[354] Imesaṁ kho bhikkhave pañcannaṁ uddhambhāgiyānaṁ saññojanānaṁ
abhiññāya pariññāya parikkhayāya pahānāya .pe. Ayaṁ ariyo
aṭṭhaṅgiko maggo bhāvetabbo. Katamo ariyo aṭṭhaṅgiko
maggo. Idha bhikkhave bhikkhu sammādiṭṭhiṁ bhāveti .pe. Sammāsamādhiṁ
bhāveti rāgavinayapariyosānaṁ dosavinayapariyosānaṁ mohavinayapariyosānaṁ.
Amatogadhaṁ amataparāyanaṁ amatapariyosānaṁ. Nibbānaninnaṁ
nibbānapoṇaṁ nibbānapabbhāraṁ. Imesaṁ kho bhikkhave pañcannaṁ
uddhambhāgiyānaṁ saññojanānaṁ abhiññāya pariññāya parikkhayāya
pahānāya .pe. Ayaṁ ariyo aṭṭhaṅgiko maggo bhāvetabboti.
Oghavaggo.
Tassuddānaṁ
ogho yogo upādānaṁ ganthaṁ anusayena ca
kāmaguṇā nīvaraṇā 1 khandhā oruddhambhāgiyāti.
[2]-
Maggasaṁyuttaṁ samattaṁ 3 .
---------
1 Ma. Yu. nīvaraṇaṁ. 2 Ma. vagguddānaṁ.
avijjāvaggo paṭhamo dutiyaṁ vihāraṁ vuccati
micchattaṁ tatiyo vaggo catutthaṁ paṭipanneneva
titthiyaṁ pañcamo vaggo catasso sūriyena ca
bahukate sattamo vaggo uppādo paṭhamena ca
divasavaggo navamo dasamo appamādena ca
ekādasa balavaggo dvādasa esanā pāliyaṁ.
oghavaggo bhavati terasāti
3 Ma. Yu. paṭhamaṁ.
Bojjhaṅgasaṁyuttaṁ
------
pabbatavaggo paṭhamo

[355] [1]- Himavantaṁ bhikkhave pabbatarājaṁ nissāya nāgā kāyaṁ
vaḍḍhenti balaṁ gāhenti te tattha kāyaṁ vaḍḍhetvā balaṁ
gāhetvā kusubbhe 2 otaranti kusubbhe otaritvā mahāsobbhe
otaranti mahāsobbhe otaritvā kunnadiyo otaranti kunnadiyo
otaritvā mahānadiyo otaranti mahānadiyo otaritvā mahāsamuddasāgaraṁ
otaranti te tattha mahantataṁ vepullataṁ āpajjanti
kāyena. Evameva kho bhikkhave bhikkhu sīlaṁ nissāya sīle patiṭṭhāya
satta bojjhaṅge bhāvento satta bojjhaṅge bahulīkaronto
mahantataṁ vepullataṁ pāpuṇāti dhammesu.

[356] Kathañca bhikkhave bhikkhu sīlaṁ nissāya sīle patiṭṭhāya
satta bojjhaṅge bhāvento satta bojjhaṅge bahulīkaronto
mahantataṁ vepullataṁ pāpuṇāti dhammesūti. Idha bhikkhave bhikkhu
satisambojjhaṅgaṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ dhammavicayasambojjhaṅgaṁ bhāveti .pe. Viriyasambojjhaṅgaṁ
bhāveti. Pītisambojjhaṅgaṁ bhāveti. Passaddhisambojjhaṅgaṁ
bhāveti. Samādhisambojjhaṅgaṁ bhāveti. Upekkhāsambojjhaṅgaṁ
1 Ma. seyyathāpi bhikkhave pabbatarājaṁ. 2 Ma. kusobbhe. evamuparipi.
Bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu sīlaṁ nissāya sīle patiṭṭhāya
satta bojjhaṅge bhāvento satta bojjhaṅge bahulīkaronto mahantataṁ
vepullataṁ pāpuṇāti dhammesūti.

[357] Seyyathāpi bhikkhave ayaṁ kāyo āhāraṭṭhitiko āhāraṁ
paṭicca tiṭṭhati anāhāro no tiṭṭhati. Evameva kho bhikkhave
pañca nīvaraṇā āhāraṭṭhitikā āhāraṁ paṭicca tiṭṭhanti anāhārā
no tiṭṭhanti.

[358] Ko ca bhikkhave āhāro anuppannassa vā kāmacchandassa
uppādāya uppannassa vā kāmacchandassa bhiyyobhāvāya vepullāya.
Atthi bhikkhave subhanimittaṁ tattha ayonisomanasikārabahulīkāro
ayamāhāro anuppannassa vā kāmacchandassa uppādāya uppannassa
vā kāmacchandassa bhiyyobhāvāya vepullāya.

[359] Ko ca bhikkhave āhāro anuppannassa vā byāpādassa
uppādāya uppannassa vā byāpādassa bhiyyobhāvāya vepullāya.
Atthi bhikkhave paṭighanimittaṁ tattha ayonisomanasikārabahulīkāro
ayamāhāro anuppannassa vā byāpādassa uppādāya uppannassa
vā byāpādassa bhiyyobhāvāya vepullāya.

[360] Ko ca bhikkhave āhāro anuppannassa vā thīnamiddhassa
uppādāya uppannassa vā thīnamiddhassa bhiyyobhāvāya vepullāya.
Atthi bhikkhave arati tandi vijambhitā bhattasammado cetaso ca
līnattaṁ tattha ayonisomanasikārabahulīkāro ayamāhāro anuppannassa
vā thīnamiddhassa uppādāya uppannassa vā thīnamiddhassa bhiyyobhāvāya
vepullāya.

[361] Ko ca bhikkhave āhāro anuppannassa vā uddhaccakukkuccassa
uppādāya uppannassa vā uddhaccakukkuccassa bhiyyobhāvāya
vepullāya. Atthi bhikkhave cetaso avūpasamo tattha
ayonisomanasikārabahulīkāro ayamāhāro anuppannassa vā uddhaccakukkuccassa
uppādāya uppannassa vā uddhaccakukkuccassa bhiyyobhāvāya
vepullāya.

[362] Ko ca bhikkhave āhāro anuppannāya vā vicikicchāya
uppādāya uppannāya vā vicikicchāya bhiyyobhāvāya vepullāya.
Atthi bhikkhave vicikicchāṭhāniyā dhammā tattha ayonisomanasikārabahulīkāro
ayamāhāro anuppannāya vā vicikicchāya uppādāya
uppannāya vā vicikicchāya bhiyyobhāvāya vepullāya.

[363] Seyyathāpi bhikkhave ayaṁ kāyo āhāraṭṭhitiko āhāraṁ
paṭicca tiṭṭhati anāhāro no tiṭṭhati. Evameva kho bhikkhave
ime pañca nīvaraṇā āhāraṭṭhitikā āhāraṁ paṭicca tiṭṭhanti
anāhārā no tiṭṭhanti.