[794] Evarūpāya cāhaṁ bhante dukkhāya vedanāya phuṭṭho samāno
kāye kāyānupassī viharāmi ātāpī sampajāno satimā vineyya
loke abhijjhādomanassaṁ. Vedanāsu citte dhammesu dhammānupassī
viharāmi ātāpī sampajāno satimā vineyya loke abhijjhādomanassaṁ.

[795] Yāni cimāni bhante bhagavatā pañcorambhāgiyāni
saññojanāni desitāni nāhaṁ bhante yaṅkiñci attani appahīnaṁ
samanupassāmīti. Lābhā te gahapati suladdhante gahapati
anāgāmiphalaṁ tayā gahapati byākatanti.
Sīlaṭṭhitivaggo tatiyo.
Tassuddānaṁ
sīlaṁ ṭhiti parihānaṁ suddhakaṁ brāhmaṇena ca
padesaṁ samattaṁ loko ca sirivaḍḍho mānadinnena te dasāti.
-------------
Ananussutavaggo catuttho

[796] Sāvatthīnidānaṁ. Ayaṁ kāye kāyānupassanāti me bhikkhave
pubbe ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi. Sā kho panāyaṁ
kāye kāyānupassanā bhāvetabbāti me bhikkhave. Bhāvitāti me
bhikkhave pubbe ananussutesu dhammesu cakkhuṁ udapādi ñāṇaṁ udapādi
paññā udapādi vijjā udapādi āloko udapādi.

[797] Ayaṁ vedanāsu vedanānupassanāti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi. Sā kho panāyaṁ
vedanāsu vedanānupassanā bhāvetabbāti me bhikkhave. Bhāvitāti
me bhikkhave pubbe ananussutesu dhammesu cakkhuṁ udapādi ñāṇaṁ
udapādi paññā udapādi vijjā udapādi āloko udapādi.

[798] Ayaṁ citte cittānupassanāti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi. Sā kho panāyaṁ citte
cittānupassanā bhāvetabbāti me bhikkhave. Bhāvitāti me bhikkhave
pubbe ananussutesu dhammesu cakkhuṁ udapādi ñāṇaṁ udapādi
paññā udapādi vijjā udapādi āloko udapādi.

[799] Ayaṁ dhammesu dhammānupassanāti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi. Sā kho panāyaṁ
dhammesu dhammānupassanā bhāvetabbāti me bhikkhave. Bhāvitāti
me bhikkhave pubbe ananussutesu dhammesu cakkhuṁ udapādi ñāṇaṁ
udapādi paññā udapādi vijjā udapādi āloko udapādīti.

[800] Sāvatthīnidānaṁ. Cattārome bhikkhave satipaṭṭhānā bhāvitā
bahulīkatā ekantanibbidāya virāgāya nirodhāya upasamāya abhiññāya
sambodhāya nibbānāya saṁvattanti. Katame cattāro. Idha
bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Ime kho bhikkhave cattāro satipaṭṭhānā
bhāvitā bahulīkatā ekantanibbidāya virāgāya nirodhāya upasamāya
abhiññāya sambodhāya nibbānāya saṁvattantīti.

[801] Yesaṁ kesañci bhikkhave cattāro satipaṭṭhānā viraddhā
viraddho tesaṁ ariyo aṭṭhaṅgiko 1 maggo sammādukkhakkhayagāmī.
Yesaṁ kesañci bhikkhave cattāro satipaṭṭhānā āraddhā āraddho
tesaṁ ariyo aṭṭhaṅgiko 1 maggo sammādukkhakkhayagāmī. Katame
cattāro. Idha bhikkhave bhikkhu kāye kāyānupassī viharati ātāpī
1 Ma. Yu. ayaṁ pāṭho natthi. evamuparipi.
Sampajāno satimā vineyya loke abhijjhādomanassaṁ. Vedanāsu
citte dhammesu dhammānupassī viharati ātāpī sampajāno satimā
vineyya loke abhijjhādomanassaṁ. Yesaṁ kesañci bhikkhave ime
cattāro satipaṭṭhānā viraddhā viraddho tesaṁ ariyo aṭṭhaṅgiko
maggo sammādukkhakkhayagāmī. Yesaṁ kesañci bhikkhave ime cattāro
satipaṭṭhānā āraddhā āraddho tesaṁ ariyo aṭṭhaṅgiko maggo
sammādukkhakkhayagāmīti.

[802] Sāvatthīnidānaṁ. Cattārome bhikkhave satipaṭṭhānā bhāvitā
bahulīkatā apārā pāraṁ gamanāya saṁvattanti. Katame cattāro.
Idha bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Ime kho bhikkhave cattāro satipaṭṭhānā
bhāvitā bahulīkatā apārā pāraṁ gamanāya saṁvattantīti.

[803] Sāvatthīnidānaṁ. Sato bhikkhave bhikkhu vihareyya sampajāno
ayaṁ vo amhākaṁ anusāsanī. Kathañca bhikkhave bhikkhu sato hoti.
Idha bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Evaṁ kho bhikkhave bhikkhu sato hoti.