[284] Sāvatthīnidānaṁ. Seyyathāpi bhikkhave gimhānaṁ pacchime
māse ūhataṁ rajojallaṁ tamenaṁ mahā akālamegho ṭhānaso
antaradhāpeti vūpasameti. Evameva kho bhikkhave bhikkhu ariyaṁ
aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto
uppannuppanne pāpake akusale dhamme ṭhānaso antaradhāpeti
vūpasameti.

[285] Kathañca [1]- bhikkhave bhikkhu ariyaṁ aṭṭhaṅgikaṁ maggaṁ bhāvento
ariyaṁ aṭṭhaṅgikaṁ maggaṁ bahulīkaronto uppannuppanne pāpake akusale
dhamme ṭhānaso antaradhāpeti vūpasameti. Idha bhikkhave bhikkhu
sammādiṭṭhiṁ bhāveti .pe. Sammāsamādhiṁ bhāveti vivekanissitaṁ
1 Yu. pana.
Virāganissitaṁ nirodhanissitaṁ vossaggapariṇāmiṁ. Evaṁ kho bhikkhave
bhikkhu ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ
bahulīkaronto uppannuppanne pāpake akusale dhamme ṭhānaso
antaradhāpeti vūpasametīti.

[286] Sāvatthīnidānaṁ. Seyyathāpi bhikkhave uppannaṁ mahāmeghaṁ
tamenaṁ mahāvāto antarāyeva antaradhāpeti vūpasameti. Evameva
kho bhikkhave bhikkhu ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ
maggaṁ bahulīkaronto uppannuppanne pāpake akusale dhamme antarāyeva 1
antaradhāpeti vūpasameti.

[287] Kathañca bhikkhave bhikkhu ariyaṁ aṭṭhaṅgikaṁ magagaṁ bhāvento
ariyaṁ aṭṭhaṅgikaṁ maggaṁ bahulīkaronto uppannuppanne pāpake akusale
dhamme antarāyeva antaradhāpeti vūpasameti. Idha bhikkhave bhikkhu
sammādiṭṭhiṁ bhāveti .pe. Sammāsamādhiṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ. Evaṁ kho bhikkhave
bhikkhu ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ
bahulīkaronto uppannuppanne pāpake akusale dhamme ṭhānaso 2
antarāyeva antaradhāpeti vūpasametīti.

[288] Sāvatthīnidānaṁ. Seyyathāpi bhikkhave sāmuddikāya nāvāya
vettabandhanabandhāya cha māsāni udake pariyādāya hemantikena thalaṁ
ukkhittāya vātātapaparetāni bandhanāni tāni pāvussakena meghena
1 Po. ṭhānaso. evamupari. 2 Ma. Yu. ayaṁ pāṭho natthi.
Abhippavuṭṭhāni appakasireneva paṭippassambhanti pūtikāni bhavanti.
Evameva kho bhikkhave bhikkhuno ariyaṁ aṭṭhaṅgikaṁ maggaṁ bhāvayato
ariyaṁ aṭṭhaṅgikaṁ maggaṁ bahulīkaroto appakasireneva saññojanāni
paṭippassambhanti pūtikāni bhavanti.

[289] Kathañca bhikkhave bhikkhuno ariyaṁ aṭṭhaṅgikaṁ maggaṁ bhāvayato
ariyaṁ aṭṭhaṅgikaṁ maggaṁ bahulīkaroto appakasireneva saññojanāni
paṭippassambhanti pūtikāni bhavanti. Idha bhikkhave bhikkhu sammādiṭṭhiṁ
bhāveti .pe. Sammāsamādhiṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ. Evaṁ kho bhikkhave bhikkhuno ariyaṁ
aṭṭhaṅgikaṁ maggaṁ bhāvayato ariyaṁ aṭṭhaṅgikaṁ maggaṁ bahulīkaroto
appakasireneva saññojanāni paṭippassambhanti pūtikāni bhavantīti.

[290] Sāvatthīnidānaṁ. Seyyathāpi bhikkhave āgantukāgāraṁ
tattha puratthimāyapi disāya āgantvā vāsaṁ kappenti pacchimāyapi
disāya āgantvā vāsaṁ kappenti uttarāyapi disāya āgantvā
vāsaṁ kappenti dakkhiṇāyapi disāya āgantvā vāsaṁ kappenti
khattiyāpi āgantvā vāsaṁ kappenti brāhmaṇāpi āgantvā
vāsaṁ kappenti vessāpi āgantvā vāsaṁ kappenti suddāpi
āgantvā vāsaṁ kappenti. Evameva kho bhikkhave bhikkhu ariyaṁ
aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto
ye dhammā abhiññā pariññeyyā te dhammā abhiññā parijānāti
Ye dhammā abhiññā pahātabbā te dhamme abhiññā pajahati
ye dhammā abhiññā sacchikātabbā te dhamme abhiññā sacchikaroti
ye dhammā abhiññā bhāvetabbā te dhamme abhiññā bhāveti.

[291] Katame ca bhikkhave dhammā abhiññā pariññeyyā.
Pañcupādānakkhandhātissa vacanīyaṁ. Katame pañca. Seyyathīdaṁ.
Rūpūpādānakkhandho .pe. Viññāṇūpādānakkhandho. Ime bhikkhave
dhammā abhiññā pariññeyyā.

[292] Katame ca bhikkhave dhammā abhiññā pahātabbā.
Avijjā ca bhavataṇhā ca. Ime bhikkhave dhammā abhiññā
pahātabbā.

[293] Katame ca bhikkhave dhammā abhiññā sacchikātabbā.
Vijjā ca vimutti ca. Ime bhikkhave dhammā abhiññā sacchikātabbā.