[428] Evaṁ vutte moḷiyasivako paribbājako bhagavantaṁ etadavoca
abhikkantaṁ bho gotama abhikkantaṁ bho gotama upāsakaṁ maṁ bhavaṁ
gotamo dhāretu ajjatagge pāṇupetaṁ saraṇaṅgatanti.

[429] Pittaṁ semhañca vāto ca sannipātā utūni ca
visamaṁ opakkamikañca 2 kammavipākena aṭṭhamīti. Paṭhamaṁ.

[430] Aṭṭhasatapariyāyaṁ vo bhikkhave dhammapariyāyaṁ desissāmi
taṁ suṇātha. Katamo ca bhikkhave aṭṭhasatapariyāyo dhammapariyāyo.
Dvepi mayā bhikkhave vedanā vuttā pariyāyena tissopi mayā
vedanā vuttā pariyāyena pañcapi mayā vedanā vuttā pariyāyena
1 Ma. Yu. sannipātikānipi. 2 Ma. Yu. casaddo natthi.
Chapi mayā vedanā vuttā pariyāyena aṭṭhārasāpi mayā vedanā
vuttā pariyāyena chattiṁsāpi mayā vedanā vuttā pariyāyena
aṭṭhasataṁpi mayā vedanā vuttā pariyāyena.

[431] Katamā ca bhikkhave dve vedanā kāyikā ca cetasikā
ca. Imā vuccanti bhikkhave dve vedanā.

[432] Katamā ca bhikkhave tisso vedanā sukhā vedanā dukkhā
vedanā adukkhamasukhā vedanā. Imā vuccanti bhikkhave tisso
vedanā.

[433] Katamā ca bhikkhave pañca vedanā sukhindriyaṁ dukkhindriyaṁ
somanassindriyaṁ domanassindriyaṁ upekkhindriyaṁ. Imā vuccanti
bhikkhave pañca vedanā.

[434] Katamā ca bhikkhave cha vedanā cakkhusamphassajā vedanā
.pe. Manosamphassajā vedanā. Imā vuccanti bhikkhave
cha vedanā.

[435] Katamā ca bhikkhave aṭṭhārasa vedanā cha somanassūpavicārā
cha domanassūpavicārā cha upekkhūpavicārā. Imā vuccanti bhikkhave
aṭṭhārasa vedanā.

[436] Katamā ca bhikkhave chattiṁsa vedanā cha gehasitāni
somanassāni cha nekkhammasitāni somanassāni cha gehasitāni
domanassāni cha nekkhammasitāni domanassāni cha gehasitā
Upekkhā cha nekkhammasitā upekkhā. Imā vuccanti bhikkhave
chattiṁsa vedanā.

[437] Katamā ca bhikkhave aṭṭhasataṁ vedanā atītā chattiṁsa
vedanā anāgatā chattiṁsa vedanā paccuppannā chattiṁsa vedanā.
Imā vuccanti bhikkhave aṭṭhasataṁ vedanā. Ayaṁpi kho bhikkhave
aṭṭhasatapariyāyo dhammapariyāyoti. Dutiyaṁ.