[334] Imesaṁ kho bhikkhave catunnaṁ oghānaṁ abhiññāya
pariññāya parikkhayāya pahānāya .pe. Ayaṁ ariyo aṭṭhaṅgiko
maggo bhāvetabboti. (yathā esanā evaṁ vitthāretabbaṁ).

[335] Sāvatthīnidānaṁ. Cattārome bhikkhave yogā. Katame
cattāro. Kāmayogo bhavayogo diṭṭhiyogo avijjāyogo. Ime
kho bhikkhave cattāro yogā.

[336] Imesaṁ kho bhikkhave catunnaṁ yogānaṁ abhiññāya
pariññāya parikkhayāya pahānāya .pe. Ayaṁ ariyo aṭṭhaṅgiko
maggo bhāvetabboti.

[337] Sāvatthīnidānaṁ. Cattārīmāni bhikkhave upādānāni.
Katamāni cattāri. Kāmūpādānaṁ diṭṭhūpādānaṁ sīlabbatūpādānaṁ
attavādūpādānaṁ. Imāni kho bhikkhave cattāri upādānāni.

[338] Imesaṁ kho bhikkhave catunnaṁ upādānānaṁ abhiññāya
pariññāya parikkhayāya pahānāya .pe. Ayaṁ ariyo aṭṭhaṅgiko
maggo bhāvetabboti.

[339] Sāvatthīnidānaṁ. Cattārome bhikkhave ganthā. Katame
cattāro. Abhijjhā kāyagantho byāpādo kāyagantho sīlabbataparāmāso
kāyagantho idaṁsaccābhiniveso kāyagantho. Ime kho
bhikkhave cattāro ganthā.

[340] Imesaṁ kho bhikkhave catunnaṁ ganthānaṁ abhiññāya
pariññāya parikkhayāya pahānāya .pe. Ayaṁ ariyo aṭṭhaṅgiko
maggo bhāvetabboti.

[341] Sāvatthīnidānaṁ. Sattime bhikkhave anusayā. Katame
satta. Kāmarāgānusayo paṭighānusayo diṭṭhānusayo vicikicchānusayo
mānānusayo bhavarāgānusayo avijjānusayo. Ime kho bhikkhave
satta anusayā.

[342] Imesaṁ kho bhikkhave sattannaṁ anusayānaṁ abhiññāya
pariññāya parikkhayāya pahānāya .pe. Ayaṁ ariyo aṭṭhaṅgiko
maggo bhāvetabboti.

[343] Sāvatthīnidānaṁ. Pañcime bhikkhave kāmaguṇā. Katame
pañca. Cakkhuviññeyyā rūpā iṭṭhā kantā manāpā piyarūpā
kāmūpasañhitā rajaniyā sotaviññeyyā saddā .pe.
Ghānaviññeyyā gandhā. Jivhāviññeyyā rasā. Kāyaviññeyyā
phoṭṭhabbā iṭṭhā kantā manāpā piyarūpā kāmūpasañhitā rajaniyā.
Ime kho bhikkhave pañca kāmaguṇā.