[281] Katamo ca bhikkhave dukkhasamudayo. Yāyaṁ taṇhā
ponobbhavikā nandirāgasahagatā tatratatrābhinandinī. Seyyathīdaṁ.
Kāmataṇhā bhavataṇhā vibhavataṇhā. Ayaṁ vuccati bhikkhave dukkhasamudayo.

[282] Katamo ca bhikkhave dukkhanirodho. Yo tassāyeva
taṇhāya asesavirāganirodho cāgo paṭinissaggo mutti anālayo.
Ayaṁ vuccati bhikkhave dukkhanirodho.

[283] Katamā ca bhikkhave dukkhanirodhagāminīpaṭipadā. Ayameva
ariyo aṭṭhaṅgiko maggo. Seyyathīdaṁ. Sammādiṭṭhi .pe.
Sammāsamādhi. Ayaṁ vuccati bhikkhave dukkhanirodhagāminīpaṭipadāti.

[284] Sāvatthī. Sakkāyañca vo bhikkhave desissāmi sakkāyasamudayañca
sakkāyanirodhañca sakkāyanirodhagāminīpaṭipadañca 2 taṁ
suṇātha.

[285] Katamo ca bhikkhave sakkāyo. Pañcupādānakkhandhātissa
1 Ma. desessāmi. 2 Ma. Yu. sakkāyanirodhagāminiñca paṭipadaṁ.
Vacanīyaṁ. Katame pañca. Seyyathīdaṁ. Rūpūpādānakkhandho .pe.
Viññāṇūpādānakkhandho. Ayaṁ vuccati bhikkhave sakkāyo.

[286] Katamo ca bhikkhave sakkāyasamudayo. Yāyaṁ taṇhā
ponobbhavikā nandirāgasahagatā tatratatrābhinandinī. Seyyathīdaṁ.
Kāmataṇhā bhavataṇhā vibhavataṇhā. Ayaṁ vuccati bhikkhave sakkāyasamudayo.

[287] Katamo ca bhikkhave sakkāyanirodho. Yo tassāyeva
taṇhāya asesavirāganirodho cāgo paṭinissaggo mutti anālayo.
Ayaṁ vuccati bhikkhave sakkāyanirodho.

[288] Katamā ca bhikkhave sakkāyanirodhagāminīpaṭipadā. Ayameva
ariyo aṭṭhaṅgiko maggo. Seyyathīdaṁ. Sammādiṭṭhi sammāsaṅkappo
.pe. Sammāsamādhi. Ayaṁ vuccati bhikkhave sakkāyanirodhagāminīpaṭipadāti.

[289] Sāvatthī. Pariññeyye ca bhikkhave dhamme desissāmi
pariññañca 1 pariññātāviñca puggalaṁ taṁ suṇātha.

[290] Katame ca bhikkhave pariññeyyā dhammā. Rūpaṁ bhikkhave
pariññeyyo dhammo vedanā saññā .pe. Saṅkhārā. Viññāṇaṁ
pariññeyyo dhammo. Ime vuccanti bhikkhave pariññeyyā dhammā.