[274] Sāvatthīnidānaṁ. Seyyathāpi himavantaṁ bhikkhave pabbatarājaṁ
nissāya nāgā kāyaṁ vaḍḍhenti balaṁ gāhenti te tattha kāyaṁ
vaḍḍhetvā balaṁ gāhetvā kusubbhe 1 otaranti kusubbhe otaritvā
mahāsobbhe otaranti mahāsobbhe otaritvā kunnadiyo otaranti
kunnadiyo otaritvā mahānadiyo otaranti mahānadiyo otaritvā
mahāsamuddasāgaraṁ 2 otaranti te tattha mahantattaṁ vepullattaṁ
āpajjanti kāyena. Evameva kho bhikkhave bhikkhu sīlaṁ nissāya
sīle patiṭṭhāya ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ
maggaṁ bahulīkaronto mahantattaṁ 3 vepullattaṁ pāpuṇāti dhammesu.

[275] Kathañca bhikkhave bhikkhu sīlaṁ nissāya sīle patiṭṭhāya
ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto
mahantattaṁ vepullattaṁ pāpuṇāti dhammesu. Idha bhikkhave
bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ .pe. Sammāsamādhiṁ bhāveti vivekanissitaṁ virāganissitaṁ
1 Ma. kusobbhe. 2 Ma. mahāsamuddaṁ. Yu. mahāsamuddaṁ sāgaraṁ. 3 Yu. mahantataṁ
vepullataṁ. evamupari.
Nirodhanissitaṁ vossaggapariṇāmiṁ. Evaṁ kho bhikkhave bhikkhu
sīlaṁ nissāya sīle patiṭṭhāya ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto mahantattaṁ vepullattaṁ pāpuṇāti
dhammesūti.

[276] Sāvatthīnidānaṁ. Seyyathāpi bhikkhave rukkho pācīnaninno
pācīnapoṇo pācīnapabbhāro so mūlacchinde 1 kate papatessati
yena [2]- ninno yena poṇo yena pabbhāroti. Evameva kho bhikkhave
bhikkhu ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto
nibbānaninno hoti nibbānapoṇo nibbānapabbhāro.

[277] Kathañca bhikkhave bhikkhu ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu sammādiṭṭhiṁ bhāveti
vivekanissitaṁ virāganissitaṁ nirodhanissitaṁ vossaggapariṇāmiṁ .pe.
Sammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto nibbānaninno hoti nibbānapoṇo
nibbānapabbhāroti.

[278] Sāvatthīnidānaṁ. Seyyathāpi bhikkhave kumbho nikkujjo
vamateva udakaṁ no paccāvamati evameva kho bhikkhave bhikkhu ariyaṁ
aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto
1 Ma. mūlacchinno katamena papateyyāti. Yu. mūle chinno katamena papātena papateyyāti.
2 Ma. Yu. bhante.
Vamateva pāpake akusale dhamme no paccāvamati.

[279] Kathañca bhikkhave bhikkhu ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto vamateva pāpake akusale
dhamme no paccāvamati. Idha bhikkhave bhikkhu sammādiṭṭhiṁ bhāveti
vivekanissitaṁ virāganissitaṁ nirodhanissitaṁ vossaggapariṇāmiṁ .pe.
Sammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto vamateva pāpake akusale dhamme
no paccāvamatīti.

[280] Sāvatthīnidānaṁ. Seyyathāpi bhikkhave sālisukaṁ vā
yavasukaṁ vā sammāpaṇihitaṁ hatthena vā pādena vā akkantaṁ hatthaṁ
vā pādaṁ vā bhindissati 1 lohitaṁ vā uppādessatīti ṭhānametaṁ
vijjati. Taṁ kissa hetu. Sammāpaṇihitattā bhikkhave sukassa.
Evameva kho bhikkhave bhikkhu sammāpaṇihitāya diṭṭhiyā sammāpaṇihitāya
maggabhāvanāya avijjaṁ bhindissati vijjaṁ uppādessati
nibbānaṁ sacchikarissatīti ṭhānametaṁ vijjati. Taṁ kissa hetu.
Sammāpaṇihitattā bhikkhave diṭṭhiyā.

[281] Kathañca bhikkhave bhikkhu sammāpaṇihitāya diṭṭhiyā sammāpaṇihitāya
maggabhāvanāya avijjaṁ bhindati vijjaṁ uppādeti nibbānaṁ
sacchikaroti. Idha bhikkhave bhikkhu sammādiṭṭhiṁ bhāveti vivekanissitaṁ
1 Po. checchati. Yu. chijjati. evamupari.
Virāganissitaṁ nirodhanissitaṁ vossaggapariṇāmiṁ .pe. Sammāsamādhiṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu sammāpaṇihitāya diṭṭhiyā sammāpaṇihitāya
maggabhāvanāya avijjaṁ bhindati vijjaṁ uppādeti nibbānaṁ sacchikarotīti.

[282] Sāvatthīnidānaṁ. Seyyathāpi bhikkhave ākāse vividhā
vātā vāyanti puratthimāpi vātā vāyanti pacchimāpi vātā
vāyanti uttarāpi vātā vāyanti dakkhiṇāpi vātā vāyanti
sarajāpi vātā vāyanti arajāpi vātā vāyanti sītāpi vātā
vāyanti uṇhāpi vātā vāyanti parittāpi vātā vāyanti
adhimattāpi vātā vāyanti. Evameva kho bhikkhave bhikkhuno ariyaṁ
aṭṭhaṅgikaṁ maggaṁ bhāvayato ariyaṁ aṭṭhaṅgikaṁ maggaṁ bahulīkaroto
cattāropi satipaṭṭhānā bhāvanāpāripūriṁ gacchanti cattāropi
sammappadhānā bhāvanāpāripūriṁ gacchanti cattāropi iddhipādā
bhāvanāpāripūriṁ gacchanti pañcapi indriyāni bhāvanāpāripūriṁ gacchanti
pañcapi balāni bhāvanāpāripūriṁ gacchanti sattapi bojjhaṅgā bhāvanāpāripūriṁ
gacchanti.

[283] Kathañca bhikkhave bhikkhuno ariyaṁ aṭṭhaṅgikaṁ maggaṁ bhāvayato
ariyaṁ aṭṭhaṅgikaṁ maggaṁ bahulīkaroto cattāropi satipaṭṭhānā bhāvanāpāripūriṁ
gacchanti cattāropi sammappadhānā bhāvanāpāripūriṁ gacchanti
cattāropi iddhipādā bhāvanāpāripūriṁ gacchanti pañcapi indriyāni
Bhāvanāpāripūriṁ gacchanti pañcapi balāni bhāvanāpāripūriṁ gacchanti
sattapi bojjhaṅgā bhāvanāpāripūriṁ gacchanti. Idha bhikkhave bhikkhu
sammādiṭṭhiṁ bhāveti .pe. Sammāsamādhiṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ. Evaṁ kho bhikkhave
bhikkhuno ariyaṁ aṭṭhaṅgikaṁ maggaṁ bhāvayato ariyaṁ aṭṭhaṅgikaṁ maggaṁ bahulīkaroto
cattāropi satipaṭṭhānā bhāvanāpāripūriṁ gacchanti cattāropi
sammappadhānā bhāvanāpāripūriṁ gacchanti cattāropi iddhipādā
bhāvanāpāripūriṁ gacchanti pañcapi indriyāni bhāvanāpāripūriṁ gacchanti
pañcapi balāni bhāvanāpāripūriṁ gacchanti sattapi bojjhaṅgā
bhāvanāpāripūriṁ gacchantīti.