[254] Kathañca bhikkhave bhikkhu appamatto ariyaṁ aṭṭhaṅgikaṁ
maggaṁ bhāveti ariyaṁ aṭṭhaṅgikaṁ maggaṁ bahulīkaroti. Idha bhikkhave
bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ .pe. Sammāsamādhiṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ. Evaṁ kho bhikkhave bhikkhu
appamatto ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ maggaṁ
bahulīkarotīti.

[255] Sāvatthīnidānaṁ. Seyyathāpi bhikkhave kūṭāgārassa
yā kāci gopānasiyo sabbā tā kūṭaṅgamā kūṭaninnā kūṭasamosaraṇā
kūṭaṁ tāsaṁ aggamakkhāyati. Evameva kho bhikkhave .pe.
(yathā heṭṭhimasuttantaṁ evaṁ vitthāretabbaṁ).

[256] Sāvatthīnidānaṁ. Seyyathāpi bhikkhave ye keci mūlagandhā
koṭṭhānusāriyaṁ tesaṁ aggamakkhāyati. Evameva kho bhikkhave .pe.

[257] Sāvatthīnidānaṁ. Seyyathāpi bhikkhave ye keci sāragandhā
lohitacandanaṁ tesaṁ aggamakkhāyati. Evameva kho bhikkhave .pe.

[258] Sāvatthīnidānaṁ. Seyyathāpi bhikkhave ye keci pupphagandhā
vassikaṁ tesaṁ aggamakkhāyati. Evameva kho bhikkhave .pe.

[259] Sāvatthīnidānaṁ. Seyyathāpi bhikkhave ye keci kuṭṭharājāno
sabbe te rañño cakkavattino anuyantā bhavanti rājā
tesaṁ cakkavatti aggamakkhāyati. Evameva kho bhikkhave .pe.

[260] Sāvatthīnidānaṁ. Seyyathāpi bhikkhave yā kāci tārakarūpānaṁ
pabhā sabbā tā candimāpabhāya kalaṁ nāgghanti soḷasiṁ candappabhā
tāsaṁ aggamakkhāyati. Evameva kho bhikkhave .pe.

[261] Sāvatthīnidānaṁ. Seyyathāpi bhikkhave saradasamaye viddhe
vigatavalāhake deve ādicco nabhaṁ abbhussakkamāno sabbaṁ ākāsagataṁ
tamagataṁ abhivihacca bhāsate ca tapate ca virocati ca. Evameva
kho bhikkhave .pe.

[262] Sāvatthīnidānaṁ. Seyyathāpi bhikkhave yāni kānici
tantāvutānaṁ vatthānaṁ vāsikavatthaṁ tesaṁ aggamakkhāyati. Evameva
kho bhikkhave ye keci kusalā dhammā sabbe te appamādamūlakā
appamādasamosaraṇā appamādo tesaṁ dhammānaṁ aggamakkhāyati.
Appamattassetaṁ bhikkhave bhikkhuno pāṭikaṅkhaṁ ariyaṁ aṭṭhaṅgikaṁ maggaṁ
bhāvessati ariyaṁ aṭṭhaṅgikaṁ maggaṁ bahulīkarissatīti.

[263] Kathañca bhikkhave bhikkhu appamatto ariyaṁ aṭṭhaṅgikaṁ
maggaṁ bhāveti ariyaṁ aṭṭhaṅgikaṁ maggaṁ bahulīkaroti. Idha bhikkhave
bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ .pe. Sammāsamādhiṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ. Evaṁ kho bhikkhave bhikkhu
appamatto ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ maggaṁ
bahulīkarotīti.
Appamādavaggo samatto.
Tassuddānaṁ
tathāgataṁ padaṁ kūṭaṁ mūlaṁ sārena 1 vassikaṁ
rājā candimasuriyā ca vatthena dasamaṁ padaṁ.
(yadapi tathāgataṁ tadapi vitthāretabbaṁ).
---------
1 Ma. Yu. ... sāro ca ....
Balakaraṇīyavaggo ekādasamo