[418] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sukhassa ca pahānā dukkhassa
ca pahānā pubbeva somanassadomanassānaṁ atthaṅgamā adukkhamasukhaṁ
upekkhāsatipārisuddhiṁ catutthajjhānaṁ upasampajja viharati. Idaṁ kho
ānanda etamhā sukhā aññaṁ sukhaṁ abhikkantatarañca paṇītatarañca.
[419] Ye kho ānanda evaṁ vadeyyuṁ etaṁ paramaṁ santaṁ sukhaṁ
somanassaṁ paṭisaṁvedentīti. Idaṁ nesāhaṁ nānujānāmi. Taṁ kissa
hetu. Atthānanda etamhā sukhā aññaṁ sukhaṁ abhikkantatarañca
paṇītatarañca.
[420] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sabbaso rūpasaññānaṁ samatikkamā
paṭighasaññānaṁ atthaṅgamā nānattasaññānaṁ amanasikārā ananto
ākāsoti ākāsānañcāyatanaṁ upasampajja viharati. Idaṁ kho ānanda
etamhā sukhā aññaṁ sukhaṁ abhikkantatarañca paṇītatarañca. Ye kho
ānanda evaṁ vadeyyuṁ etaṁ paramaṁ santaṁ sukhaṁ somanassaṁ paṭisaṁvedentīti.
Idaṁ nesāhaṁ nānujānāmi. Taṁ kissa hetu. Atthānanda etamhā
sukhā aññaṁ sukhaṁ abhikkantatarañca paṇītatarañca.
[421] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sabbaso ākāsānañcāyatanaṁ
samatikkamma anantaṁ viññāṇanti viññāṇañcāyatanaṁ upasampajja
viharati. Idaṁ kho ānanda etamhā sukhā aññaṁ sukhaṁ abhikkantatarañca
paṇītatarañca. Ye kho ānanda evaṁ vadeyyuṁ etaṁ paramaṁ
santaṁ sukhaṁ somanassaṁ paṭisaṁvedentīti. Idaṁ nesāhaṁ nānujānāmi.
Taṁ kissa hetu. Atthānanda etamhā sukhā aññaṁ sukhaṁ abhikkantatarañca
paṇītatarañca.
[422] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sabbaso viññāṇañcāyatanaṁ
samatikkamma natthi kiñcīti ākiñcaññāyatanaṁ upasampajja viharati.
Idaṁ kho ānanda etamhā sukhā aññaṁ sukhaṁ abhikkantatarañca
Paṇītatarañca. Ye kho ānanda evaṁ vadeyyuṁ etaṁ paramaṁ santaṁ
sukhaṁ somanassaṁ paṭisaṁvedentīti. Idaṁ nesāhaṁ nānujānāmi. Taṁ
kissa hetu. Atthānanda etamhā sukhā aññaṁ sukhaṁ abhikkantatarañca
paṇītatarañca.
[423] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sabbaso ākiñcaññāyatanaṁ
samatikkamma nevasaññānāsaññāyatanaṁ upasampajja viharati. Idaṁ
kho ānanda etamhā sukhā aññaṁ sukhaṁ abhikkantatarañca paṇītatarañca.
Ye kho ānanda evaṁ vadeyyuṁ etaṁ paramaṁ santaṁ sukhaṁ
somanassaṁ paṭisaṁvedentīti. Idaṁ nesāhaṁ nānujānāmi. Taṁ kissa
hetu. Atthānanda etamhā sukhā aññaṁ sukhaṁ abhikkantatarañca
paṇītatarañca.
[424] Katamañcānanda etamhā sukhā aññaṁ sukhaṁ abhikkantatarañca
paṇītatarañca. Idhānanda bhikkhu sabbaso nevasaññānāsaññāyatanaṁ
samatikkamma saññāvedayitanirodhaṁ upasampajja viharati.
Idaṁ kho ānanda etamhā sukhā aññaṁ sukhaṁ abhikkantatarañca paṇītatarañca.
Ṭhānaṁ kho panetaṁ ānanda vijjati yaṁ aññatitthiyā
paribbājakā evaṁ vadeyyuṁ saññāvedayitanirodhaṁ samaṇo gotamo āha
tañca sukhasmiṁ paññapeti tayidaṁ kiṁsu tayidaṁ kathaṁsūti. Evaṁvādino
ānanda aññatitthiyā paribbājakā evamassu vacanīyā na kho
Āvuso bhagavā sukhaññeva vedanaṁ sandhāya sukhasmiṁ paññapeti
yattha yatthāvuso sukhaṁ upalabbhati yahiṁ yahiṁ 1 taṁ taṁ tathāgato
sukhasmiṁ paññapetīti. Navamaṁ.
[425] Dvepi mayā bhikkhave vedanā vuttā pariyāyena tissopi
mayā vedanā vuttā pariyāyena pañcapi mayā vedanā vuttā
pariyāyena chapi mayā vedanā vuttā pariyāyena aṭṭhārasāpi
mayā vedanā vuttā pariyāyena chattiṁsāpi mayā vedanā vuttā
pariyāyena aṭṭhasataṁpi mayā vedanā vuttā pariyāyena. Evaṁ
pariyāyadesito bhikkhave mayā dhammo evaṁ pariyāyadesite kho
bhikkhave mayā dhamme ye aññamaññassa subhāsitaṁ sulapitaṁ na
samanumaññissanti na samanujānissanti na samanumodissanti. Tesaṁ
etaṁ pāṭikaṅkhaṁ bhaṇḍanajātā kalahajātā vivādāpannā aññamaññaṁ
mukhasattīhi vitudantā viharissantīti. Evaṁ pariyāyadesito bhikkhave
mayā dhammo evaṁ pariyāyadesite kho bhikkhave mayā dhamme ye
aññamaññassa subhāsitaṁ sulapitaṁ samanumaññissanti samanujānissanti
samanumodissanti. Tesaṁ etaṁ pāṭikaṅkhaṁ samaggā sammodamānā
avivadamānā khīrodakībhūtā aññamaññaṁ piyacakkhūhi sampassantā
viharissantīti.
[426] Pañcime bhikkhave kāmaguṇā .pe. Ṭhānaṁ kho panetaṁ
bhikkhave vijjati yaṁ aññatitthiyā paribbājakā evaṁ vadeyyuṁ saññāvedayitanirodhaṁ
1 Yu. yamhi sukhaṁ. evamuparipi.
Samaṇo gotamo āha tañca sukhasmiṁ paññapeti
tayidaṁ kiṁsu tayidaṁ kathaṁsūti. Evaṁvādino bhikkhave aññatitthiyā
paribbājakā evamassu vacanīyā na kho āvuso bhagavā sukhaññeva
vedanaṁ sandhāya sukhasmiṁ paññapeti yattha yattha āvuso sukhaṁ
upalabbhati yahiṁ yahiṁ taṁ taṁ tathāgato sukhasmiṁ paññapetīti.
Dasamaṁ.
Rahogatavaggo dutiyo.
Tassuddānaṁ
rahogatā 1 dve vātā ca nivāsā dve ānandakā
sambahulā ca dve vuttā pañcakaṅgo ca bhikkhunāti.
-----------
1 Ma. rahogataṁ dve ākāsaṁ agāraṁ dve ca ānandā.
sambahulā duve vuttā pañcakaṅgo ca bhikkhunāti.
Yu. rahogataṁ dve ākāsaṁ agāraṁ dve ca santakaṁ.
aṭṭhaṅgena ca dve vuttā pañcakaṅgo ca bhikkhunāti.
Aṭṭhasatapariyāyavaggo tatiyo
[427] Ekaṁ samayaṁ bhagavā rājagahe viharati veḷuvane kalandakanivāpe.
Atha kho moḷiyasivako 1 paribbājako yena bhagavā tenupasaṅkami
upasaṅkamitvā bhagavatā saddhiṁ sammodi sammodanīyaṁ kathaṁ sārāṇīyaṁ
vītisāretvā ekamantaṁ nisīdi. Ekamantaṁ nisinno kho moḷiyasivako
paribbājako bhagavantaṁ etadavoca santi bho gotama eke
samaṇabrāhmaṇā evaṁvādino evaṁdiṭṭhino yaṅkiñcāyaṁ purisapuggalo
paṭisaṁvedeti sukhaṁ vā dukkhaṁ vā adukkhamasukhaṁ vā sabbantaṁ pubbekatahetūti.
Idha pana 2 bhavaṁ gotamo kimāhāti. Pittasamuṭṭhānānipi
kho sivaka idhekaccāni vedayitāni uppajjanti.
Sāmaṁpi kho etaṁ sivaka evaṁ veditabbaṁ yathā pittasamuṭṭhānānipi
idhekaccāni vedayitāni uppajjanti. Lokassapi kho etaṁ sivaka
saccasammataṁ yathā pittasamuṭṭhānānipi idhekaccāni vedayitāni
uppajjanti. Tatra sivaka ye te samaṇabrāhmaṇā evaṁvādino
evaṁdiṭṭhino yaṅkiñcāyaṁ purisapuggalo paṭisaṁvedayati 3 sukhaṁ vā dukkhaṁ vā
adukkhamasukhaṁ vā sabbantaṁ pubbekatahetūti. Yañca sāmaṁ ñātaṁ
tañca atidhāvanti yaṁ 4 loke saccasammataṁ tañca atidhāvanti.
Tasmā tesaṁ samaṇabrāhmaṇānaṁ micchāti vadāmi. Semhasamuṭṭhānānipi
kho sivaka .pe. Vātasamuṭṭhānānipi kho sivaka
1 Ma. moḷiyasīvako. Yu. moliyasīvako. 2 Ma. panasaddo natthi.
3 Ma. Yu. paṭisaṁvedeti. 4 Ma. yañca. Yu. yaṁ ca.
.pe. Sannipātasamuṭṭhānānipi 1 kho sivaka .pe. Utupariṇāmajānipi
kho sivaka. Visamaparihārajānipi kho sivaka. Opakkamikānipi kho
sivaka .pe. Kammavipākajānipi kho sivaka idhekaccāni vedayitāni
uppajjanti. Sāmaṁpi kho etaṁ sivaka evaṁ veditabbaṁ yathā kammavipākajānipi
idhekaccāni vedayitāni uppajjanti lokassapi kho etaṁ
sivaka saccasammataṁ yathā kammavipākajānipi idhekaccāni vedayitāni
uppajjanti. Tattha sivaka ye te samaṇabrāhmaṇā evaṁvādino
evaṁdiṭṭhino yaṅkiñcāyaṁ purisapuggalo paṭisaṁvedayati sukhaṁ vā dukkhaṁ vā
adukkhamasukhaṁ vā sabbantaṁ pubbekatahetūti. Yañca sāmaṁ ñātaṁ
tañca atidhāvanti yaṁ loke saccasammataṁ tañca atidhāvanti
tasmā tesaṁ samaṇabrāhmaṇānaṁ micchāti vadāmīti.