[291] Katamā ca bhikkhave pariññā. Rāgakkhayo dosakkhayo
mohakkhayo. Ayaṁ vuccati bhikkhave pariññā.
1 Po. Yu. pariññā ca.

[292] Katamo ca bhikkhave pariññātāvī puggalo. Arahātissa
vacanīyaṁ. Yo ayaṁ 1 āyasmā evaṁnāmo evaṁgotto. Ayaṁ
vuccati bhikkhave pariññātāvī puggaloti.

[293] Sāvatthī. Pañcime bhikkhave upādānakkhandhā. Katame
pañca. Seyyathīdaṁ. Rūpūpādānakkhandho .pe. Viññāṇūpādānakkhandho.
Ye [2]- keci bhikkhave samaṇā vā brāhmaṇā vā imesaṁ
pañcannaṁ upādānakkhandhānaṁ assādañca ādīnavañca nissaraṇañca
yathābhūtaṁ nappajānanti. Namete bhikkhave samaṇā vā brāhmaṇā
vā samaṇesu ceva samaṇasammatā brāhmaṇesu ca brāhmaṇasammatā
te ca panāyasmanto sāmaññatthaṁ vā brāhmaññatthaṁ vā diṭṭheva
dhamme sayaṁ abhiññā sacchikatvā upasampajja viharanti.

[294] Ye ca 3 kho keci bhikkhave samaṇā vā brāhmaṇā
vā imesaṁ pañcannaṁ upādānakkhandhānaṁ assādañca ādīnavañca
nissaraṇañca yathābhūtaṁ pajānanti. Te khome bhikkhave samaṇā
vā brāhmaṇā vā samaṇesu ceva samaṇasammatā brāhmaṇesu
ca brāhmaṇasammatā te ca panāyasmanto sāmaññatthaṁ vā
brāhmaññatthaṁ vā diṭṭheva dhamme sayaṁ abhiññā sacchikatvā
upasampajja viharantīti.

[295] Pañcime bhikkhave upādānakkhandhā. Katame pañca.
1 Ma. svāyaṁ. 2 Yu. hisaddo dissati. 3 Po. casaddo natthi.
Seyyathīdaṁ. Rūpūpādānakkhandho .pe. Viññāṇūpādānakkhandho.
Ye keci bhikkhave samaṇā vā brāhmaṇā vā imesaṁ pañcannaṁ
upādānakkhandhānaṁ samudayañca atthaṅgamañca assādañca ādīnavañca
nissaraṇañca yathābhūtaṁ nappajānanti .pe. Pajānanti. Sayaṁ abhiññā
sacchikatvā upasampajja viharantīti.

[296] Pañcime bhikkhave upādānakkhandhā. Katame pañca.
Seyyathīdaṁ. Rūpūpādānakkhandho .pe. Viññāṇūpādānakkhandho.
Yato 1 kho bhikkhave ariyasāvako imesaṁ pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca yathābhūtaṁ
pajānāti. Ayaṁ vuccati bhikkhave ariyasāvako sotāpanno
avinipātadhammo niyato sambodhiparāyanoti.

[297] Sāvatthī. Pañcime bhikkhave upādānakkhandhā. Katame
pañca. Seyyathīdaṁ. Rūpūpādānakkhandho .pe. Viññāṇūpādānakkhandho.
Yato kho bhikkhave 2 imesaṁ pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca yathābhūtaṁ
viditvā anupādā vimutto hoti. Ayaṁ vuccati bhikkhave bhikkhu
arahaṁ khīṇāsavo vusitavā katakaraṇīyo ohitabhāro anuppattasadattho
parikkhīṇabhavasaññojano sammadaññā vimuttoti.

[298] Sāvatthī. Rūpe bhikkhave yo chando yo rāgo yā
nandi yā taṇhā taṁ pajahatha evantaṁ rūpaṁ pahīnaṁ bhavissati ucchinnamūlaṁ
1 Yu. yato ca kho. 2 Ma. Yu. yato kho bhikkhave bhikkhu.
Tālāvatthukataṁ anabhāvaṅkataṁ āyatiṁ anuppādadhammaṁ. Vedanāya
.pe. Saññāya. Saṅkhāresu. Viññāṇe yo chando yo rāgo yā
nandi yā taṇhā taṁ pajahatha evantaṁ viññāṇaṁ pahīnaṁ bhavissati
ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti.

[299] Sāvatthī. Rūpe bhikkhave yo chando yo rāgo yā
nandi yā taṇhā ye upāyupādānā cetaso adhiṭṭhānābhinivesānusayā
te pajahatha evantaṁ rūpaṁ pahīnaṁ bhavissati ucchinnamūlaṁ tālāvatthukataṁ
anabhāvaṅkataṁ āyatiṁ anuppādadhammaṁ. Vedanāya. Saññāya.
Saṅkhāresu yo chando .pe. Evante saṅkhārā pahīnā bhavissanti
ucchinnamūlā tālāvatthukatā anabhāvaṅkatā āyatiṁ anuppādadhammā.
Viññāṇe yo chando yo rāgo yā nandi yā taṇhā ye
upāyupādānā cetaso adhiṭṭhānābhinivesānusayā te pajahatha evantaṁ
viññāṇaṁ pahīnaṁ bhavissati ucchinnamūlaṁ tālāvatthukataṁ anabhāvaṅkataṁ
āyatiṁ anuppādadhammanti.
Antavaggo.
Tassuddānaṁ
anto dukkhañca sakkāyo pariññeyyā samaṇā duve
sotāpanno arahā ca duve ca chandappahīnāti 1 .
-------------
1 Sī. chandarāgiyāti. Ma. chandarāginoti. Yu. chandarāgiyoti.
Khandhasaṁyuttassa cullapaṇṇāsake dhammakathikavaggo dutiyo

[300] Sāvatthī. Atha kho aññataro bhikkhu yena bhagavā
tenupasaṅkami .pe. Nisinno kho so bhikkhu bhagavantaṁ etadavoca
avijjā avijjāti bhante vuccati katamā nu kho bhante avijjā
kittāvatā ca avijjāgato hotīti. Idha bhikkhu assutavā puthujjano
rūpaṁ nappajānāti rūpasamudayaṁ nappajānāti rūpanirodhaṁ nappajānāti
rūpanirodhagāminīpaṭipadaṁ nappajānāti vedanaṁ nappajānāti. Saññaṁ
nappajānāti. Saṅkhāre nappajānāti. Viññāṇaṁ nappajānāti
.pe. Viññāṇanirodhagāminīpaṭipadaṁ nappajānāti. Ayaṁ vuccati
bhikkhu avijjā ettāvatā ca avijjāgato hotīti.