[529] Ekamantaṁ nisinno kho āyasmā sārīputto āyasmantaṁ
mahākassapaṁ etadavoca kinnu kho āvuso kassapa hoti tathāgato
parammaraṇāti. Abyākataṁ kho etaṁ āvuso bhagavatā hoti
tathāgato parammaraṇāti. Kiṁ panāvuso na hoti tathāgato
parammaraṇāti. Etampi 1 kho āvuso abyākataṁ bhagavatā na
hoti tathāgato parammaraṇāti. Kiṁ nu kho āvuso hoti ca
na ca hoti tathāgato parammaraṇāti. Abyākataṁ kho etaṁ āvuso
bhagavatā hoti ca na ca hoti tathāgato parammaraṇāti. Kiṁ
panāvuso neva hoti na na hoti tathāgato parammaraṇāti.
Etampi kho āvuso abyākataṁ bhagavatā neva hoti na na
hoti tathāgato parammaraṇāti. Kasmā cetaṁ āvuso abyākataṁ
bhagavatāti. Na hetaṁ āvuso atthasañhitaṁ nādibrahmacariyakaṁ na
nibbidāya na virāgāya na nirodhāya na upasamāya na abhiññāya na
sambodhāya na nibbānāya saṁvattati tasmā taṁ abyākataṁ bhagavatāti.

[530] Atha kiñcarahāvuso byākataṁ bhagavatāti. Idaṁ dukkhanti
1 Ma. Yu. evampi.
Kho āvuso byākataṁ bhagavatā ayaṁ dukkhasamudayoti byākataṁ bhagavatā
ayaṁ dukkhanirodhoti byākataṁ bhagavatā ayaṁ dukkhanirodhagāminī paṭipadāti
byākataṁ bhagavatāti. Kasmā cetaṁ āvuso byākataṁ bhagavatāti.
Etañhi āvuso atthasañhitaṁ etaṁ ādibrahmacariyakaṁ etaṁ nibbidāya
virāgāya nirodhāya upasamāya abhiññāya sambodhāya nibbānāya
saṁvattati tasmā taṁ byākataṁ bhagavatāti. Dvādasamaṁ.

[531] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Atha kho āyasmā mahākassapo yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho āyasmā mahākassapo bhagavantaṁ etadavoca
ko nu kho bhante hetu ko paccayo yena pubbe appatarāni
ceva sikkhāpadāni ahesuṁ bahutarā ca bhikkhū aññāya saṇṭhahiṁsu
ko pana bhante hetu ko paccayo yenetarahi bahutarāni ceva
sikkhāpadāni appatarā ca bhikkhū aññāya saṇṭhahantīti.

[532] Evañhetaṁ 1 kassapa hoti sattesu hāyamānesu saddhamme
antaradhāyamāne bahutarāni ceva sikkhāpadāni honti appatarā ca
bhikkhū aññāya saṇṭhahanti na tāva kassapa saddhammassa antaradhānaṁ
hoti yāva na saddhammapaṭirūpakaṁ loke uppajjati yato ca
kho kassapa saddhammapaṭirūpakaṁ loke uppajjati atha saddhammassa
antaradhānaṁ hoti. Seyyathāpi kassapa na tāva jātarūpassa
1 Ma. evañcetaṁ.
Antaradhānaṁ hoti yāva na jātarūpapaṭirūpakaṁ loke uppajjati yato
ca kho kassapa jātarūpapaṭirūpakaṁ loke uppajjati atha jātarūpassa
antaradhānaṁ hoti. Evameva kho kassapa na tāva saddhammassa
antaradhānaṁ hoti yāva na saddhammapaṭirūpakaṁ loke uppajjati
yato ca kho kassapa saddhammapaṭirūpakaṁ loke uppajjati atha
saddhammassa antaradhānaṁ hoti.

[533] Na kho kassapa paṭhavīdhātu saddhammaṁ antaradhāpeti na
āpodhātu saddhammaṁ antaradhāpeti na tejodhātu saddhammaṁ
antaradhāpeti na vāyodhātu saddhammaṁ antaradhāpeti atha kho idheva te
uppajjanti moghapurisā ye imaṁ saddhammaṁ antaradhāpenti seyyathāpi
kassapa nāvā ādikeneva opilāvati 1 . Na kho kassapa evaṁ
saddhammassa antaradhānaṁ hoti.

[534] Pañca khome kassapa okkamaniyā dhammā saddhammassa
sammosāya antaradhānāya saṁvattanti. Katame pañca. Idha kassapa
bhikkhū bhikkhuniyo upāsakā upāsikāyo satthari agāravā viharanti
appatissā dhamme agāravā viharanti appatissā saṅghe agāravā
viharanti appatissā sikkhāya agāravā viharanti appatissā samādhismiṁ
agāravā viharanti appatissā. Ime kho kassapa pañca okkamaniyā
dhammā saddhammassa sammosāya antaradhānāya saṁvattanti.

[535] Pañca khome kassapa dhammā saddhammassa ṭhitiyā
1 Ma. Yu. opilavati.
Asammosāya anantaradhānāya saṁvattanti. Katame pañca. Idha
kassapa bhikkhū bhikkhuniyo upāsakā upāsikāyo satthari sagāravā
viharanti sappatissā dhamme sagāravā viharanti sappatissā saṅghe
sagāravā viharanti sappatissā sikkhāya sagāravā viharanti sappatissā
samādhismiṁ sagāravā viharanti sappatissā. Ime kho kassapa
pañca dhammā saddhammassa ṭhitiyā asammosāya anantaradhānāya
saṁvattantīti. Terasamaṁ.
Kassapasaṁyuttaṁ catutthaṁ niṭṭhitaṁ.
Tassa uddānaṁ
santuṭṭhañca anottāpī candūpamaṁ kulūpakaṁ
jiṇṇaṁ tayo ca ovādā jhānābhiññā upassayaṁ
cīvaraṁ parammaraṇaṁ saddhammapaṭirūpakanti.
--------
Lābhasakkārasaṁyuttaṁ
------
paṭhamavaggo paṭhamo

[536] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā bhikkhū
āmantesi bhikkhavoti. Bhadanteti te bhikkhū bhagavato paccassosuṁ.

[537] Bhagavā etadavoca dāruṇo bhikkhave lābhasakkārasiloko
kaṭuko pharuso antarāyiko anuttarassa yogakkhemassa adhigamāya
tasmātiha bhikkhave evaṁ sikkhitabbaṁ uppannaṁ lābhasakkārasilokaṁ
pajahissāma na ca no uppanno lābhasakkārasiloko cittaṁ pariyādāya
ṭhassatīti evañhi vo bhikkhave sikkhitabbanti. Paṭhamaṁ.

[538] Sāvatthiyaṁ viharati ... Dāruṇo bhikkhave lābhasakkārasiloko
kaṭuko pharuso antarāyiko anuttarassa yogakkhemassa adhigamāya.