṁ bhikkhu sīlaṁ nissāya sīle
patiṭṭhāya cattāro satipaṭṭhāne bhāveyyāsi. Katame cattāro.
Idha tvaṁ bhikkhu kāye kāyānupassī viharāhi. Vedanāsu citte
dhammesu dhammānupassī viharāhi ātāpī sampajāno satimā vineyya
loke abhijjhādomanassaṁ. Yato kho tvaṁ bhikkhu sīlaṁ nissāya
sīle patiṭṭhāya ime cattāro satipaṭṭhāne evaṁ bhāvessasi tato
tuyhaṁ bhikkhu yā ratti vā divaso vā āgamissati vuḍḍhiyeva
pāṭikaṅkhā kusalesu dhammesu no parihānīti .pe. Aññataro ca
pana so bhikkhu arahataṁ ahosīti.