[764] Seyyathāpi bhikkhave janapadakalyāṇī janapadakalyāṇīti kho
bhikkhave mahājanakāyo sannipateyya. Sā kho pana 1 janapadakalyāṇī
paramapāsāvinī nacce paramapāsāvinī gīte janapadakalyāṇī naccati
gāyatīti kho bhikkhave bhiyyoso mattāya mahājanakāyo sannipateyya.
Atha puriso āgaccheyya jīvitukāmo amaritukāmo sukhakāmo dukkhapaṭikūlo
tamenaṁ evaṁ vadeyya ayante ambho purisa samatittiko
telapatto antarena ca mahāsamajjaṁ antarena ca janapadakalyāṇiyā
pariharitabbo. Puriso ca tena ukkhittāsiko piṭṭhito piṭṭhito
anubandhissati yattheva naṁ thokaṁpi chaḍḍessasi 2 tattheva te siro
pātissatīti. Taṁ kiṁ maññatha bhikkhave api nu so puriso
amuṁ telapattaṁ amanasikaritvā bahiddhā pamādaṁ āhareyyāti. No
hetaṁ bhante.

[765] Upamā kho myāyaṁ bhikkhave katā atthassa viññāpanāya
ayamevettha 3 attho. Samatittiko telapattoti kho bhikkhave kāyagatāya
etaṁ satiyā adhivacanaṁ.

[766] Tasmā tiha bhikkhave evaṁ sikkhitabbaṁ kāyagatā sati [4]-
1 Ma. Yu. panassa. 2 Ma. Yu. chaḍḍessati. 3 Ma. Yu. ---cevettha.
4 Ma. Yu. no.
Bhāvitā bhavissati bahulīkatā yānīkatā vatthukatā anuṭṭhitā paricitā
susamāraddhāti. Evañhi vo 1 bhikkhave sikkhitabbanti.
Nāḷandavaggo dutiyo.
Tassuddānaṁ
mahāpuriso nāḷandaṁ cundo celañca bāhiyo
uttiyo ariyo brahmā dvayena 2 sedakena cāti.
-----------
1 Ma. kho. 2 Ma. Yu. sedakaṁ janapadena cāti.
Sīlaṭṭhitivaggo tatiyo

[767] Evamme sutaṁ ekaṁ samayaṁ āyasmā ca ānando
āyasmā ca bhaddo pāṭaliputte viharati kukkuṭārāme. Atha kho
āyasmā bhaddo sāyaṇhasamayaṁ paṭisallānā vuṭṭhito yenāyasmā
ānando tenupasaṅkami upasaṅkamitvā āyasmatā ānandena saddhiṁ
sammodi sammodanīyaṁ kathaṁ sārāṇīyaṁ vītisāretvā ekamantaṁ nisīdi.
Ekamantaṁ nisinno kho āyasmā bhaddo āyasmantaṁ ānandaṁ
etadavoca

[768] Yānīmāni āvuso ānanda kusalāni sīlāni vuttāni
bhagavatā imāni kusalāni sīlāni kimatthiyāni vuttāni bhagavatāti.
Sādhu sādhu āvuso bhadda bhaddako kho te āvuso bhadda ummaggo
bhaddakaṁ paṭibhāṇaṁ kalyāṇī paripucchā. Evaṁ hi tvaṁ āvuso
bhadda pucchasi yānīmāni āvuso ānanda kusalāni sīlāni vuttāni
bhagavatā imāni kusalāni sīlāni kimatthiyāni vuttāni bhagavatāti.
Evamāvusoti.

[769] Yānīmāni āvuso bhadda kusalāni sīlāni vuttāni bhagavatā
imāni kusalāni sīlāni yāvadeva catunnaṁ satipaṭṭhānānaṁ bhāvanāya
vuttāni bhagavatā. Katamesaṁ catunnaṁ. Idhāvuso bhikkhu kāye
kāyānupassī viharati ātāpī sampajāno satimā vineyya loke
Abhijjhādomanassaṁ. Vedanāsu citte dhammesu dhammānupassī viharati
ātāpī sampajāno satimā vineyya loke abhijjhādomanassaṁ.
Yānīmāni āvuso bhadda kusalāni sīlāni vuttāni bhagavatā imāni
kusalāni sīlāni yāvadeva imesaṁ catunnaṁ satipaṭṭhānānaṁ bhāvanāya
vuttāni bhagavatāti.

[770] Taṁyeva nidānaṁ. Ekamantaṁ nisinno kho āyasmā
bhaddo āyasmantaṁ ānandaṁ etadavoca

[771] Ko nu kho āvuso ānanda hetu ko paccayo yena
tathāgate parinibbute saddhammo na ciraṭṭhitiko hoti. Ko panāvuso
ānanda hetu ko paccayo yena tathāgate parinibbute saddhammo
ciraṭṭhitiko hotīti. Sādhu sādhu āvuso bhadda bhaddako kho te
āvuso bhadda ummaggo bhaddakaṁ paṭibhāṇaṁ kalyāṇī paripucchā.
Evañhi tvaṁ āvuso bhadda pucchasi ko nu kho āvuso ānanda
hetu ko paccayo yena tathāgate parinibbute saddhammo na
ciraṭṭhitiko hoti. Ko panāvuso ānanda hetu ko paccayo yena
tathāgate parinibbute saddhammo ciraṭṭhitiko hotīti. Evamāvusoti.

[772] Catunnaṁ kho āvuso satipaṭṭhānānaṁ abhāvitattā abahulīkatattā
tathāgate parinibbute saddhammo na ciraṭṭhitiko hoti.
Catunnaṁ ca kho āvuso satipaṭṭhānānaṁ bhāvitattā bahulīkatattā
tathāgate parinibbute saddhammo ciraṭṭhitiko hoti. Katamesaṁ catunnaṁ.
Idhāvuso bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṁ. Vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṁ. Imesaṁ kho āvuso catunnaṁ satipaṭṭhānānaṁ
abhāvitattā abahulīkatattā tathāgate parinibbute saddhammo na
ciraṭṭhitiko hoti. Imesaṁ ca kho āvuso catunnaṁ satipaṭṭhānānaṁ
bhāvitattā bahulīkatattā tathāgate parinibbute saddhammo ciraṭṭhitiko
hotīti.

[773] Ekaṁ samayaṁ āyasmā ca ānando āyasmā ca
bhaddo pāṭaliputte viharanti kukkuṭārāme. Atha kho āyasmā
bhaddo sāyaṇhasamayaṁ paṭisallānā vuṭṭhito yenāyasmā ānando
tenupasaṅkami upasaṅkamitvā āyasmatā ānandena saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi. Ekamantaṁ
nisinno kho āyasmā bhaddo āyasmantaṁ ānandaṁ etadavoca