[124] Vijjāvimuttiphalasacchikiriyatthaṁ kho āvuso bhagavati
brahmacariyaṁ vussatīti .pe.

[125] Ñāṇadassanatthaṁ kho āvuso bhagavati brahmacariyaṁ
vussatīti .pe.

[126] Sace vo bhikkhave aññatitthiyā paribbājakā evaṁ
puccheyyuṁ kimatthiyaṁ āvuso samaṇe gotame brahmacariyaṁ vussatīti.
Evaṁ puṭṭhā tumhe bhikkhave tesaṁ aññatitthiyānaṁ paribbājakānaṁ
evaṁ byākareyyātha anupādāparinibbānatthaṁ kho āvuso bhagavati
brahmacariyaṁ vussatīti.

[127] Sace pana vo bhikkhave aññatitthiyā paribbājakā evaṁ
puccheyyuṁ atthi panāvuso maggo atthi paṭipadā anupādāparinibbānāyāti.
Evaṁ puṭṭhā tumhe bhikkhave tesaṁ aññatitthiyānaṁ
Paribbājakānaṁ evaṁ byākareyyātha atthi kho āvuso
maggo atthi paṭipadā anupādāparinibbānāyāti.

[128] Katamo ca bhikkhave maggo katamā ca paṭipadā
anupādāparinibbānāya. Ayamevāriyo aṭṭhaṅgiko maggo. Seyyathīdaṁ.
Sammādiṭṭhi .pe. Sammāsamādhi. Ayaṁ bhikkhave maggo ayaṁ
paṭipadā anupādāparinibbānāyāti. Evaṁ puṭṭhā tumhe bhikkhave
tesaṁ aññatitthiyānaṁ paribbājakānaṁ evaṁ byākareyyāthāti.
Aññatitthiyavaggo 1 pañcamo.
Tassuddānaṁ
virāgasaññojanaṁ anusayaṁ addhānāasavā khayā
vijjāvimutti ñāṇañca anupādāya aṭṭhamī.
-------
1 Ma. aññatitthiyapeyyālaṁ. Yu. aññatitthiyapeyyālo.
Suriyapeyyālo chaṭṭho

[129] Sāvatthīnidānaṁ. Suriyassa 1 bhikkhave udayato etaṁ pubbaṅgamaṁ
etaṁ pubbanimittaṁ yadidaṁ aruṇuggaṁ. Evameva kho bhikkhave bhikkhuno
ariyassa aṭṭhaṅgikassa maggassa uppādāya etaṁ pubbaṅgamaṁ etaṁ
pubbanimittaṁ yadidaṁ kalyāṇamittatā. Kalyāṇamittassetaṁ bhikkhave
bhikkhuno pāṭikaṅkhaṁ ariyaṁ aṭṭhaṅgikaṁ maggaṁ bhāvessati ariyaṁ
aṭṭhaṅgikaṁ maggaṁ bahulīkarissatīti 2 .

[130] Kathañca bhikkhave bhikkhu kalyāṇamitto ariyaṁ aṭṭhaṅgikaṁ
maggaṁ bhāveti ariyaṁ aṭṭhaṅgikaṁ maggaṁ bahulīkaroti. Idha bhikkhave
bhikkhu sammādiṭṭhiṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ .pe. Sammāsamādhiṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ. Evaṁ kho bhikkhave bhikkhu
kalyāṇamitto ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ
maggaṁ bahulīkarotīti.

[131] Sāvatthīnidānaṁ. Suriyassa bhikkhave udayato etaṁ pubbaṅgamaṁ
etaṁ pubbanimittaṁ yadidaṁ aruṇuggaṁ. Evameva kho bhikkhave bhikkhuno
ariyassa aṭṭhaṅgikassa maggassa uppādāya etaṁ pubbaṅgamaṁ etaṁ
pubbanimittaṁ yadidaṁ sīlasampadā. Sīlasampannassetaṁ bhikkhave bhikkhuno
pāṭikaṅkhaṁ .pe.
1 Ma. sūriyassa. evamupari. 2 Ma. Yu. itisaddo natthi. evamupari.

[132] Yadidaṁ chandasampadā .pe.

[133] Yadidaṁ attasampadā .pe.