[774] Ko nu kho āvuso ānanda hetu ko paccayo yena
saddhammaparihānaṁ hoti. Ko nu kho āvuso ānanda hetu ko
paccayo yena saddhammāparihānaṁ hotīti. Sādhu sādhu āvuso
bhadda bhaddako kho te āvuso bhadda ummaggo bhaddakaṁ
paṭibhāṇaṁ kalyāṇī paripucchā. Evañhi tvaṁ āvuso bhadda
pucchasi ko nu kho āvuso ānanda hetu ko paccayo yena
Saddhammaparihānaṁ hoti. Ko panāvuso ānanda hetu ko paccayo
yena saddhammāparihānaṁ hotīti. Evamāvusoti.

[775] Catunnaṁ kho āvuso satipaṭṭhānānaṁ abhāvitattā abahulīkatattā
saddhammaparihānaṁ hoti. Catunnaṁ ca kho āvuso satipaṭṭhānānaṁ
bhāvitattā bahulīkatattā saddhammāparihānaṁ hoti.
Katamesaṁ catunnaṁ. Idhāvuso bhikkhu kāye kāyānupassī viharati
ātāpī sampajāno satimā vineyya loke abhijjhādomanassaṁ. Vedanāsu
citte dhammesu dhammānupassī viharati ātāpī sampajāno satimā
vineyya loke abhijjhādomanassaṁ. Imesaṁ kho āvuso catunnaṁ
satipaṭṭhānānaṁ abhāvitattā abahulīkatattā saddhammaparihānaṁ hoti.
Imesaṁ ca kho āvuso catunnaṁ satipaṭṭhānānaṁ bhāvitattā bahulīkatattā
saddhammāparihānaṁ hotīti.

[776] Sāvatthīnidānaṁ. Cattārome bhikkhave satipaṭṭhānā.
Katame cattāro. Idha bhikkhave bhikkhu kāye kāyānupassī viharati
ātāpī sampajāno satimā vineyya loke abhijjhādomanassaṁ. Vedanāsu
citte dhammesu dhammānupassī viharati ātāpī sampajāno satimā
vineyya loke abhijjhādomanassaṁ. Ime kho bhikkhave cattāro
satipaṭṭhānāti.

[777] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho aññataro brāhmaṇo
Yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi. Ekamantaṁ
nisinno kho so brāhmaṇo bhagavantaṁ etadavoca

[778] Ko nu kho bho gotama hetu ko paccayo yena
tathāgate parinibbute saddhammo na ciraṭṭhitiko hoti. Ko pana
bho gotama hetu ko paccayo yena tathāgate parinibbute saddhammo
ciraṭṭhitiko hotīti.

[779] Catunnaṁ kho brāhmaṇa satipaṭṭhānānaṁ abhāvitattā
abahulīkatattā tathāgate parinibbute saddhammo na ciraṭṭhitiko hoti.
Catunnaṁ ca kho brāhmaṇa satipaṭṭhānānaṁ bhāvitattā bahulīkatattā
tathāgate parinibbute saddhammo ciraṭṭhitiko hoti. Katamesaṁ
catunnaṁ. Idha brāhmaṇa bhikkhu kāye kāyānupassī viharati ātāpī
sampajāno satimā vineyya loke abhijjhādomanassaṁ. Vedanāsu
citte dhammesu dhammānupassī viharati ātāpī sampajāno satimā
vineyya loke abhijjhādomanassaṁ. Imesaṁ kho brāhmaṇa catunnaṁ
satipaṭṭhānānaṁ abhāvitattā abahulīkatattā tathāgate parinibbute
saddhammo na ciraṭṭhitiko hoti. Imesaṁ ca kho brāhmaṇa
catunnaṁ satipaṭṭhānānaṁ bhāvitattā bahulīkatattā tathāgate parinibbute
saddhammo ciraṭṭhitiko hotīti.

[780] Evaṁ vutte so brāhmaṇo bhagavantaṁ etadavoca
Abhikkantaṁ bho gotama abhikkantaṁ bho gotama .pe. Upāsakaṁ
maṁ bhavaṁ gotamo dhāretu ajjatagge pāṇupetaṁ saraṇaṅgatanti.

[781] Ekaṁ samayaṁ āyasmā ca sārīputto āyasmā ca
mahāmoggallāno āyasmā ca anuruddho sākete viharanti kaṇṭakīvane.
Atha kho āyasmā ca sārīputto āyasmā ca mahāmoggallāno
sāyaṇhasamayaṁ paṭisallānā vuṭṭhitā yenāyasmā anuruddho tenupasaṅkamiṁsu
upasaṅkamitvā āyasmatā anuruddhena saddhiṁ sammodiṁsu
sammodanīyaṁ kathaṁ sārāṇīyaṁ vītisāretvā ekamantaṁ nisīdiṁsu. Ekamantaṁ
nisinno kho āyasmā sārīputto āyasmantaṁ anuruddhaṁ etadavoca

[782] Sekkho sekkhoti 1 āvuso anuruddha vuccati kittāvatā
nu kho āvuso sekkho hotīti. Catunnaṁ kho āvuso satipaṭṭhānānaṁ
padesaṁ bhāvitattā sekkho hoti. Katamesaṁ catunnaṁ. Idhāvuso
bhikkhu kāye kāyānupassī viharati ātāpī sampajāno satimā
vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Imesaṁ kho āvuso catunnaṁ satipaṭṭhānānaṁ
padesaṁ bhāvitattā sekkho hotīti.

[783] Taṁyeva nidānaṁ. Ekamantaṁ nisinno kho āyasmā
sārīputto āyasmantaṁ anuruddhaṁ etadavoca
1 sekho sekhotītipi pāṭho.