[768] Taṁ kiṁ maññasi anurādha rūpasmiṁ tathāgatoti samanupassasīti.
No hetaṁ bhante. Aññatra rūpā tathāgatoti samanupassasīti.
No hetaṁ bhante. Vedanāya tathāgatoti samanupassasīti.
No hetaṁ bhante. Aññatra vedanāya .pe.
Saññāya .pe. Aññatra saññāya .pe. Saṅkhāresu .pe.
Aññatra saṅkhārehi .pe. Viññāṇasmiṁ tathāgatoti samanupassasīti.
No hetaṁ bhante. Aññatra viññāṇā tathāgatoti
samanupassasīti. No hetaṁ bhante.

[769] Taṁ kiṁ maññasi anurādha rūpaṁ vedanaṁ saññaṁ saṅkhāre
viññāṇaṁ tathāgatoti samanupassasīti. No hetaṁ bhante.

[770] Taṁ kiṁ maññasi anurādha yaṁ so arūpī avedano asaññī
asaṅkhāro aviññāṇo tathāgatoti samanupassasīti. No hetaṁ
bhante. Ettha ca te anurādha diṭṭhe va dhamme saccato 1 vā
tathato vā anupalabbhiyamāno kallaṁ nu te taṁ veyyākaraṇaṁ yo
so āvuso tathāgato uttamapuriso paramapuriso paramapattipatto
taṁ tathāgato aññatrimehi catūhi ṭhānehi paññāpayamāno paññapeti
hoti tathāgato paraṁ maraṇāti vā .pe. Neva hoti na na hoti
tathāgato paraṁ maraṇāti vāti. No hetaṁ bhante. Sādhu sādhu
anurādha pubbe cāhaṁ anurādha etarahi ca dukkhañceva paññapemi
dukkhassa ca nirodhanti. Dutiyaṁ.

[771] Ekaṁ samayaṁ āyasmā ca sārīputto āyasmā ca
mahākoṭṭhito 2 bārāṇasiyaṁ viharanti isipatane migadāye. Atha kho āyasmā
1 Ma. saccato thetato tathāgato anupalabbhiyamāno. 2 Ma. Yu. mahākoṭṭhiko.
evamuparipi.
Mahākoṭṭhito sāyaṇhasamayaṁ paṭisallānā vuṭṭhito yenāyasmā
sārīputto tenupasaṅkami upasaṅkamitvā āyasmatā sārīputtena
saddhiṁ sammodi sammodanīyaṁ kathaṁ sārāṇīyaṁ vītisāretvā ekamantaṁ
nisīdi. Ekamantaṁ nisinno kho āyasmā mahākoṭṭhito āyasmantaṁ
sārīputtaṁ etadavoca kiṁ nu kho āvuso sārīputta hoti tathāgato
paraṁ maraṇāti. Abyākataṁ kho etaṁ āvuso bhagavatā hoti
tathāgato paraṁ maraṇāti. Kiṁ panāvuso na hoti tathāgato paraṁ
maraṇāti. Etampi kho āvuso abyākataṁ bhagavatā na hoti
tathāgato paraṁ maraṇāti. Kiṁ nu kho āvuso hoti ca na ca
hoti tathāgato paraṁ maraṇāti. Abyākataṁ kho etaṁ āvuso
bhagavatā hoti ca na ca hoti tathāgato paraṁ maraṇāti. Kiṁ
panāvuso neva hoti na na hoti tathāgato paraṁ maraṇāti.
Etampi kho āvuso abyākataṁ bhagavatā neva hoti na na hoti
tathāgato paraṁ maraṇāti. Kiṁ nu kho āvuso hoti tathāgato
paraṁ maraṇāti iti puṭṭho samāno abyākataṁ kho etaṁ āvuso
bhagavatā hoti tathāgato paraṁ maraṇāti vadesi .pe. Kiṁ panāvuso
neva hoti na na hoti tathāgato paraṁ maraṇāti iti puṭṭho
samāno etampi kho āvuso abyākataṁ bhagavatā neva hoti
na na hoti tathāgato paraṁ maraṇāti vadesi. Ko nu kho āvuso
hetu ko paccayo yenetaṁ 1 abyākataṁ bhagavatāti.
1 Yu. yena taṁ. evamuparipi.

[772] Hoti tathāgato paraṁ maraṇāti kho āvuso rūpagatametaṁ.
Na hoti tathāgato paraṁ maraṇāti rūpagatametaṁ. Hoti ca na ca
hoti tathāgato paraṁ maraṇāti rūpagatametaṁ. Neva hoti na
na hoti tathāgato paraṁ maraṇāti rūpagatametaṁ. Hoti tathāgato
paraṁ maraṇāti kho āvuso vedanāgatametaṁ. Na hoti tathāgato
paraṁ maraṇāti vedanāgatametaṁ. Hoti ca na ca hoti tathāgato
paraṁ maraṇāti vedanāgatametaṁ. Neva hoti na na hoti tathāgato
paraṁ maraṇāti vedanāgatametaṁ. Hoti tathāgato paraṁ maraṇāti
kho āvuso saññāgatametaṁ. Na hoti tathāgato paraṁ maraṇāti
saññāgatametaṁ. Hoti ca na ca hoti tathāgato paraṁ maraṇāti
saññāgatametaṁ. Neva hoti na na hoti tathāgato paraṁ maraṇāti
saññāgatametaṁ. Hoti tathāgato paraṁ maraṇāti kho āvuso
saṅkhāragatametaṁ. Na hoti tathāgato paraṁ maraṇāti saṅkhāragatametaṁ.
Hoti ca na ca hoti tathāgato paraṁ maraṇāti saṅkhāragatametaṁ.
Neva hoti na na hoti tathāgato paraṁ maraṇāti saṅkhāragatametaṁ.
Hoti tathāgato paraṁ maraṇāti kho āvuso viññāṇagatametaṁ.
Na hoti tathāgato paraṁ maraṇāti viññāṇagatametaṁ. Hoti ca na
ca hoti tathāgato paraṁ maraṇāti viññāṇagatametaṁ. Neva hoti
na na hoti tathāgato paraṁ maraṇāti viññāṇagatametaṁ. Ayaṁ kho
āvuso hetu ayaṁ paccayo yenetaṁ abyākataṁ bhagavatāti. Tatiyaṁ.

[773] Ekaṁ samayaṁ āyasmā ca sārīputto āyasmā ca
mahākoṭṭhito bārāṇasiyaṁ viharanti isipatane migadāye .pe.
Sāyeva pucchā. Ko nu kho āvuso hetu ko paccayo yenetaṁ
abyākataṁ bhagavatāti.

[774] Rūpaṁ kho āvuso ajānato apassato yathābhūtaṁ rūpasamudayaṁ
ajānato apassato yathābhūtaṁ rūpanirodhaṁ ajānato apassato
yathābhūtaṁ rūpanirodhagāminīpaṭipadaṁ ajānato apassato yathābhūtaṁ hoti
tathāgato paraṁ maraṇātipissa hoti. Na hoti tathāgato paraṁ
maraṇātipissa hoti. Hoti ca na ca hoti tathāgato paraṁ maraṇātipissa
hoti. Neva hoti na na hoti tathāgato paraṁ maraṇātipissa
hoti. Vedanaṁ. Saññaṁ. Saṅkhāre. Viññāṇaṁ ajānato apassato
yathābhūtaṁ viññāṇasamudayaṁ ajānato apassato yathābhūtaṁ viññāṇanirodhaṁ
ajānato apassato yathābhūtaṁ viññāṇanirodhagāminīpaṭipadaṁ
ajānato apassato yathābhūtaṁ hoti tathāgato paraṁ maraṇātipissa
hoti. Na hoti tathāgato paraṁ maraṇātipissa hoti. Hoti
ca na ca hoti tathāgato paraṁ maraṇātipissa hoti. Neva hoti
na na hoti tathāgato paraṁ maraṇātipissa hoti.

[775] Rūpañca kho āvuso jānato passato yathābhūtaṁ rūpasamudayaṁ
jānato passato yathābhūtaṁ rūpanirodhaṁ jānato passato yathābhūtaṁ
rūpanirodhagāminīpaṭipadaṁ jānato passato yathābhūtaṁ hoti tathāgato
Paraṁ maraṇātipissa na hoti .pe. Neva hoti na na hoti
tathāgato paraṁ maraṇātipissa na hoti na vedanaṁ. Saññaṁ. Saṅkhāre.
Viññāṇaṁ jānato passato yathābhūtaṁ viññāṇasamudayaṁ jānato
passato yathābhūtaṁ viññāṇanirodhaṁ jānato passato yathābhūtaṁ
viññāṇanirodhagāminīpaṭipadaṁ jānato passato yathābhūtaṁ hoti tathāgato
paraṁ maraṇātipissa na hoti. Na hoti tathāgato paraṁ maraṇātipissa
na hoti. Hoti ca na ca hoti tathāgato paraṁ maraṇātipissa
na hoti. Neva hoti na na hoti tathāgato paraṁ maraṇātipissa
na hoti. Ayaṁ kho āvuso hetu ayaṁ paccayo yenetaṁ abyākataṁ
bhagavatāti. Catutthaṁ.

[776] Ekaṁ samayaṁ āyasmā ca sārīputto āyasmā ca
mahākoṭṭhito bārāṇasiyaṁ viharanti isipatane migadāye .pe.
Sāyeva pucchā. Ko nu kho āvuso hetu ko paccayo yenetaṁ
abyākataṁ bhagavatāti.

[777] Rūpe kho āvuso avigatarāgassa avigatacchandassa avigatapemassa
avigatapipāsassa avigatapariḷāhassa avigatataṇhassa hoti
tathāgato paraṁ maraṇātipissa hoti .pe. Neva hoti na na
hoti tathāgato paraṁ maraṇātipissa hoti. Vedanāya. Saññāya.
Saṅkhāresu. Viññāṇe avigatarāgassa avigatacchandassa avigatapemassa
avigatapipāsassa avigatapariḷāhassa avigatataṇhassa hoti tathāgato
Paraṁ maraṇātipissa hoti .pe. Neva hoti na na hoti tathāgato
paraṁ maraṇātipissa hoti.