[114] Sāvatthīnidānaṁ. Brahmacariyañca vo bhikkhave desissāmi
brahmacariyatthañca taṁ suṇātha.

[115] Katamañca bhikkhave brahmacariyaṁ. Ayamevāriyo aṭṭhaṅgiko
maggo. Seyyathīdaṁ. Sammādiṭṭhi .pe. Sammāsamādhi. Idaṁ
vuccati bhikkhave brahmacariyaṁ.

[116] Katamo ca bhikkhave brahmacariyattho. Yo ca 1 bhikkhave
rāgakkhayo dosakkhayo mohakkhayo. Ayaṁ vuccati bhikkhave brahmacariyatthoti.
Paṭipattivaggo catuttho.
Tassuddānaṁ
paṭipatti paṭipanno ca viraddhañca 2 pāraṁ gamā
sāmaññena [3]- dve vuttā brahmaññā apare duve
brahmacariyena dve vuttā vaggo tena pavuccatīti.
----------
1 Ma. Yu. kho. 2 Po. viraddhaṁ aparaṁ gamā. 3 Ma. ca.
Aññatitthiyavaggo pañcamo

[117] Sāvatthīnidānaṁ. Sace vo bhikkhave aññatitthiyā
paribbājakā evaṁ puccheyyuṁ kimatthiyaṁ āvuso samaṇe gotame
brahmacariyaṁ vussatīti. Evaṁ puṭṭhā tumhe bhikkhave tesaṁ aññatitthiyānaṁ
paribbājakānaṁ evaṁ byākareyyātha rāgavirāgatthaṁ kho
āvuso bhagavati brahmacariyaṁ vussatīti.

[118] Sace pana vo bhikkhave aññatitthiyā paribbājakā
evaṁ puccheyyuṁ atthi panāvuso maggo atthi paṭipadā rāgavirāgāyāti.
Evaṁ puṭṭhā tumhe bhikkhave tesaṁ aññatitthiyānaṁ
paribbājakānaṁ evaṁ byākareyyātha atthi kho āvuso maggo
atthi paṭipadā rāgavirāgāyāti.

[119] Katamo ca bhikkhave maggo katamā ca paṭipadā
rāgavirāgāya. Ayamevāriyo aṭṭhaṅgiko maggo. Seyyathīdaṁ.
Sammādiṭṭhi .pe. Sammāsamādhi. Ayaṁ bhikkhave maggo ayaṁ
paṭipadā rāgavirāgāyāti. Evaṁ puṭṭhā tumhe bhikkhave tesaṁ
aññatitthiyānaṁ paribbājakānaṁ evaṁ byākareyyāthāti.

[120] Sāvatthīnidānaṁ. Sace vo bhikkhave aññatitthiyā
paribbājakā evaṁ puccheyyuṁ kimatthiyaṁ āvuso samaṇe gotame
brahmacariyaṁ vussatīti. Evaṁ puṭṭhā tumhe bhikkhave tesaṁ aññatitthiyānaṁ
Paribbājakānaṁ evaṁ byākareyyātha saññojanapahānatthaṁ
kho āvuso bhagavati brahmacariyaṁ vussatīti .pe.

[121] Anusayasamugghātanatthaṁ kho āvuso bhagavati brahmacariyaṁ
vussatīti .pe.

[122] Addhānapariññatthaṁ kho āvuso bhagavati brahmacariyaṁ
vussatīti .pe.

[123] Āsavānaṁ khayatthaṁ kho āvuso bhagavati brahmacariyaṁ
vussatīti .pe.