[530] Sāvatthī. Tatra kho. Catasso imā bhikkhave
supaṇṇayoniyo. Katamā catasso. Aṇḍajā supaṇṇā jalābujā
supaṇṇā saṁsedajā supaṇṇā upapātikā supaṇṇā. Imā kho
bhikkhave catasso supaṇṇayoniyoti.

[531] Sāvatthī. Catasso imā bhikkhave supaṇṇayoniyo.
Katamā catasso. Aṇḍajā supaṇṇā jalābujā supaṇṇā saṁsedajā
supaṇṇā upapātikā supaṇṇā. Tatra bhikkhave aṇḍajā supaṇṇā
aṇḍaje nāge haranti na jalābuje na saṁsedaje na upapātike.
Tatra bhikkhave jalābujā supaṇṇā aṇḍaje ca jalābuje ca nāge
haranti na saṁsedaje na upapātike. Tatra bhikkhave saṁsedajā
supaṇṇā aṇḍaje ca jalābuje ca saṁsedaje ca nāge haranti na
upapātike. Tatra bhikkhave upapātikā supaṇṇā aṇḍaje ca
jalābuje ca saṁsedaje ca upapātike ca nāge haranti. Imā kho
bhikkhave catasso supaṇṇayoniyoti.

[532] Sāvatthī. Aññataro bhikkhu yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho so bhikkhu bhagavantaṁ etadavoca ko nu kho bhante
hetu ko paccayo yena midhekacco kāyassa bhedā paraṁ maraṇā
Aṇḍajānaṁ supaṇṇānaṁ sahabyataṁ upapajjatīti. Idha bhikkhu ekacco
kāyena dvayakārī hoti vācāya dvayakārī manasā dvayakārī tassa
sutaṁ hoti aṇḍajā supaṇṇā dīghāyukā vaṇṇavanto
sukhabahulāti. Tassa evaṁ hoti aho vatāhaṁ kāyassa bhedā paraṁ
maraṇā aṇḍajānaṁ supaṇṇānaṁ sahabyataṁ upapajjeyyanti. So
kāyassa bhedā paraṁ maraṇā aṇḍajānaṁ supaṇṇānaṁ sahabyataṁ upapajjati.
Ayaṁ kho bhikkhu hetu ayaṁ paccayo yena midhekacco kāyassa
bhedā paraṁ maraṇā aṇḍajānaṁ supaṇṇānaṁ sahabyataṁ upapajjatīti.

[533] Sāvatthī. Ekamantaṁ nisinno kho so bhikkhu bhagavantaṁ
etadavoca ko nu kho bhante hetu ko paccayo yena midhekacco
kāyassa bhedā paraṁ maraṇā jalābujānaṁ supaṇṇānaṁ .pe. Saṁsedajānaṁ
supaṇṇānaṁ. Upapātikānaṁ supaṇṇānaṁ sahabyataṁ upapajjatīti.
Idha bhikkhu ekacco kāyena dvayakārī hoti vācāya dvayakārī manasā
dvayakārī tassa sutaṁ hoti upapātikā supaṇṇā dīghāyukā
vaṇṇavanto sukhabahulāti. Tassa evaṁ hoti aho vatāhaṁ
kāyassa bhedā paraṁ maraṇā upapātikānaṁ supaṇṇānaṁ sahabyataṁ
upapajjeyyanti. So kāyassa bhedā paraṁ maraṇā upapātikānaṁ
supaṇṇānaṁ sahabyataṁ upapajjati. Ayaṁ kho bhikkhu hetu ayaṁ
paccayo yena midhekacco kāyassa bhedā paraṁ maraṇā upapātikānaṁ
supaṇṇānaṁ sahabyataṁ upapajjatīti.

[534] Sāvatthī. Ekamantaṁ nisinno kho so bhikkhu bhagavantaṁ
etadavoca ko nu kho bhante hetu ko paccayo yena midhekacco
kāyassa bhedā paraṁ maraṇā aṇḍajānaṁ supaṇṇānaṁ sahabyataṁ
upapajjatīti. Idha bhikkhu ekacco kāyena dvayakārī hoti vācāya
dvayakārī manasā dvayakārī tassa sutaṁ hoti aṇḍajā supaṇṇā
dīghāyukā vaṇṇavanto sukhabahulāti. Tassa evaṁ hoti aho
vatāhaṁ kāyassa bhedā paraṁ maraṇā aṇḍajānaṁ supaṇṇānaṁ sahabyataṁ
upapajjeyyanti. So annaṁ deti pānaṁ deti vatthaṁ deti yānaṁ
deti mālaṁ deti gandhaṁ deti vilepanaṁ deti seyyaṁ deti āvasathaṁ
deti padīpeyyaṁ deti. So kāyassa bhedā paraṁ maraṇā aṇḍajānaṁ
supaṇṇānaṁ sahabyataṁ upapajjati. Ayaṁ kho bhikkhu hetu ayaṁ
paccayo yena midhekacco kāyassa bhedā paraṁ maraṇā aṇḍajānaṁ
supaṇṇānaṁ sahabyataṁ upapajjati.

[535] Sāvatthī. Ekamantaṁ nisinno kho so bhikkhu bhagavantaṁ
etadavoca ko nu kho bhante hetu ko paccayo yena midhekacco
kāyassa bhedā paraṁ maraṇā jalābujānaṁ supaṇṇānaṁ .pe. Saṁsedajānaṁ
supaṇṇānaṁ. Upapātikānaṁ supaṇṇānaṁ sahabyataṁ upapajjatīti.
Idha bhikkhu ekacco kāyena dvayakārī hoti vācāya dvayakārī manasā
dvayakārī tassa sutaṁ hoti upapātikā supaṇṇā dīghāyukā
vaṇṇavanto sukhabahulāti. Tassa evaṁ hoti aho vatāhaṁ kāyassa
Bhedā paraṁ maraṇā upapātikānaṁ supaṇṇānaṁ sahabyataṁ upapajjeyyanti.
So annaṁ deti pānaṁ deti vatthaṁ deti yānaṁ deti mālaṁ deti
gandhaṁ deti vilepanaṁ deti seyyaṁ deti āvasathaṁ deti padīpeyyaṁ
deti. So kāyassa bhedā paraṁ maraṇā upapātikānaṁ supaṇṇānaṁ
sahabyataṁ upapajjati. Ayaṁ kho bhikkhu hetu ayaṁ paccayo yena
midhekacco kāyassa bhedā paraṁ maraṇā upapātikānaṁ supaṇṇānaṁ
sahabyataṁ upapajjatīti. (evaṁ 1 piṇḍikena chacattāḷīsaṁ suttantā
honti).
Supaṇṇasaṁyuttaṁ niṭṭhitaṁ.
Tassuddānaṁ
suddhakaṁ harati 2 ceva dvayakārī caturopi 3 ca
dānūpakārā cattāro 4 supaṇṇehi 5 suppakāsitāti.
----------
1 Yu. piṇḍakena cha cattāḷīsa. 2 Po. viharanti. Yu. haranti. 3 Yu. caturo ca.
4 Yu. dānupakāra ca cattāro. 5 Ma. supaṇṇe. Yu. supaṇṇā.
Gandhabbakāyasaṁyuttaṁ

[536] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme .pe. Bhagavā etadavoca gandhabbakāyike [1]-
deve vo bhikkhave desissāmi taṁ suṇātha .pe. Katame ca bhikkhave
gandhabbakāyikā devā. Santi bhikkhave mūlagandhe adhivatthā devā
santi bhikkhave sāragandhe adhivatthā devā santi bhikkhave pheggugandhe
adhivatthā devā santi bhikkhave tacagandhe adhivatthā devā
santi bhikkhave papaṭikagandhe adhivatthā devā santi bhikkhave
pattagandhe adhivatthā devā santi bhikkhave pupphagandhe adhivatthā
devā santi bhikkhave phalagandhe adhivatthā devā santi bhikkhave
rasagandhe adhivatthā devā santi bhikkhave gandhagandhe adhivatthā
devā. Ime vuccanti bhikkhave gandhabbakāyikā devāti.

[537] Sāvatthī. Atha kho aññataro bhikkhu yena bhagavā .pe.
Ekamantaṁ nisinno kho so bhikkhu bhagavantaṁ etadavoca ko nu kho
bhante hetu ko paccayo yena midhekacco kāyassa bhedā paraṁ
maraṇā gandhabbakāyikānaṁ devānaṁ sahabyataṁ upapajjatīti. Idha bhikkhu
ekacco kāyena sucaritaṁ carati vācāya sucaritaṁ carati manasā sucaritaṁ
carati tassa sutaṁ hoti gandhabbakāyikā devā dīghāyukā
vaṇṇavanto sukhabahulāti. Tassa evaṁ hoti aho vatāhaṁ kāyassa
1 Yu. voti dissati. Ma. kho.
Bhedā paraṁ maraṇā gandhabbakāyikānaṁ devānaṁ sahabyataṁ upapajjeyyanti.
So kāyassa bhedā paraṁ maraṇā gandhabbakāyikānaṁ devānaṁ sahabyataṁ
upapajjati. Ayaṁ kho bhikkhu hetu ayaṁ paccayo yena midhekacco
kāyassa bhedā paraṁ maraṇā gandhabbakāyikānaṁ devānaṁ sahabyataṁ
upapajjatīti.

[538] Sāvatthī. Atha kho aññataro bhikkhu yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho so bhikkhu bhagavantaṁ etadavoca ko nu
kho bhante hetu ko paccayo yena midhekacco kāyassa bhedā
paraṁ maraṇā mūlagandhe adhivatthānaṁ devānaṁ sahabyataṁ upapajjatīti.
Idha bhikkhu ekacco kāyena sucaritaṁ carati vācāya sucaritaṁ carati
manasā sucaritaṁ carati tassa sutaṁ hoti mūlagandhe adhivatthā devā
dīghāyukā vaṇṇavanto sukhabahulāti. Tassa evaṁ hoti aho
vatāhaṁ kāyassa bhedā paraṁ maraṇā mūlagandhe adhivatthānaṁ devānaṁ
sahabyataṁ upapajjeyyanti. So dātā hoti mūlagandhānaṁ. So
kāyassa bhedā paraṁ maraṇā mūlagandhe adhivatthānaṁ devānaṁ sahabyataṁ
upapajjati. Ayaṁ kho bhikkhu hetu ayaṁ paccayo yena midhekacco
kāyassa bhedā paraṁ maraṇā mūlagandhe adhivatthānaṁ devānaṁ sahabyataṁ
upapajjatīti.

[539] Sāvatthī. Ekamantaṁ nisinno kho so bhikkhu bhagavantaṁ
Etadavoca ko nu kho bhante hetu ko paccayo yena midhekacco
kāyassa bhedā paraṁ maraṇā sāragandhe adhivatthānaṁ devānaṁ .pe.
Pheggugandhe adhivatthānaṁ devānaṁ. Tacagandhe adhivatthānaṁ devānaṁ.
Papaṭikagandhe adhivatthānaṁ devānaṁ. Pattagandhe adhivatthānaṁ devānaṁ.
Pupphagandhe adhivatthānaṁ devānaṁ. Phalagandhe adhivatthānaṁ devānaṁ.
Rasagandhe adhivatthānaṁ devānaṁ. Gandhagandhe adhivatthānaṁ devānaṁ
sahabyataṁ upapajjatīti. Idha bhikkhu ekacco kāyena sucaritaṁ carati
vācāya sucaritaṁ carati manasā sucaritaṁ carati tassa sutaṁ hoti
sāragandhe adhivatthā devā dīghāyukā vaṇṇavanto sukhabahulāti.
Tassa evaṁ hoti aho vatāhaṁ kāyassa bhedā paraṁ maraṇā
sāragandhe adhivatthānaṁ devānaṁ. Pheggugandhe adhivatthānaṁ devānaṁ.
Tacagandhe adhivatthānaṁ devānaṁ. Papaṭikagandhe adhivatthānaṁ devānaṁ.
Pattagandhe adhivatthānaṁ devānaṁ. Pupphagandhe adhivatthānaṁ devānaṁ.
Phalagandhe adhivatthānaṁ devānaṁ. Rasagandhe adhivatthānaṁ devānaṁ.
Gandhagandhe adhivatthānaṁ devānaṁ sahabyataṁ upapajjeyyanti. So
dātā hoti sāragandhānaṁ. So dātā hoti pheggugandhānaṁ. So
dātā hoti tacagandhānaṁ. So dātā hoti papaṭikagandhānaṁ. So
dātā hoti pattagandhānaṁ. So dātā hoti pupphagandhānaṁ. So
dātā hoti phalagandhānaṁ. So dātā hoti rasagandhānaṁ. So
dātā hoti gandhagandhānaṁ. So kāyassa bhedā paraṁ maraṇā
Gandhagandhe adhivatthānaṁ devānaṁ sahabyataṁ upapajjati. Ayaṁ kho
bhikkhu hetu ayaṁ paccayo yena midhekacco kāyassa bhedā paraṁ
maraṇā gandhagandhe adhivatthānaṁ devānaṁ sahabyataṁ upapajjatīti.